શ્રીમદ્વાલ્મીકીય રામાયણે અરણ્યકાંડમ્ ।
અથ વિંશસ્સર્ગઃ ।
તતશ્શૂર્પણખા ઘોરા રાઘવાશ્રમમાગતા ।
રાક્ષસાનાચચક્ષે તૌ ભ્રાતરૌ સહ સીતયા ॥ 1 ॥
તે રામં પર્ણશાલાયામુપવિષ્ટં મહાબલમ્ ।
દદૃશુસ્સીતયા સાર્ધં વૈદેહ્યા લક્ષ્મણેન ચ ॥ 2 ॥
તાંદૃષ્ટ્વા રાઘવશ્શ્રીમાનાગતાંસ્તાં ચ રાક્ષસીમ્ ।
અબ્રવીદ્ભ્રાતરં રામો લક્ષ્મણં દીપ્તતેજસમ્ ॥ 3 ॥
મુહૂર્તં ભવ સૌમિત્રે સીતાયાઃ પ્રત્યનંતરઃ ।
ઇમાનસ્યા વધિષ્યામિ પદવીમાગતાનિહ ॥ 4 ॥
વાક્યમેતત્તતશ્શ્રુત્વા રામસ્ય વિદિતાત્મનઃ ।
તથેતિ લક્ષ્મણો વાક્યં રામસ્ય પ્રત્યપૂજયત્ ॥ 5 ॥
રાઘવોઽપિ મહચ્ચાપં ચામીકરવિભૂષિતમ્ ।
ચકાર સજ્યં ધર્માત્મા તાનિ રક્ષાંસિ ચાબ્રવીત્ ॥ 6 ॥
પુત્રૌ દશરથસ્યાવાં ભ્રાતરૌ રામલક્ષ્મણૌ ।
પ્રવિષ્ટૌ સીતયા સાર્ધં દુશ્ચરં દંડકાવનમ્ ॥ 7 ॥
ફલમૂલાશનૌ દાંતૌ તાપસૌ ધર્મચારિણૌ ।
વસંતૌ દંડકારણ્યે કિમર્થમુપહિંસથ ॥ 8 ॥
યુષ્માન્પાપાત્મકાન્હંતું વિપ્રકારાન્મહાહવે ।
ઋષીણાં તુ નિયોગેન પ્રાપ્તોઽહં સશરાયુધઃ ॥ 9 ॥
તિષ્ઠતૈવાત્ર સંતુષ્ટા નોપાવર્તિતુમર્હથ ।
યદિ પ્રાણૈરિહાર્થો વા નિવર્તધ્વં નિશાચરાઃ ॥ 10 ॥
તસ્ય તદ્વચનં શ્રુત્વા રાક્ષસાસ્તે ચતુર્દશ ।
ઊચુર્વાચં સુસંક્રુદ્ધા બ્રહ્મઘ્નાશ્શૂલપાણયઃ ॥ 11 ॥
ક્રોધમુત્પાદ્ય નો ભર્તુઃ ખરસ્ય સુમહાત્મનઃ ।
ત્વમેવ હાસ્યસે પ્રાણાનદ્યાસ્માભિર્હતો યુધિ ॥ 12 ॥
કા હિ તે શક્તિરેકસ્ય બહૂનાં રણમૂર્ધની ।
અસ્માકમગ્રતઃ સ્થાતું કિં પુનર્યોદ્દુમાહવે ॥ 13 ॥
એહિ બાહુપ્રયુક્તૈર્નઃ પરિઘૈશ્શૂલપટ્ટિસૈઃ ।
પ્રાણાંસ્ત્યક્ષસિ વીર્યં ચ ધનુશ્ચ કરપીડિતમ્ ॥ 14 ॥
ઇત્યેવમુક્ત્વા સંકૃદ્ધા રાક્ષસાસ્તે ચતુર્દશ ।
ચિક્ષિપુસ્તાનિ શૂલાનિ રાઘવં પ્રતિ દુર્જયમ્ ॥ 15 ॥
તાનિ શૂલાનિ કાકુત્સ્થસ્સમસ્તાનિ ચતુર્દશ ।
તાવદ્ભિરેવ ચિચ્છેદ શરૈઃ કાંચનભૂષણૈઃ ॥ 16 ॥
તતઃ પશ્ચાન્મહાતેજા નારાચાન્સૂર્યસન્નિભાન્ ।
જગ્રાહ પરમક્રુદ્ધશ્ચતુર્દશ શિલાશિતાન્ ॥ 17 ॥
ગૃહીત્વા ધનુરાયમ્ય લક્ષ્યાનુદ્દિશ્ય રાક્ષસાન્ ।
મુમોચ રાઘવો બાણાન્વજ્રાનિવ શતક્રતુઃ ॥ 18 ॥
રુક્મપુંખાશ્ચ વિશિખા દીપ્તા હેમવિભૂષિતાઃ ।
તે ભિત્ત્વા રક્ષસાં વેગાદ્વક્ષાંસિ રુધિરાપ્લુતાઃ ॥ 19 ॥
વિનિષ્પેતુસ્તદા ભૂમૌ ન્યમજ્જંતાશનિસ્વનાઃ ।
તે ભિન્નહૃદયા ભૂમૌ છિન્નમૂલા ઇવ દ્રુમાઃ ॥ 20 ॥
નિપેતુશ્શોણિતાર્દ્રાંગા વિકૃતા વિગતાસવઃ ।
તાન્ દૃષ્ટ્વા પતિતાન્ભૂમૌ રાક્ષસી ક્રોધમૂર્છિતા ॥ 21 ॥
પરિત્રસ્તા પુનસ્તત્ર વ્યસૃજદ્ભૈરવસ્વનાન્ ।
ઉપગમ્ય ખરં સા તુ કિંચિત્સંશુષ્કશોણિતા ॥ 22 ॥
પપાત પુનરેવાર્તા સનિર્યાસેવ સલ્લકી ।
પપાત પુનરેવાર્તા સનિર્યાસેવ સલ્લકી ॥ 23 ॥
ભ્રાતુસ્સમીપે શોકાર્તા સસર્જ નિનદં મુહુઃ ॥ 24 ॥
સસ્વરં મુમુચે બાષ્પં વિષણ્ણવદના તદા ।
નિપાતિતાન્ દૃશ્ય રણે તુ રાક્ષસાન્ પ્રધાવિતા શૂર્પણખા પુનસ્તતઃ ।
વધં ચ તેષાં નિખિલેન રક્ષસાં શશંસ સર્વં ભગિની ખરસ્ય સા ॥ 25 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે વિંશસ્સર્ગઃ ॥
