śrīmadvālmīkīya rāmāyaṇē araṇyakāṇḍam ।
atha viṃśassargaḥ ।
tataśśūrpaṇakhā ghōrā rāghavāśramamāgatā ।
rākṣasānāchachakṣē tau bhrātarau saha sītayā ॥ 1 ॥
tē rāmaṃ parṇaśālāyāmupaviṣṭaṃ mahābalam ।
dadṛśussītayā sārdhaṃ vaidēhyā lakṣmaṇēna cha ॥ 2 ॥
tāndṛṣṭvā rāghavaśśrīmānāgatāṃstāṃ cha rākṣasīm ।
abravīdbhrātaraṃ rāmō lakṣmaṇaṃ dīptatējasam ॥ 3 ॥
muhūrtaṃ bhava saumitrē sītāyāḥ pratyanantaraḥ ।
imānasyā vadhiṣyāmi padavīmāgatāniha ॥ 4 ॥
vākyamētattataśśrutvā rāmasya viditātmanaḥ ।
tathēti lakṣmaṇō vākyaṃ rāmasya pratyapūjayat ॥ 5 ॥
rāghavō'pi mahachchāpaṃ chāmīkaravibhūṣitam ।
chakāra sajyaṃ dharmātmā tāni rakṣāṃsi chābravīt ॥ 6 ॥
putrau daśarathasyāvāṃ bhrātarau rāmalakṣmaṇau ।
praviṣṭau sītayā sārdhaṃ duścharaṃ daṇḍakāvanam ॥ 7 ॥
phalamūlāśanau dāntau tāpasau dharmachāriṇau ।
vasantau daṇḍakāraṇyē kimarthamupahiṃsatha ॥ 8 ॥
yuṣmānpāpātmakānhantuṃ viprakārānmahāhavē ।
ṛṣīṇāṃ tu niyōgēna prāptō'haṃ saśarāyudhaḥ ॥ 9 ॥
tiṣṭhataivātra santuṣṭā nōpāvartitumarhatha ।
yadi prāṇairihārthō vā nivartadhvaṃ niśācharāḥ ॥ 10 ॥
tasya tadvachanaṃ śrutvā rākṣasāstē chaturdaśa ।
ūchurvāchaṃ susaṅkruddhā brahmaghnāśśūlapāṇayaḥ ॥ 11 ॥
krōdhamutpādya nō bhartuḥ kharasya sumahātmanaḥ ।
tvamēva hāsyasē prāṇānadyāsmābhirhatō yudhi ॥ 12 ॥
kā hi tē śaktirēkasya bahūnāṃ raṇamūrdhanī ।
asmākamagrataḥ sthātuṃ kiṃ punaryōddumāhavē ॥ 13 ॥
ēhi bāhuprayuktairnaḥ parighaiśśūlapaṭṭisaiḥ ।
prāṇāṃstyakṣasi vīryaṃ cha dhanuścha karapīḍitam ॥ 14 ॥
ityēvamuktvā saṅkṛddhā rākṣasāstē chaturdaśa ।
chikṣipustāni śūlāni rāghavaṃ prati durjayam ॥ 15 ॥
tāni śūlāni kākutsthassamastāni chaturdaśa ।
tāvadbhirēva chichChēda śaraiḥ kāñchanabhūṣaṇaiḥ ॥ 16 ॥
tataḥ paśchānmahātējā nārāchānsūryasannibhān ।
jagrāha paramakruddhaśchaturdaśa śilāśitān ॥ 17 ॥
gṛhītvā dhanurāyamya lakṣyānuddiśya rākṣasān ।
mumōcha rāghavō bāṇānvajrāniva śatakratuḥ ॥ 18 ॥
rukmapuṅkhāścha viśikhā dīptā hēmavibhūṣitāḥ ।
tē bhittvā rakṣasāṃ vēgādvakṣāṃsi rudhirāplutāḥ ॥ 19 ॥
viniṣpētustadā bhūmau nyamajjantāśanisvanāḥ ।
tē bhinnahṛdayā bhūmau Chinnamūlā iva drumāḥ ॥ 20 ॥
nipētuśśōṇitārdrāṅgā vikṛtā vigatāsavaḥ ।
tān dṛṣṭvā patitānbhūmau rākṣasī krōdhamūrChitā ॥ 21 ॥
paritrastā punastatra vyasṛjadbhairavasvanān ।
upagamya kharaṃ sā tu kiñchitsaṃśuṣkaśōṇitā ॥ 22 ॥
papāta punarēvārtā saniryāsēva sallakī ।
papāta punarēvārtā saniryāsēva sallakī ॥ 23 ॥
bhrātussamīpē śōkārtā sasarja ninadaṃ muhuḥ ॥ 24 ॥
sasvaraṃ mumuchē bāṣpaṃ viṣaṇṇavadanā tadā ।
nipātitān dṛśya raṇē tu rākṣasān pradhāvitā śūrpaṇakhā punastataḥ ।
vadhaṃ cha tēṣāṃ nikhilēna rakṣasāṃ śaśaṃsa sarvaṃ bhaginī kharasya sā ॥ 25 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē viṃśassargaḥ ॥
