ශ්රීමද්වාල්මීකීය රාමායණේ අරණ්යකාංඩම් ।
අථ පංචමස්සර්ගඃ ।
හත්වා තු තං භීමබලං විරාධං රාක්ෂසං වනේ ।
තතස්සීතාං පරිෂ්වජ්ය සමාශ්වාස්ය ච වීර්යවාන් ॥ 1 ॥
අබ්රවීල්ලක්ෂ්මණං රාමෝ භ්රාතරං දීප්තතේජසම් ।
කෂ්ටං වනමිදං දුර්ගං න ච ස්ම වනගෝචරාඃ ॥ 2 ॥
අභිගච්ඡාමහේ ශීඝ්රං ශරභංගං තපෝධනම් ।
ආශ්රමං ශරභංගස්ය රාඝවෝऽභිජගාම හ ॥ 3 ॥
තස්ය දේවප්රභාවස්ය තපසා භාවිතාත්මනඃ ।
සමීපේ ශරභංගස්ය දදර්ශ මහදද්භුතම් ॥ 4 ॥
විභ්රාජමානං වපුෂා සූර්යවෛශ්වානරෝපමම් ।
අවරුහ්යරථෝත්සංගාදාකාශේ විබුධානුගම ॥ 5 ॥
අසංස්පෘශංතං වසුධාං දදර්ශ විබුධේශ්වරම් ।
සුප්රභාභරණං දේවං විරජෝऽංබරධාරිණම් ॥ 6 ॥
තද්විධෛරේව බහුභිඃ පූජ්යමානං මහාත්මභිඃ ।
හරිභිර්වාජිභිර්යුක්තමංතරික්ෂගතං රථම් ॥ 7 ॥
දදර්ශාදූරතස්තස්ය තරුණාදිත්යසන්නිභම් ।
පාංඩුරාභ්රඝනප්රඛ්යං චංද්රමංඩලසන්නිභම් ॥ 8 ॥
අපශ්යද්විමලං ඡත්රං චිත්රමාල්යෝපශෝභිතම් ।
චාමරව්යජනේ චාග්ර්යේ රුක්මදංඩේ මහාධනේ ॥ 9 ॥
ගෘහීතේ වරනාරීභ්යාං ධූයමානේ ච මූර්ධනි ।
ගංධර්වාමරසිද්ධාශ්ච බහවඃ පරමර්ෂයඃ ॥ 10 ॥
අංතරික්ෂගතං දේවං වාග්භිරග්ය්රාභිරීඩිරේ ।
සහ සංභාෂමාණේ තු ශරභංගේන වාසවේ ॥ 11 ॥
දෘෂ්ට්වා ශතක්රතුං තත්ර රාමෝ ලක්ෂ්මණමබ්රවීත් ।
රාමෝऽථ රථමුද්දිශ්ය ලක්ෂ්මණායප්රදර්ශයන් ॥ 12 ॥
අර්චිෂ්මංතං ශ්රියා ජුෂ්ටමද්භුතං පශ්ය ලක්ෂ්මණ ।
ප්රතපංතමිවාදිත්යමංතරික්ෂගතං රථම් ॥ 13 ॥
යේ හයාඃ පුරුහූතස්ය පුරා ශක්රස්ය නශ්ශ්රුතාඃ ।
අංතරික්ෂගතා දිව්යාස්ත ඉමේ හරයෝ ධ්රුවම් ॥ 14 ॥
ඉමේ ච පුරුෂව්යාඝ්රා යේ තිෂ්ඨංත්යභිතෝ රථම් ।
ශතං ශතං කුංඩලිනෝ යුවානඃ ඛංගපාණයඃ ॥ 15 ॥
විස්තීර්ණවිපුලෝරස්කාඃ පරිඝායතබාහවඃ ।
ශෝණාංශුවසනාස්සර්වේ ව්යාධ්රා ඉව දුරාසදාඃ ॥ 16 ॥
උරෝදේශේෂු සර්වේෂාං හාරා ජ්වලනසන්නිභාඃ ।
රූපං බිභ්රති සෞමිත්රේ පංචවිංශතිවාර්ෂිකම් ॥ 17 ॥
ඒතද්දි කිල දේවානාං වයෝ භවති නිත්යදා ।
යථේමේ පුරුෂව්යාඝ්රා දෘශ්යංතේ ප්රියදර්ශනාඃ ॥ 18 ॥
ඉහෛව සහ වෛදේහ්යා මුහූර්තං තිෂ්ඨ ලක්ෂ්මණ ।
යාවජ්ජානාම්යහං ව්යක්තං ක ඒෂ ද්යුතිමාන්රථේ ॥ 19 ॥
තමේවමුක්ත්වා සෞමිත්රිමිහෛව ස්ථීයතාමිති ।
අභිචක්රාම කාකුත්ස්ථ ශ්ශරභංගාශ්රමං ප්රති ॥ 20 ॥
තතස්සමභිගච්ඡංතං ප්රේක්ෂ්ය රාමං ශචීපතිඃ ।
ශරභංගමනුප්රාප්ය විවික්ත ඉදමබ්රවීත් ॥ 21 ॥
ඉහෝපයාත්යසෞ රාමෝ යාවන්මාං නාභිභාෂතේ ।
නිෂ්ඨාං නයතු තාවත්තු තතෝ මා ද්රෂ්ටුමර්හති ॥ 22 ॥
ජිතවංතං කෘතාර්ථං හි තදාහමචිරාදිමම් ।
කර්ම හ්යනේන කර්තව්යං මහදන්යෛස්සුදුෂ්කරම් ॥ 23 ॥
ඉති වජ්රී තමාමංත්ර්ය මානයිත්වා ච තාපසම් ।
රථේන හයයුක්තේන යයෞ දිවමරිංදමඃ ॥ 24 ॥
ප්රයාතේ තු සහස්රාක්ෂේ රාඝවස්සපරිච්ඡදඃ ।
අග්නිහෝත්රමුපාසීනං ශරභංගමුපාගමත් ॥ 25 ॥
තස්ය පාදෞ ච සංගෘහ්ය රාමස්සීතා ච ලක්ෂ්මණඃ ।
නිෂේදුස්සමනුජ්ඤාතා ලබ්ධවාසා නිමංත්රිතාඃ ॥ 26 ॥
තතශ්ශක්රෝපයානං තු පර්යපෘච්ඡත්ස රාඝවඃ ।
ශරභංගශ්ච තත්සර්යං රාඝවාය න්යවේදයත් ॥ 27 ॥
මාමේෂ වරදෝ රාම බ්රහ්මලෝකං නිනීෂති ।
ජිතමුග්රේණ තපසා දුෂ්ප්රාපමකෘතාත්මභිඃ ॥ 28 ॥
අහං ජ්ඤාත්වා නරව්යාඝ්ර වර්තමානමදූරතඃ ।
බ්රහ්මලෝකං න ගච්ඡාමි ත්වාමදෘෂ්ට්වා ප්රියාතිථිම් ॥ 29 ॥
ත්වයාऽහං පුරුෂව්යාඝ්ර ධාර්මිකේණ මහාත්මනා ।
සමාගම්ය ගමිෂ්යාමි ත්රිදිවං දේවසේවිතම් ॥ 30 ॥
අක්ෂයා නරශාර්දූල මයා ලෝකා ජිතාශ්ශුභා ।
බ්රාහ්ම්යාශ්ච නාකපෘෂ්ඨ්යාශ්ච ප්රතිගෘහ්ණීෂ්ව මාමකාන් ॥ 31 ॥
ඒවමුක්තෝ නරව්යාඝ්රස්සර්වශාස්ත්ර විශාරදඃ ।
ඍෂිණා ශරභංගේණ රාඝවෝ වාක්යමබ්රවීත් ॥ 32 ॥
අහමේවාහරිෂ්යාමි සර්වාංල්ලෝකාන්මහාමුනේ ।
ආවාසං ත්වහමිච්ඡාමි ප්රදිෂ්ටමිහ කානනේ ॥ 33 ॥
රාඝවේණෛවමුක්තස්තු ශක්රතුල්යබලේන වෛ ।
ශරභංගෝ මහාප්රාජ්ඤඃ පුනරේවාබ්රවීද්වචඃ ॥ 34 ॥
ඉහ රාම මහාතේජාස්සුතීක්ෂ්ණෝ නාම ධාර්මිකඃ ।
වසත්යරණ්යේ ධර්මාත්මා ස තේ ශ්රේයෝ විධාස්යති ॥ 35 ॥
සුතීක්ෂ්ණමභිගච්ඡ ත්වං ශුචෞ දේශේ තපස්විනම් ।
රමණීයේ වනෝද්දේශේ ස තේ වාසං විධාස්යති ॥ 36 ॥
ඉමාං මංදාකිනීං රාම ප්රතිස්රෝතාමනුව්රජ ।
නදීං පුෂ්පෝඩුපවහාං තතස්තත්ර ගමිෂ්යසි ॥ 37 ॥
ඒෂ පංථා නරව්යාඝ්ර මුහූර්තං පශ්ය තාත මාම් ।
යාවජ්ජහාමි ගාත්රාණි ජීර්ණාං ත්වචමිවෝරගඃ ॥ 38 ॥
තතෝऽග්නිං ස සමාධාය හුත්වා චාජ්යේන මංත්රවිත් ।
ශරභංගෝ මහාතේජාඃ ප්රවිවේශ හුතාශනම් ॥ 39 ॥
තස්ය රෝමාණි කේශාංශ්ච තදා වහ්නිර්මහාත්මනඃ ।
ජීර්ණාං ත්වචං තථාऽස්ථීනි යච්ච මාංසං සශෝණිතම් ॥ 40 ॥
ස ච පාවකසංකාශඃ කුමාරස්සමපද්යත ।
උත්ථායාග්නිචයාත්තස්මාච්ඡරභංගෝ ව්යරෝචත ॥ 41 ॥
ස ලෝකානාහිතාග්නීනාමෘෂීණාං ච මහාත්මනාම් ।
දේවානාං ච ව්යතික්රම්ය බ්රහ්මලෝකං ව්යරෝහත ॥ 42 ॥
ස පුණ්යකර්මා භුවනේ ද්විජර්ෂභඃ පිතාමහං සානුචරං දදර්ශ හ ।
පිතාමහශ්චාපි සමීක්ෂ්ය තං ද්විජං නනංද සුස්වාගතමිත්යුවාච හ ॥ 43 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ පංචමස්සර්ගඃ ॥
