ශ්රීමද්වාල්මීකීය රාමායණේ අරණ්යකාංඩම් ।
අථ නවමස්සර්ගඃ ।
සුතීක්ෂ්ණේනාභ්යනුජ්ඤාතං ප්රස්ථිතං රඝුනංදනම් ।
හෘද්යයා ස්නිග්ධයා වාචා භර්තාරමිදමබ්රවීත් ॥ 1 ॥
අයං ධර්මස්සුසූක්ෂ්මේණ විධිනා ප්රාප්යතේ මහාන් ।
නිවෘත්තේන තු ශක්යෝऽයං ව්යසනාත්කාමජාදිහ ॥ 2 ॥
ත්රීණ්යේව ව්යසනාන්යත්ර කාමජානි භවංත්යුත ।
මිථ්යාවාක්යං පරමකං තස්මාද්ගුරුතරාවුභෞ ॥ 3 ॥
පරදාරාභිගමනං විනා වෛරං ච රෞද්රතා ।
මිථ්යාවාක්යං න තේ භූතං න භවිෂ්යති රාඝව ॥ 4 ॥
කුතෝऽභිලාෂණං ස්ත්රීණාං පරේෂාං ධර්මනාශනම් ।
තව නාස්ති මනුෂ්යේංද්ර න චාභූත්තේ කදාචන ॥ 5 ॥
මනස්යපි තථා රාම න චෛතද්විද්යතේ ක්වචිත් ।
ස්වදාරනිරතස්ත්වං ච නිත්යමේව නෘපාත්මජ ॥ 6 ॥
ධර්මිෂ්ඨස්සත්යසංධශ්ච පිතුර්නිර්දේශකාරකඃ ।
සත්යසංධ මහාභාග ශ්රීමල්ලක්ෂ්මණපූර්වජ ॥ 7 ॥
ත්වයි ධර්මශ්ච සත්යං ච ත්වයි සර්වං ප්රතිෂ්ඨිතම් ।
තච්ච සර්වං මහාබාහෝ ශක්යං ධර්තුං ජිතේංද්රියෛඃ ॥ 8 ॥
තව වශ්යේංද්රියත්වං ච ජානාමි ශුභදර්ශන ।
තෘතීයං යදිදං රෞද්රං පරප්රාණාභිහිංසනම් ॥ 9 ॥
නිර්වෛරං ක්රියතේ මෝහාත්තච්ච තේ සමුපස්ථිතම් ।
ප්රතිජ්ඤාතස්ත්වයා වීර දංඩකාරණ්යවාසිනාම් ॥ 10 ॥
ඍෂීණාං රක්ෂණාර්ථාය වධස්සංයති රක්ෂසාම් ।
ඒතන්නිමිත්තං ච වනං දංඩකා ඉති විශ්රුතම් ॥ 11 ॥
ප්රස්ථිතස්ත්වං සහ භ්රාත්රා ධෘතබාණශරාසනඃ ।
තතස්ත්වාං ප්රස්ථිතං දෘෂ්ට්වා මම චිංතාකුලං මනඃ ॥ 12 ॥
ත්වද්වෘත්තං චිංතයංත්යා වෛ භවේන්නිශ්ශ්රේයසං හිතම් ।
ත්වාං චෛව ප්රස්ථිතං දෘෂ්ට්වා රාම චිංතාකුලං මනඃ ॥ 13 ॥
සර්වතචශිංතය්නත්යා මේ තව නිශ්ශ්රේයසං නෘප ।
න හි මේ රෝචතේ වීර ගමනං දංඩකාන්ප්රති ॥ 14 ॥
කාරණං තත්ර වක්ෂ්යාමි වදංත්යාශ්ශ්රූයතාං මම ।
ත්වං හි බාණධනුෂ්පාණිර්භ්රාත්රා සහ වනං ගතඃ ॥ 15 ॥
දෘෂ්ට්වා වනචරාන්සර්වාන්කච්චිත්කුර්යාශ්ශරව්යයම් ।
ක්ෂත්රියාණාමපි ධනුර්හුතාශස්යේංධනානි ච ॥ 16 ॥
සමීපතස්ස්ථිතං තේජෝ බලමුච්ඡ්රයතේ භෘශම් ।
පුරා කිල මහාබාහෝ තපස්ස්වී සත්යවාක්ඡුචිඃ ॥ 17 ॥
කස්මිංශ්චිදභවත්පුණ්යේ වනේ රතමෘගද්විජේ ।
තස්යෛව තපසෝ විඝ්නං කර්තුමිංද්රශ්ශචීපතිඃ ॥ 18 ॥
ඛංගපාණිරථාගච්ඡදාශ්රමං භටරූපධෘත් ।
තස්මිංස්තදාශ්රමපදේ නිශිතඃ ඛංග උත්තමඃ ॥ 19 ॥
ස න්යාසවිධිනා දත්තඃ පුණ්යේ තපසි තිෂ්ඨතඃ ।
ස තච්ඡස්ත්රමනුප්රාප්ය න්යාසරක්ෂණතත්පරඃ ॥ 20 ॥
වනේ තු විචරත්යේව රක්ෂන්ප්රත්යයමාත්මනඃ ।
යත්ර ගච්ඡත්යුපාදාතුං මූලානි ච ඵලානි ච ॥ 21 ॥
න විනා යාති තං ඛංගං න්යාසරක්ෂණතත්පරඃ ।
නිත්යං ශස්ත්රං පරිවහන්ක්රමේණ ස තපෝධනඃ ॥ 22 ॥
චකාර රෞද්රීං ස්වාං බුද්ධිං ත්යක්ත්වා තපසි නිශ්චයම් ।
තතස්සරෞද්රේऽභිරතඃ ප්රමත්තෝऽධර්මකර්ශිතඃ ॥ 23 ॥
තස්ය ශස්ත්රස්ය සංවාසාජ්ජගාම නරකං මුනිඃ ।
ඒවමේතත්පුරා වෘත්තං ශස්ත්රසංයෝගකාරණම් ॥ 24 ॥
අග්නිසංයෝගවද්ධේතුශ්ශස්ත්රසංයෝග උච්යතේ ।
ස්නේහාච්ච බහුමානාච්ච ස්මාරයේ ත්වාං න ශික්ෂයේ ॥ 25 ॥
න කථංචන සා කාර්යා ගෘහීතධනුෂා ත්වයා ।
බුද්ධිර්වෛරං විනා හංතුං රාක්ෂසාංදංඩකාශ්රිතාන් ॥ 26 ॥
අපරාධං විනා හංතුං ලෝකාන්වීර න කාමයේ ।
ක්ෂත්රියාණාං තු වීරාණාං වනේෂු නිරතාත්මනාම් ॥ 27 ॥
ධනුෂා කාර්යමේතාවදාර්තානාං ත්වභිරක්ෂණම් ।
ක්වච ශස්ත්රං ක්ව ච වනං ක්ව ච ක්ෂාත්රං තපඃ ක්වච ॥ 28 ॥
ව්යාවිද්ධමිදමස්මාභිර්ද්දේශධර්මස්තු පූජ්යතාම් ।
තදාර්ය කලුෂා බුද්ධිර්ජායතේ ශස්ත්රසේවනාත් ॥ 29 ॥
පුනර්ගත්වා ත්වයෝධ්යායාං ක්ෂත්රධර්මං චරිෂ්යසි ।
අක්ෂයා තු භවේත්ප්රීතිශ්ශ්වශ්රූශ්වශුරයෝර්මම ॥ 30 ॥
යදි රාජ්යං පරිත්යජ්ය භවේස්ත්වං නිරතෝ මුනිඃ ।
ධර්මාදර්ථඃ ප්රභවති ධර්මාත්ප්රභවතේ සුඛම් ॥ 31 ॥
ධර්මේණ ලභතේ සර්වං ධර්මසාරමිදං ජගත් ।
ආත්මානං නියමෛස්තෛස්තෛ කර්ශයිත්වා ප්රයත්නතඃ ॥ 32 ॥
ප්රාප්යතේ නිපුණෛර්ධර්මෝ න සුඛාල්ලභ්යතේ සුඛම් ।
නිත්යං ශුචිමතිස්සෞම්ය චර ධර්මං තපෝවනේ ॥ 33 ॥
සර්වං හි විදිතං තුභ්යං ත්රෛලෝක්යමපි තත්ත්වතඃ ।
ස්ත්රීචාපලාදේතදුදාහෘතං මේ ධර්මං ච වක්තුං තව කස්සමර්ථඃ ।
විචාර්ය බුද්ධ්යා තු සහානුජේන යද්රෝචතේ තත්කුරු මා චිරේණ ॥ 34 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ නවමස්සර්ගඃ ॥
