ශ්රීමද්වාල්මීකීය රාමායණේ අරණ්යකාංඩම් ।
අථ පංචාශස්සර්ගඃ ।
තං ශබ්දමවසුප්තස්තු ජටායුරථ ශුශ්රුවේ ।
නිරීක්ෂ්ය රාවණං ක්ෂිප්රං වෛදේහීං ච දදර්ශ සඃ ॥ 1 ॥
තතඃ පර්වතකූටාභස්තීක්ෂ්ණතුංඩඃ ඛගෝත්තමඃ ।
වනස්පතිගතශ්ශ්රීමාන්ව්යාජහාර ශුභාං ගිරම් ॥ 2 ॥
දශග්රීව ස්ථිතෝ ධර්මේ පුරාණේ සත්යසංශ්රයඃ ।
ජටායුර්නාම නාම්නාහං ගෘධ්රරාජෝ මහාබලඃ ॥ 3 ॥
රාජා සර්වස්ය ලෝකස්ය මහේංද්රවරුණෝපමඃ ।
ලෝකානාං ච හිතේ යුක්තෝ රාමෝ දශරථාත්මජඃ ॥ 4 ॥
තස්යෛෂා ලෝකනාථස්ය ධර්මපත්නී යශස්විනී ।
සීතා නාම වරාරෝහා යාං ත්වං හර්තුමිහේච්ඡසි ॥ 5 ॥
කථං රාජාස්ථිතෝ ධර්මේ පරදාරාන්පරාමෘශේත් ।
රක්ෂණීයා විශේෂේණ රාජදාරා මහාබල ॥ 6 ॥
නිවර්තය මතිං නීචාං පරදාරාභිමර්ශනාත් ।
න තත්සමාචරේද්ධීරෝ යත්පරෝऽස්ය විගර්හයේත් ॥ 7 ॥
යථාත්මනස්තථාන්යේෂාං දාරා රක්ෂ්යා විපශ්චිතා ।
ධර්මමර්ථං වා කාමං වා ශිෂ්ටාශ්ශාස්ත්රේෂ්වනාගතම් ॥ 8 ॥
ව්යවස්යංත්යනු රාජානං ධර්මං පෞලස්ත්යනංදන ।
රාජා ධර්මස්ය කාමස්ය ද්රව්යාණාං චෝත්තමෝ නිධිඃ ॥ 9 ॥
ධර්මශ්ශුභං වා පාපං වා රාජමූලං ප්රවර්තතේ ।
පාපස්වභාවශ්චපලඃ කථං ත්වං රක්ෂසාං වර ॥ 10 ॥
ඓශ්වර්යමභිසංප්රාප්තෝ විමානමිව දුෂ්කෘතිඃ ।
කාමං ස්වභාවෝ යෝ යස්ය න ශක්යඃ පරිමාර්ජිතුම් ॥ 11 ॥
න හි දුෂ්ටාත්මනාමාර්යමාවසත්යාලයේ චිරම් ।
විෂයේ වා පුරේ වා තේ යදා රාමෝ මහාබලඃ ॥ 12 ॥
නාපරාධ්යති ධර්මාත්මා කථං තස්යාපරාධ්යසි ।
යදි ශූර්පණඛාහේතෝර්ජනස්ථානගතඃ ඛරඃ ॥ 13 ॥
අතිවෘත්තෝ හතඃ පූර්වං රාමේණාක්ලිෂ්ටකර්මණා ।
අත්ර බ්රූහි යථාතත්ත්වං කෝ රාමස්ය ව්යතික්රමඃ ॥ 14 ॥
යස්ය ත්වං ලෝකනාථස්ය භාර්යාං හෘත්වා ගමිෂ්යසි ।
ක්ෂිප්රං විසෘජ වෛදේහීං මා ත්වා ඝෝරේණ චක්ෂුෂා ॥ 15 ॥
දහේද්දහනභූතේන වෘත්රමිංද්රාශනිර්යථා ।
සර්පමාශීවිෂං බද්ධ්වා වස්ත්රාංතේ නාවබුධ්යසේ ॥ 16 ॥
ග්රීවායාං ප්රතිසක්තං ච කාලපාශං න පශ්යසි ।
ස භාරස්සෞම්ය භර්තව්යෝ යෝ නරං නාවසාදයේත් ॥ 17 ॥
තදන්නමපි භෝක්තව්යං ජීර්යතේ යදනාමයම් ।
යත්කෘත්වා න භවේද්ධර්මෝ න කීර්තිර්න යශෝ භුවි ॥ 18 ॥
ශරීරස්ය භවේත්ඛේදඃ කස්තත්කර්ම සමාචරේත් ।
ෂෂ්ටිර්වර්ෂසහස්රාණි මම ජාතස්ය රාවණ ॥ 19 ॥
පිතෘපෛතාමහං රාජ්යං යථාවදනුතිෂ්ඨතඃ ।
වෘද්ධෝऽහං ත්වං යුවා ධන්වී සශරඃ කවචී රථී ॥ 20 ॥
තථාප්යාදාය වෛදේහීං කුශලී න ගමිෂ්යසි ।
න ශක්තස්ත්වං බලාද්ධර්තුං වෛදේහීං මම පශ්යතඃ ॥ 21 ॥
හේතුභිර්න්යායසංසිද්ධෛද්ධෘවාං වේදශ්රුතීමිව ।
යුද්ධ්යස්ව යදි ශූරෝऽසි මුහූර්තං තිෂ්ඨ රාවණ ॥ 22 ॥
ශයිෂ්යසේ හතෝ භූමෞ යථාපූර්වං ඛරස්තථා ।
අසකෘත්සංයුගේ යේන නිහතා දෛත්යදානවාඃ ॥ 23 ॥
නචිරාච්චීරවාසාස්ත්වාං රාමෝ යුධි වධිෂ්යති ।
කිං නු ශක්යං මයා කර්තුං ගතෞදූරං නෘපාත්මජෞ ॥ 24 ॥
ක්ෂිප්රං ත්වං නශ්යසේ නීච තයෝර්භීතෝ න සංශයඃ ।
න හි මේ ජීවමානස්ය නයිෂ්යසි ශුභාමිමාම් ॥ 25 ॥
සීතාං කමලපත්රාක්ෂීං රාමස්ය මහිෂීං ප්රියාම් ।
අවශ්යං තු මයා කාර්යං ප්රියං තස්ය මහාත්මනඃ ॥ 26 ॥
ජීවිතේනාපි රාමස්ය තථා දශරථස්ය ච ।
තිෂ්ඨ තිෂ්ඨ දශග්රීව මුහූර්තං පශ්ය රාවණ ॥ 27 ॥
යුද්ධාතිථ්යං ප්රදාස්යාමි යථාප්රාණං නිශාචර ।
වෘංතාදිව ඵලං ත්වාං තු පාතයේයං රථෝත්තමාත් ॥ 28 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ පංචාශස්සර්ගඃ ॥
