ශ්රීමද්වාල්මීකීය රාමායණේ අරණ්යකාංඩම් ।
අථ අෂ්ටත්රිංශස්සර්ගඃ ।
කදාචිදප්යහං වීර්යාත්පර්යටන්පෘථිවීමිමාම් ।
බලං නාගසහස්රස්ය ධාරයන්පර්වතෝපමඃ ॥ 1 ॥
නීලජීමූතසංකාශස්තප්තකාංචනකුංඩලඃ ।
භයං ලෝකස්ය ජනයන්කිරීටී පරිඝායුධඃ ॥ 2 ॥
ව්යචරං දංඩකාරණ්යේ ඍෂිමාංසානි භක්ෂයන් ।
විශ්වාමිත්රෝऽථ ධර්මාත්මා මද්විත්රස්තෝ මහාමුනිඃ ॥ 3 ॥
ස්වයං ගත්වා දශරථං නරේංද්රමිදමබ්රවීත් ।
අද්ය රක්ෂතු මාං රාමඃ පර්වකාලේ සමාහිතඃ ॥ 4 ॥
මාරීචාන්මේ භයං ඝෝරං සමුත්පන්නං නරේශ්වර ।
ඉත්යේවමුක්තෝ ධර්මාත්මා රාජා දශරථස්තදා ॥ 5 ॥
ප්රත්යුවාච මහාභාගං විශ්වාමිත්රං මහාමුනිම් ।
බාලෝ ද්වාදශවර්ෂෝऽයමකෘතාස්ත්රශ්ච රාඝවඃ ॥ 6 ॥
කාමං තු මම යත්සෛන්යං මයා සහ ගමිෂ්යති ।
බලේන චතුරංගේණ ස්වයමේත්ය නිශාචරාන් ॥ 7 ॥
වධිෂ්යාමි මුනිශ්රේෂ්ඨ ශත්රූංස්තේ මනසේප්සිතාන් ।
ඉත්යේවමුක්තස්සමුනී රාජානමිදමබ්රවීත් ॥ 8 ॥
රාමාන්නාන්යද්බලං ලෝකේ පර්යාප්තං තස්ය රක්ෂසඃ ।
දේවතානාමපි භවාන් සමරේෂ්වභිපාලකඃ ॥ 9 ॥
ආසීත්තව කෘතං කර්ම ත්රිලෝකේ විදිතං නෘප ।
කාමමස්තු මහත්සෛන්යං තිෂ්ඨත්විහ පරංතප ॥ 10 ॥
බාලෝऽප්යේෂ මහාතේජාස්සමර්ථස්තස්ය නිග්රහේ ।
ගමිෂ්යේ රාමමාදාය ස්වස්ති තේऽස්තු පරංතප ॥ 11 ॥
ඒවමුක්ත්වා තු ස මුනිස්තමාදාය නෘපාත්මජම් ।
ජගාම පරමප්රීතෝ විශ්වාමිත්රස්ස්වමාශ්රමම් ॥ 12 ॥
තං තදා දංඩකාරණ්යේ යජ්ඤමුද්දිශ්ය දීක්ෂිතම් ।
බභූවෝපස්ථිතෝ රාමශ්චිත්රං විෂ්ඵාරයංධනුඃ ॥ 13 ॥
අජාතව්යංජනශ්රීමාන්පද්මපත්රනිභේක්ෂණඃ ।
ඒකවස්ත්රධරෝ ධන්වී ශිඛී කනකමාලයා ॥ 14 ॥
ශෝභයන් දංඩකාරණ්යං දීප්තේන ස්වේන තේජසා ।
අදෘශ්යත තතෝ රාමෝ බාලචංද්ර ඉවෝදිතඃ ॥ 15 ॥
තතෝऽහං මේඝසංකාශස්තප්තකාංචනකුංඩලඃ ।
බලී දත්තවරෝදර්පාදාජගාම තදාශ්රමම් ॥ 16 ॥
තේන දෘෂ්ටඃ ප්රවිෂ්ටෝऽහං සහසෛවෝද්යතායුධඃ ।
මාං තු දෘෂ්ට්වා ධනුස්සජ්යමසංභ්රාංතශ්චකාර සඃ ॥ 17 ॥
අවජානන්නහං මෝහාද්බාලෝऽයමිති රාඝවම් ।
විශ්වාමිත්රස්ය තාං වේදිමභ්යධාවං කෘතත්වරඃ ॥ 18 ॥
තේන මුක්තස්තතෝ බාණඃ ශිතශ්ශත්රුනිබර්හණඃ ।
තේනාහං ත්වාහතඃ ක්ෂිප්තස්සමුද්රේ ශතයෝජනේ ॥ 19 ॥
නේච්ඡතා තාත මාං හංතුං තදා වීරේණ රක්ෂිතඃ ।
රාමස්ය ශරවේගේන නිරස්තෝऽහමචේතනඃ ॥ 20 ॥
පාතිතෝऽහං තදා තේන ගංභීරේ සාගරාංභසි ।
ප්රාප්ය සංජ්ඤාං චිරාත්තාත ලංකාං ප්රතිගතඃ පුරීම් ॥ 21 ॥
ඒවමස්මි තදා මුක්තස්සහායාස්තු නිපාතිතාඃ ।
අකෘතාස්ත්රේණ බාලේන රාමේණාක්ලිෂ්ටකර්මණා ॥ 22 ॥
තන්මයා වාර්යමාණස්ත්වං යදි රාමේණ විග්රහම් ।
කරිෂ්යස්යාපදං ඝෝරාං ක්ෂිප්රං ප්රාප්ස්යසි රාවණ ॥ 23 ॥
ක්රීඩාරතිවිධිජ්ඤානාං සමාජෝත්සවශාලිනාම් ।
රක්ෂසාං චෛව සංතාපමනර්ථං චාහරිෂ්යසි ॥ 24 ॥
හර්ම්යප්රාසාදසංබාධාං නානාරත්නවිභූෂිතාම් ।
ද්රක්ෂ්යසි ත්වං පුරීං ලංකාං විනෂ්ටාං මෛථිලීකෘතේ ॥ 25 ॥
අකුර්වංතෝऽපි පාපානි ශුචයඃ පාපසංශ්රයාත් ।
පරපාපෛර්විනශ්යංති මත්ස්යා නාගහ්රදේ යථා ॥ 26 ॥
දිව්යචංදනදිග්ධාංගාංදිව්යාභරණභූෂිතාන් ।
ද්රක්ෂ්යස්යභිහතාන්භූමෞ තව දෝෂාත්තු රාක්ෂසාන් ॥ 27 ॥
හෘතදාරාන් සදාරාංශ්ච දශ විද්රවතෝ දිශඃ ।
හතශේෂානශරණාංද්රක්ෂ්යසි ත්වං නිශාචරාන් ॥ 28 ॥
ශරජාලපරික්ෂිප්තාමග්නිජ්වාලාසමාවෘතාම් ।
ප්රදග්ධභවනාං ලංකාං ද්රක්ෂ්යසි ත්වං න සංශයඃ ॥ 29 ॥
පරදාරාභිමර්ශාත්තු නාන්යත්පාපතරං මහත් ।
ප්රමදානාං සහස්රං ච තව රාජන්පරිග්රහඃ ॥ 30 ॥
භව ස්වදාරනිරතස්වකුලං රක්ෂ රාක්ෂස ।
මානමෘද්ධිං ච රාජ්යං ච ජීවිතං චේෂ්ටමාත්මනඃ ॥ 31 ॥
කලත්රාණි ච සෞම්යානි මිත්රවර්ගං තථෛව ච ।
යදීච්ඡසි චිරං භෝක්තං මා කෘථා රාමවිප්රියම් ॥ 32 ॥
නිවාර්යමාණස්සුහෘදා මයා භෘශං ප්රසහ්ය සීතාං යදි ධර්ෂයිෂ්යසි ।
ගමිෂ්යසි ක්ෂීණබලස්සබාංධවෝ යමක්ෂයං රාමශරාත්තජීවිතඃ ॥ 33 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ අෂ්ටත්රිංශස්සර්ගඃ ॥
