ශ්රීමද්වාල්මීකීය රාමායණේ අරණ්යකාංඩම් ।
අථ ඒකසප්තතිතමස්සර්ගඃ ।
පුරා රාම මහාබාහෝ මහාබලපරාක්රම ।
රූපමාසීන්මමා චිංත්යං ත්රිෂු ලෝකේෂු විශ්රුතම් ॥ 1 ॥
යථා සෝමස්ය ශක්රස්ය සූර්යස්ය ච යථා වපුඃ ।
සෝऽහං රූපමිදං කෘත්වා ලෝකවිත්රාසනං මහත් ॥ 2 ॥
ඍෂීන්වනගතාන්රාම ත්රාසයාමි තතස්තතඃ ।
තතස්ස්ථූලශිරා නාම මහර්ෂිඃ කෝපිතෝ මයා ॥ 3 ॥
සංචින්වන්විවිධං වන්යං රූපේණානේන ධර්ෂිතඃ ।
තේනාහමුක්තඃ ප්රේක්ෂ්යෛවං ඝෝරශාපාභිධායිනා ॥ 4 ॥
ඒතදේව නෘශංසං තේ රූපමස්තු විගර්හිතම් ।
ස මයා යාචිතඃ ක්රුද්ධශ්ශාපස්යෝංතෝ භවේදිති ॥ 5 ॥
අභිශාපකෘතස්යේති තේනේදං භාෂිතං වචඃ ।
යදා ඡිත්ත්වා භුජෞ රාමස්ත්වාං දහේද්විජනේ වනේ ॥ 6 ॥
තදා ත්වං ප්රාප්ස්යසේ රූපං ස්වමේව විපුලං ශුභම් ।
ශ්රියා විරාජිතං පුත්රං දනෝස්ත්වං විද්ධි ලක්ෂ්මණ ॥ 7 ॥
ඉංද්රකෝපාදිදං රූපං ප්රාප්තමේවං රණාජිරේ ।
අහං හි තපසෝග්රේණ පිතාමහමතෝෂයම් ॥ 8 ॥
දීර්ඝමායුස්ස මේ ප්රාදාත්තතෝ මාං විභ්රමෝऽස්පෘශත් ।
දීර්ඝමායුර්මයා ප්රාප්තං කිං මේ ශක්රඃ කරිෂ්යති ॥ 9 ॥
ඉත්යේවං බුද්ධිමාස්ථාය රණේ ශක්රමධර්ෂයම් ।
තස්ය බාහුප්රයුක්තේන වජ්රේණ ශතපර්වණා ॥ 10 ॥
සක්ථිනී චෛව මූර්ධා ච ශරීරේ සංප්රවේශිතම් ।
ස මයා යාච්යමානස්සන්නානයද්යමසාදනම් ॥ 11 ॥
පිතාමහවචස්සත්යං තදස්ත්විති මමාබ්රවීත් ।
අනාහාරඃ කථං ශක්තෝ භග්නසක්ථිශිරෝමුඛඃ ॥ 12 ॥
වජ්රේණාභිහතඃ කාලං සුදීර්ඝමපි ජීවිතුම් ।
ඒවමුක්තස්තු මේ ශක්රෝ බාහූ යෝජනමායතෞ ॥ 13 ॥
ප්රාදාදාස්යං ච මේ කුක්ෂෞ තීක්ෂ්ණදංෂ්ට්රමකල්පයත් ।
සෝऽහං භුජාභ්යාං දීර්ඝාභ්යාං සංකෘෂ්යාස්මින්වනේ චරාන් ॥ 14 ॥
සිංහව්දිපමෘගව්යාඝ්රාන් භක්ෂයාමි සමංතතඃ ।
ස තු මාමබ්රවීදිංද්රෝ යදා රාමස්සලක්ෂ්මණඃ ॥ 15 ॥
ඡේත්ස්යතේ සමරේ බාහූ තදා ස්වර්ගං ගමිෂ්යසි ।
අනේන වපුෂා රාම වනේऽස්මින්රාජසත්තම ॥ 16 ॥
යද්යත්පශ්යාමි සර්වස්ය ග්රහණං සාධු රෝචයේ ।
අවශ්යං ග්රහණං රාමෝ මන්යේऽහං සමුපෛෂ්යති ॥ 17 ॥
ඉමාං බුද්ධිං පුරස්කෘත්ය දේහන්යාසකෘතශ්රමඃ ।
ස ත්වං රාමෝऽසි භද්රං තේ නාහමන්යේන රාඝව ॥ 18 ॥
ශක්යෝ හංතුං යථාතත්ත්වමේවමුක්තං මහර්ෂිණා ।
අහං හි මතිසාචිව්යං කරිෂ්යාමි නරර්ෂභ ॥ 19 ॥
මිත්රං චෛවෝපදේක්ෂ්යාමි යුවාභ්යාං සංස්කෘතෝऽග්නිනා ।
ඒවමුක්තස්තු ධර්මාත්මා දනුනා තේන රාඝවඃ ॥ 20 ॥
ඉදං ජගාද වචනං ලක්ෂ්මණස්යෝපශෘණ්වතඃ ।
රාවණේන හෘතා භාර්යා මම සීතා යශස්ස්විනී ॥ 21 ॥
නිෂ්ක්රාංතස්ය ජනස්ථානාත්සහභ්රාත්රා යථාසුඛම් ।
නාමමාත්රං තු ජානාමි න රූපං තස්ය රක්ෂසඃ ॥ 22 ॥
නිවාසං වා ප්රභාවං වා වයං තස්ය න විද්මහේ ।
ශෝකාර්තානාමනාථානාමේවං විපරිධාවතාම් ॥ 23 ॥
කාරුණ්යං සදෘශං කර්තුමුපකාරේ ච වර්තතාම් ।
කාෂ්ඨාන්යාදාය ශුෂ්කාණි කාලේ භග්නානි කුංජරෛඃ ॥ 24 ॥
ධක්ෂ්යාමස්ත්වාං වයං වීර ශ්වභ්රේ මහති කල්පිතේ ।
ස ත්වං සීතාං සමාචක්ෂ්ව යේන වා යත්ර වා හෘතා ॥ 25 ॥
කුරු කල්යාණමත්යර්ථං යදි ජානාසි තත්ත්වතඃ ।
ඒවමුක්තස්තු රාමේණ වාක්යං දනුරනුත්තමම් ॥ 26 ॥
ප්රෝවාච කුශලෝ වක්තුං වක්තාරමපි රාඝවම් ।
දිව්යමස්ති න මේ ජ්ඤානං නාභිජානාමි මෛථිලීම් ॥ 27 ॥
යස්තාං ජ්ඤාස්යති තං වක්ෂ්යේ දග්ධස්ස්වං රූපමාස්ථිතඃ ।
අදග්ධස්ය තු විජ්ඤාතුං ශක්තිරස්ති න මේ ප්රභෝ ॥ 28 ॥
රාක්ෂසං තං මහාවීර්යං සීතා යේන හෘතා තව ।
විජ්ඤානං හි මම භ්රෂ්ටං ශාපදෝෂේණ රාඝව ॥ 29 ॥
ස්වකෘතේන මයා ප්රාප්තං රූපං ලෝකවිගර්හිතම් ।
කිං තු යාවන්න යාත්යස්තං සවිතා ශ්රාංතවාහනඃ ॥ 30 ॥
තාවන්මාමවටේ ක්ෂිප්ත්වා දහ රාම යථාවිධි ।
දග්ධස්ත්වයාහමවටේ න්යායේන රඝුනංධන ॥ 31 ॥
වක්ෂ්යාමි තමහං වීර යස්තං ජ්ඤාස්යති රාක්ෂසම් ।
තේන සඛ්යං ච කර්තව්යං න්යාය්යවෘත්තේන රාඝව ॥ 32 ॥
කල්පයිෂ්යති තේ ප්රීතස්සාහාය්යං ලඝුවික්රමඃ ।
න හි තස්යාස්ත්යවිජ්ඤාතං ත්රිෂු ලේකේෂු රාඝව ॥ 33 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ඒකසප්තතිතමස්සර්ගඃ ॥
