ශ්රීමද්වාල්මීකීය රාමායණේ බාලකාංඩම් ।
අථ චත්වාරිංශස්සර්ගඃ ।
. දේවතානාං වචශ්ශ්රුත්වා භගවාන්වෛ පිතාමහඃ ।
ප්රත්යුවාච සුසංත්රස්තාන්කෘතාංතබලමෝහිතාන් ॥ 1 ॥
යස්යේයං වසුධා කෘත්ස්නා වාසුදේවස්ය ධීමතඃ ।
කාපිලං රූපමාස්ථාය ධාරයත්යනිශං ධරාම් ॥ 2 ॥
තස්ය කෝපාග්නිනා දග්ධා භවිෂ්යංති නෘපාත්මජාඃ ।
පෘථිව්යාශ්චාපි නිර්භේදෝऽදෘෂ්ට ඒව සනාතනඃ ॥ 3 ॥
සගරස්ය ච පුත්රාණාං විනාශෝऽදීර්ඝජීවිනාම් ।
පිතාමහවචශ්ශ්රුත්වා ත්රයස්ත්රිංශදරිංදම ॥ 4 ॥
දේවාඃ පරමසංහෘෂ්ටාඃ පුනර්ජග්මුර්යථාගතම් ।
සගරස්ය ච පුත්රාණාං ප්රාදුරාසීන්මහාත්මනාම් ॥ 5 ॥
පෘථිව්යාං භිද්යමානායාං නිර්ඝාතසමනිස්වනඃ ।
තතෝ භිත්වා මහීං සර්වේ කෘත්වා චාභිප්රදක්ෂිණම් ॥ 6 ॥
සහිතා ස්සගරාස්සර්වේ පිතරං වාක්යමබ්රුවන් ।
0 පරික්රාංතා මහී සර්වා සත්ත්වවංතශ්ච සූදිතාඃ ॥ 7 ॥
දේවදානවරක්ෂාංසි පිශාචෝරගකින්නරාඃ ।
න ච පශ්යාමහේऽශ්වං තමශ්වහර්තාරමේව ච ॥ 8 ॥
කිං කරිෂ්යාම භද්රං තේ බුද්ධිරත්ර විචාර්යතාම් ।
තේෂාං තද්වචනං ශ්රුත්වා පුත්රාණාං රාජසත්තමඃ ॥ 9 ॥
සමන්යුරබ්රවීද්වාක්යං සගරෝ රඝුනංදන ।
භූයඃ ඛනත භද්රං වෝ නිර්භිද්ය වසුධාතලම් ॥ 10 ॥
අශ්වහර්තාරමාසාද්ය කෘතාර්ථාශ්ච නිවර්තථ ।
පිතුර්වචනමාසාද්ය සගරස්ය මහාත්මනඃ ॥ 11 ॥
ෂෂ්ටිඃ පුත්රසහස්රාණි රසාතලමභිද්රවන් ।
ඛන්යමානේ තතස්තස්මින් දදෘශුඃ පර්වතෝපමම් ॥ 12 ॥
දිශාගජං විරූපාක්ෂං ධාරයංතං මහීතලම් ।
සපර්වතවනාං කෘත්ස්නාං පෘථිවීං රඝුනංදන ॥ 13 ॥
ශිරසා ධාරයාමාස විරූපාක්ෂෝ මහාගජඃ ।
යදා පර්වණි කාකුත්ස්ථ විශ්රමාර්ථං මහාගජඃ ॥ 14 ॥
ඛේදාච්චාලයතේ ශීර්ෂං භූමිකංපස්තදාභවේත් ।
තං තේ ප්රදක්ෂිණං කෘත්වා දිශාපාලං මහාගජම් ॥ 15 ॥
මානයංතෝ හි තේ රාම ජග්මුර්භිත්ත්වා රසාතලම් ।
තතඃ පූර්වාං දිශං භිත්ත්වා දක්ෂිණාං බිභිදුඃ පුනඃ ॥ 16 ॥
දක්ෂිණස්යාමපි දිශි දදෘශුස්තේ මහාගජම් ।
මහාපද්මං මහාත්මානං සුමහත්පර්වතෝපමම් ॥ 17 ॥
ශිරසා ධාරයංතං තේ විස්මයං ජග්මුරුත්තමම් ।
තතඃ ප්රදක්ෂිණං කෘත්වා සගරස්ය මහාත්මනඃ ॥ 18 ॥
ෂෂ්ටිඃ පුත්රසහස්රාණි පශ්චිමාං බිභිදුර්දිශම් ।
පශ්චිමායාමපි දිශි මහාංතමචලෝපමම් ॥ 19 ॥
දිශාගජං සෞමනසං දදෘශුස්තේ මහාබලාඃ ।
තං තේ ප්රදක්ෂිණං කෘත්වා පෘෂ්ට්වා චාපි නිරාමයම් ।
ඛනංත ස්සමුපක්රාංතා දිශං හෛමවතීං තතඃ ॥ 20 ॥
උත්තරස්යාං රඝුශ්රේෂ්ඨ දදෘශුර්හිමපාංඩුරම් ॥ 21 ॥
භද්රං භද්රේණ වපුෂා ධාරයංතං මහීමිමාම් ।
සමාලභ්ය තත ස්සර්වේ කෘත්වා චෛනං ප්රදක්ෂිණම් ॥ 22 ॥
ෂෂ්ටිඃ පුත්රසහස්රාණි බිභිදුර්වසුධාතලම් ।
තතඃ ප්රාගුත්තරාං ගත්වා සාගරාඃ ප්රථිතාං දිශම් ॥ 23 ॥
රෝෂාදභ්යඛනන් සර්වේ පෘථිවීං සගරාත්මජාඃ ।
තේ තු සර්වේ මහාත්මානෝ භීමවේගා මහාබලාඃ ॥ 24 ॥
දදෘශුඃ කපිලං තත්ර වාසුදේවං සනාතනම් ।
හයං ච තස්ය දේවස්ය චරංතමවිදූරතඃ ॥ 25 ॥
ප්රහර්ෂමතුලං ප්රාප්තාස්සර්වේ තේ රඝුනංදන ।
තේ තං හයවරං ජ්ඤාත්වා ක්රෝධපර්යාකුලේක්ෂණාඃ ॥ 26 ॥
ඛනිත්රලාංගලධරා නානාවෘක්ෂශිලාධරාඃ ।
අභ්යධාවංත සංක්රුද්ධාස්තිෂ්ඨ තිෂ්ඨේති චාබ්රුවන් ॥ 27 ॥
අස්මාකං ත්වං හි තුරගං යජ්ඤීයං හෘතවානසි ।
දුර්මේධස්ත්වං හි සංප්රාප්තාන් විද්ධි නස්සගරාත්මජාන් ॥ 28 ॥
ශ්රුත්වා තු වචනං තේෂාං කපිලෝ රඝුනංදන ।
රෝෂේණ මහතාऽऽවිෂ්ටෝ හුංකාරමකරෝත්තදා ॥ 29 ॥
තතස්තේනාප්රමේයේන කපිලේන මහාත්මනා ।
භස්මරාශීකෘතාස්සර්වේ කාකුත්ස්ථ සගරාත්මජාඃ ॥ 30 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ චත්වාරිංශස්සර්ගඃ ॥
