ശ്രീമദ്വാല്മീകീയ രാമായണേ അരണ്യകാംഡമ് ।
അഥ വിംശസ്സര്ഗഃ ।
തതശ്ശൂര്പണഖാ ഘോരാ രാഘവാശ്രമമാഗതാ ।
രാക്ഷസാനാചചക്ഷേ തൌ ഭ്രാതരൌ സഹ സീതയാ ॥ 1 ॥
തേ രാമം പര്ണശാലായാമുപവിഷ്ടം മഹാബലമ് ।
ദദൃശുസ്സീതയാ സാര്ധം വൈദേഹ്യാ ലക്ഷ്മണേന ച ॥ 2 ॥
താംദൃഷ്ട്വാ രാഘവശ്ശ്രീമാനാഗതാംസ്താം ച രാക്ഷസീമ് ।
അബ്രവീദ്ഭ്രാതരം രാമോ ലക്ഷ്മണം ദീപ്തതേജസമ് ॥ 3 ॥
മുഹൂര്തം ഭവ സൌമിത്രേ സീതായാഃ പ്രത്യനംതരഃ ।
ഇമാനസ്യാ വധിഷ്യാമി പദവീമാഗതാനിഹ ॥ 4 ॥
വാക്യമേതത്തതശ്ശ്രുത്വാ രാമസ്യ വിദിതാത്മനഃ ।
തഥേതി ലക്ഷ്മണോ വാക്യം രാമസ്യ പ്രത്യപൂജയത് ॥ 5 ॥
രാഘവോഽപി മഹച്ചാപം ചാമീകരവിഭൂഷിതമ് ।
ചകാര സജ്യം ധര്മാത്മാ താനി രക്ഷാംസി ചാബ്രവീത് ॥ 6 ॥
പുത്രൌ ദശരഥസ്യാവാം ഭ്രാതരൌ രാമലക്ഷ്മണൌ ।
പ്രവിഷ്ടൌ സീതയാ സാര്ധം ദുശ്ചരം ദംഡകാവനമ് ॥ 7 ॥
ഫലമൂലാശനൌ ദാംതൌ താപസൌ ധര്മചാരിണൌ ।
വസംതൌ ദംഡകാരണ്യേ കിമര്ഥമുപഹിംസഥ ॥ 8 ॥
യുഷ്മാന്പാപാത്മകാന്ഹംതും വിപ്രകാരാന്മഹാഹവേ ।
ഋഷീണാം തു നിയോഗേന പ്രാപ്തോഽഹം സശരായുധഃ ॥ 9 ॥
തിഷ്ഠതൈവാത്ര സംതുഷ്ടാ നോപാവര്തിതുമര്ഹഥ ।
യദി പ്രാണൈരിഹാര്ഥോ വാ നിവര്തധ്വം നിശാചരാഃ ॥ 10 ॥
തസ്യ തദ്വചനം ശ്രുത്വാ രാക്ഷസാസ്തേ ചതുര്ദശ ।
ഊചുർവാചം സുസംക്രുദ്ധാ ബ്രഹ്മഘ്നാശ്ശൂലപാണയഃ ॥ 11 ॥
ക്രോധമുത്പാദ്യ നോ ഭര്തുഃ ഖരസ്യ സുമഹാത്മനഃ ।
ത്വമേവ ഹാസ്യസേ പ്രാണാനദ്യാസ്മാഭിര്ഹതോ യുധി ॥ 12 ॥
കാ ഹി തേ ശക്തിരേകസ്യ ബഹൂനാം രണമൂര്ധനീ ।
അസ്മാകമഗ്രതഃ സ്ഥാതും കിം പുനര്യോദ്ദുമാഹവേ ॥ 13 ॥
ഏഹി ബാഹുപ്രയുക്തൈര്നഃ പരിഘൈശ്ശൂലപട്ടിസൈഃ ।
പ്രാണാംസ്ത്യക്ഷസി വീര്യം ച ധനുശ്ച കരപീഡിതമ് ॥ 14 ॥
ഇത്യേവമുക്ത്വാ സംകൃദ്ധാ രാക്ഷസാസ്തേ ചതുര്ദശ ।
ചിക്ഷിപുസ്താനി ശൂലാനി രാഘവം പ്രതി ദുര്ജയമ് ॥ 15 ॥
താനി ശൂലാനി കാകുത്സ്ഥസ്സമസ്താനി ചതുര്ദശ ।
താവദ്ഭിരേവ ചിച്ഛേദ ശരൈഃ കാംചനഭൂഷണൈഃ ॥ 16 ॥
തതഃ പശ്ചാന്മഹാതേജാ നാരാചാന്സൂര്യസന്നിഭാന് ।
ജഗ്രാഹ പരമക്രുദ്ധശ്ചതുര്ദശ ശിലാശിതാന് ॥ 17 ॥
ഗൃഹീത്വാ ധനുരായമ്യ ലക്ഷ്യാനുദ്ദിശ്യ രാക്ഷസാന് ।
മുമോച രാഘവോ ബാണാന്വജ്രാനിവ ശതക്രതുഃ ॥ 18 ॥
രുക്മപുംഖാശ്ച വിശിഖാ ദീപ്താ ഹേമവിഭൂഷിതാഃ ।
തേ ഭിത്ത്വാ രക്ഷസാം വേഗാദ്വക്ഷാംസി രുധിരാപ്ലുതാഃ ॥ 19 ॥
വിനിഷ്പേതുസ്തദാ ഭൂമൌ ന്യമജ്ജംതാശനിസ്വനാഃ ।
തേ ഭിന്നഹൃദയാ ഭൂമൌ ഛിന്നമൂലാ ഇവ ദ്രുമാഃ ॥ 20 ॥
നിപേതുശ്ശോണിതാര്ദ്രാംഗാ വികൃതാ വിഗതാസവഃ ।
താന് ദൃഷ്ട്വാ പതിതാന്ഭൂമൌ രാക്ഷസീ ക്രോധമൂര്ഛിതാ ॥ 21 ॥
പരിത്രസ്താ പുനസ്തത്ര വ്യസൃജദ്ഭൈരവസ്വനാന് ।
ഉപഗമ്യ ഖരം സാ തു കിംചിത്സംശുഷ്കശോണിതാ ॥ 22 ॥
പപാത പുനരേവാര്താ സനിര്യാസേവ സല്ലകീ ।
പപാത പുനരേവാര്താ സനിര്യാസേവ സല്ലകീ ॥ 23 ॥
ഭ്രാതുസ്സമീപേ ശോകാര്താ സസര്ജ നിനദം മുഹുഃ ॥ 24 ॥
സസ്വരം മുമുചേ ബാഷ്പം വിഷണ്ണവദനാ തദാ ।
നിപാതിതാന് ദൃശ്യ രണേ തു രാക്ഷസാന് പ്രധാവിതാ ശൂര്പണഖാ പുനസ്തതഃ ।
വധം ച തേഷാം നിഖിലേന രക്ഷസാം ശശംസ സർവം ഭഗിനീ ഖരസ്യ സാ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ വിംശസ്സര്ഗഃ ॥
