શ્રીમદ્વાલ્મીકીય રામાયણે બાલકાંડમ્ ।
અથ એકોનવિંશસ્સર્ગઃ ।
તચ્છ્રુત્વા રાજસિંહસ્ય વાક્યમદ્ભુતવિસ્તરમ્ ।
હૃષ્ટરોમા મહાતેજા વિશ્વામિત્રોઽભ્યભાષત ॥ 1 ॥
સદૃશં રાજશાર્દૂલ તવૈતદ્ભુવિ નાન્યથા ।
મહાવંશપ્રસૂતસ્ય વસિષ્ઠવ્યપદેશિનઃ ॥ 2 ॥
યત્તુ મે હૃદ્ગતં વાક્યં તસ્ય કાર્યસ્ય નિશ્ચયમ્ ।
કુરૂષ્વ રાજશાર્દૂલ ભવ સત્યપ્રતિશ્રવઃ ॥ 3 ॥
અહંનિયમમાતિષ્ઠે સિધ્યર્થં પુરુષર્ષભ ।
તસ્ય વિઘ્નકરૌ દ્વૌ તુ રાક્ષસૌ કામરૂપિણૌ ॥ 4 ॥
વ્રતે મે બહુશશ્ચીર્ણે સમાપ્ત્યાં રાક્ષસાવિમૌ ।
મારીચશ્ચ સુબાહુશ્ચ વીર્યવંતૌ સુશિક્ષિતૌ ॥ 5 ॥
સમાંસરુધિરૌઘેણ વેદિં તામભ્યવર્ષતામ્ ।
અવધૂતે તથાભૂતે તસ્મિન્નિયમનિશ્ચયે ॥ 6 ॥
કૃતશ્રમો નિરુત્સાહસ્તસ્માદ્દેશાદપાક્રમે ।
ન ચ મે ક્રોધમુત્સ્રષ્ટું બુદ્ધિર્ભવતિ પાર્થિવ ॥ 7 ॥
તથા ભૂતા હિ સા ચર્યા ન શાપસ્તત્ર મુચ્યતે ।
સ્વપુત્રં રાજશાર્દૂલ રામં સત્યપરાક્રમમ્ ॥ 8 ॥
કાકપક્ષધરં શૂરં જ્યેષ્ઠં મે દાતુમર્હસિ ।
શક્તો હ્યેષ મયા ગુપ્તો દિવ્યેન સ્વેન તેજસા ॥ 9 ॥
રાક્ષસા યે વિકર્તારસ્તેષામપિ વિનાશને ।
શ્રેયશ્ચાસ્મૈ પ્રદાસ્યામિ બહુરૂપં ન સંશયઃ ॥ 10 ॥
ત્રયાણામપિ લોકાનાં યેન ખ્યાતિં ગમિષ્યતિ ।
ન ચ તૌ રામમાસાદ્ય શક્તૌ સ્થાતું કથંચન ॥ 11 ॥
ન ચ તૌ રાઘવાદન્યો હંતુમુત્સહતે પુમાન્ ।
વીર્યોત્સિક્તૌ હિ તૌ પાપૌ કાલપાશવશં ગતૌ ॥ 12 ॥
રામસ્ય રાજશાર્દૂલ ન પર્યાપ્તૌ મહાત્મનઃ ।
ન ચ પુત્રકૃતસ્નેહં કર્તુમર્હસિ પાર્થિવ ॥ 13 ॥
અહં તે પ્રતિજાનામિ હતૌ તૌ વિદ્ધિ રાક્ષસૌ ।
અહં વેદ્મિ મહાત્માનં રામં સત્યપરાક્રમમ્ ॥ 14 ॥
વસિષ્ઠોઽપિ મહાતેજા યે ચેમે તપસિ સ્થિતાઃ ।
યદિ તે ધર્મલાભં ચ યશશ્ચ પરમં ભુવિ ॥ 15 ॥
સ્થિતમિચ્છસિ રાજેંદ્ર રામં મે દાતુમર્હસિ ।
યદિહ્યનુજ્ઞાં કાકુત્સ્થ દદતે તવ મંત્રિણઃ ॥ 16 ॥
વસિષ્ઠપ્રમુખાઃ સર્વે તતો રામં વિસર્જય ।
અભિપ્રેતમસંસક્તમાત્મજં દાતુમર્હસિ ॥ 17 ॥
દશરાત્રં હિ યજ્ઞસ્ય રામં રાજીવલોચનમ્ ।
નાત્યેતિ કાલો યજ્ઞસ્ય યથાઽયં મમ રાઘવ ॥ 18 ॥
તથા કુરુષ્વ ભદ્રં તે મા ચ શોકે મનઃ કૃથાઃ ।
ઇત્યેવમુક્ત્વા ધર્માત્મા ધર્માર્થસહિતં વચઃ ॥ 19 ॥
વિરરામ મહાતેજા વિશ્વામિત્રો મહામુનિઃ ।
સ તન્નિશમ્ય રાજેંદ્રો વિશ્વામિત્રવચશ્શુભમ્ ॥ 20 ॥
શોકમભ્યગમત્તીવ્રં વ્યષીદત ભયાન્વિતઃ ।
ઇતિ હૃદયમનોવિદારણં મુનિવચનં તદતીવ શુશ્રુવાન્ ।
નરપતિરભવન્મહાંસ્તદા વ્યથિતમનાઃ પ્રચચાલ ચાસનાત્ ॥ 21 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે એકોનવિંશસ્સર્ગઃ ॥
