ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଵିଂଶସ୍ସର୍ଗଃ ।
ତତଶ୍ଶୂର୍ପଣଖା ଘୋରା ରାଘଵାଶ୍ରମମାଗତା ।
ରାକ୍ଷସାନାଚଚକ୍ଷେ ତୌ ଭ୍ରାତରୌ ସହ ସୀତୟା ॥ 1 ॥
ତେ ରାମଂ ପର୍ଣଶାଲାୟାମୁପଵିଷ୍ଟଂ ମହାବଲମ୍ ।
ଦଦୃଶୁସ୍ସୀତୟା ସାର୍ଧଂ ଵୈଦେହ୍ୟା ଲକ୍ଷ୍ମଣେନ ଚ ॥ 2 ॥
ତାଂଦୃଷ୍ଟ୍ଵା ରାଘଵଶ୍ଶ୍ରୀମାନାଗତାଂସ୍ତାଂ ଚ ରାକ୍ଷସୀମ୍ ।
ଅବ୍ରଵୀଦ୍ଭ୍ରାତରଂ ରାମୋ ଲକ୍ଷ୍ମଣଂ ଦୀପ୍ତତେଜସମ୍ ॥ 3 ॥
ମୁହୂର୍ତଂ ଭଵ ସୌମିତ୍ରେ ସୀତାୟାଃ ପ୍ରତ୍ୟନଂତରଃ ।
ଇମାନସ୍ୟା ଵଧିଷ୍ୟାମି ପଦଵୀମାଗତାନିହ ॥ 4 ॥
ଵାକ୍ୟମେତତ୍ତତଶ୍ଶ୍ରୁତ୍ଵା ରାମସ୍ୟ ଵିଦିତାତ୍ମନଃ ।
ତଥେତି ଲକ୍ଷ୍ମଣୋ ଵାକ୍ୟଂ ରାମସ୍ୟ ପ୍ରତ୍ୟପୂଜୟତ୍ ॥ 5 ॥
ରାଘଵୋଽପି ମହଚ୍ଚାପଂ ଚାମୀକରଵିଭୂଷିତମ୍ ।
ଚକାର ସଜ୍ୟଂ ଧର୍ମାତ୍ମା ତାନି ରକ୍ଷାଂସି ଚାବ୍ରଵୀତ୍ ॥ 6 ॥
ପୁତ୍ରୌ ଦଶରଥସ୍ୟାଵାଂ ଭ୍ରାତରୌ ରାମଲକ୍ଷ୍ମଣୌ ।
ପ୍ରଵିଷ୍ଟୌ ସୀତୟା ସାର୍ଧଂ ଦୁଶ୍ଚରଂ ଦଂଡକାଵନମ୍ ॥ 7 ॥
ଫଲମୂଲାଶନୌ ଦାଂତୌ ତାପସୌ ଧର୍ମଚାରିଣୌ ।
ଵସଂତୌ ଦଂଡକାରଣ୍ୟେ କିମର୍ଥମୁପହିଂସଥ ॥ 8 ॥
ୟୁଷ୍ମାନ୍ପାପାତ୍ମକାନ୍ହଂତୁଂ ଵିପ୍ରକାରାନ୍ମହାହଵେ ।
ଋଷୀଣାଂ ତୁ ନିୟୋଗେନ ପ୍ରାପ୍ତୋଽହଂ ସଶରାୟୁଧଃ ॥ 9 ॥
ତିଷ୍ଠତୈଵାତ୍ର ସଂତୁଷ୍ଟା ନୋପାଵର୍ତିତୁମର୍ହଥ ।
ୟଦି ପ୍ରାଣୈରିହାର୍ଥୋ ଵା ନିଵର୍ତଧ୍ଵଂ ନିଶାଚରାଃ ॥ 10 ॥
ତସ୍ୟ ତଦ୍ଵଚନଂ ଶ୍ରୁତ୍ଵା ରାକ୍ଷସାସ୍ତେ ଚତୁର୍ଦଶ ।
ଊଚୁର୍ଵାଚଂ ସୁସଂକ୍ରୁଦ୍ଧା ବ୍ରହ୍ମଘ୍ନାଶ୍ଶୂଲପାଣୟଃ ॥ 11 ॥
କ୍ରୋଧମୁତ୍ପାଦ୍ୟ ନୋ ଭର୍ତୁଃ ଖରସ୍ୟ ସୁମହାତ୍ମନଃ ।
ତ୍ଵମେଵ ହାସ୍ୟସେ ପ୍ରାଣାନଦ୍ୟାସ୍ମାଭିର୍ହତୋ ୟୁଧି ॥ 12 ॥
କା ହି ତେ ଶକ୍ତିରେକସ୍ୟ ବହୂନାଂ ରଣମୂର୍ଧନୀ ।
ଅସ୍ମାକମଗ୍ରତଃ ସ୍ଥାତୁଂ କିଂ ପୁନର୍ୟୋଦ୍ଦୁମାହଵେ ॥ 13 ॥
ଏହି ବାହୁପ୍ରୟୁକ୍ତୈର୍ନଃ ପରିଘୈଶ୍ଶୂଲପଟ୍ଟିସୈଃ ।
ପ୍ରାଣାଂସ୍ତ୍ୟକ୍ଷସି ଵୀର୍ୟଂ ଚ ଧନୁଶ୍ଚ କରପୀଡିତମ୍ ॥ 14 ॥
ଇତ୍ୟେଵମୁକ୍ତ୍ଵା ସଂକୃଦ୍ଧା ରାକ୍ଷସାସ୍ତେ ଚତୁର୍ଦଶ ।
ଚିକ୍ଷିପୁସ୍ତାନି ଶୂଲାନି ରାଘଵଂ ପ୍ରତି ଦୁର୍ଜୟମ୍ ॥ 15 ॥
ତାନି ଶୂଲାନି କାକୁତ୍ସ୍ଥସ୍ସମସ୍ତାନି ଚତୁର୍ଦଶ ।
ତାଵଦ୍ଭିରେଵ ଚିଚ୍ଛେଦ ଶରୈଃ କାଂଚନଭୂଷଣୈଃ ॥ 16 ॥
ତତଃ ପଶ୍ଚାନ୍ମହାତେଜା ନାରାଚାନ୍ସୂର୍ୟସନ୍ନିଭାନ୍ ।
ଜଗ୍ରାହ ପରମକ୍ରୁଦ୍ଧଶ୍ଚତୁର୍ଦଶ ଶିଲାଶିତାନ୍ ॥ 17 ॥
ଗୃହୀତ୍ଵା ଧନୁରାୟମ୍ୟ ଲକ୍ଷ୍ୟାନୁଦ୍ଦିଶ୍ୟ ରାକ୍ଷସାନ୍ ।
ମୁମୋଚ ରାଘଵୋ ବାଣାନ୍ଵଜ୍ରାନିଵ ଶତକ୍ରତୁଃ ॥ 18 ॥
ରୁକ୍ମପୁଂଖାଶ୍ଚ ଵିଶିଖା ଦୀପ୍ତା ହେମଵିଭୂଷିତାଃ ।
ତେ ଭିତ୍ତ୍ଵା ରକ୍ଷସାଂ ଵେଗାଦ୍ଵକ୍ଷାଂସି ରୁଧିରାପ୍ଲୁତାଃ ॥ 19 ॥
ଵିନିଷ୍ପେତୁସ୍ତଦା ଭୂମୌ ନ୍ୟମଜ୍ଜଂତାଶନିସ୍ଵନାଃ ।
ତେ ଭିନ୍ନହୃଦୟା ଭୂମୌ ଛିନ୍ନମୂଲା ଇଵ ଦ୍ରୁମାଃ ॥ 20 ॥
ନିପେତୁଶ୍ଶୋଣିତାର୍ଦ୍ରାଂଗା ଵିକୃତା ଵିଗତାସଵଃ ।
ତାନ୍ ଦୃଷ୍ଟ୍ଵା ପତିତାନ୍ଭୂମୌ ରାକ୍ଷସୀ କ୍ରୋଧମୂର୍ଛିତା ॥ 21 ॥
ପରିତ୍ରସ୍ତା ପୁନସ୍ତତ୍ର ଵ୍ୟସୃଜଦ୍ଭୈରଵସ୍ଵନାନ୍ ।
ଉପଗମ୍ୟ ଖରଂ ସା ତୁ କିଂଚିତ୍ସଂଶୁଷ୍କଶୋଣିତା ॥ 22 ॥
ପପାତ ପୁନରେଵାର୍ତା ସନିର୍ୟାସେଵ ସଲ୍ଲକୀ ।
ପପାତ ପୁନରେଵାର୍ତା ସନିର୍ୟାସେଵ ସଲ୍ଲକୀ ॥ 23 ॥
ଭ୍ରାତୁସ୍ସମୀପେ ଶୋକାର୍ତା ସସର୍ଜ ନିନଦଂ ମୁହୁଃ ॥ 24 ॥
ସସ୍ଵରଂ ମୁମୁଚେ ବାଷ୍ପଂ ଵିଷଣ୍ଣଵଦନା ତଦା ।
ନିପାତିତାନ୍ ଦୃଶ୍ୟ ରଣେ ତୁ ରାକ୍ଷସାନ୍ ପ୍ରଧାଵିତା ଶୂର୍ପଣଖା ପୁନସ୍ତତଃ ।
ଵଧଂ ଚ ତେଷାଂ ନିଖିଲେନ ରକ୍ଷସାଂ ଶଶଂସ ସର୍ଵଂ ଭଗିନୀ ଖରସ୍ୟ ସା ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଵିଂଶସ୍ସର୍ଗଃ ॥
