ശ്രീമദ്വാല്മീകീയ രാമായണേ അരണ്യകാംഡമ് ।
അഥ ദ്വാവിംശസ്സര്ഗഃ ।
ഏവമാധര്ഷിതശ്ശൂരശ്ശൂര്പണഖ്യാ ഖരസ്തതഃ ।
ഉവാച രക്ഷസാം മധ്യേ ഖരഃ ഖരതരം വചഃ ॥ 1 ॥
തവാവമാനപ്രഭവഃ ക്രോധോഽയമതുലോ മമ ।
ന ശക്യതേ ധാരയിതും ലവണാംഭ ഇവോല്ബണമ് ॥ 2 ॥
ന രാമം ഗണയേ വീര്യാന്മാനുഷം ക്ഷീണജീവിതമ് ।
ആത്മദുശ്ചരിതൈഃ പ്രാണാന്ഹതോയോഽദ്യ വിമോക്ഷ്യതേ ॥ 3 ॥
ബാഷ്പസ്സംഹ്രിയതാമേഷ സംഭ്രമശ്ച വിമുച്യതാമ് ।
അഹം രാമം സഹ ഭ്രാത്രാ നയാമി യമസാദനമ് ॥ 4 ॥
പരശ്വഥഹതസ്യാദ്യ മംദപ്രാണസ്യ സംയുഗേ ।
രാമസ്യ രുധിരം രക്തമുഷ്ണം പാസ്യസി രാക്ഷസി ॥ 5 ॥
സാ പ്രഹൃഷ്ടാ വചശ്ശ്രുത്വാ ഖരസ്യ വദനാച്ച്യുതമ് ।
പ്രശശംസ പുനര്മൌര്ഖ്യാദ്ഭ്രാതരം രക്ഷസാം വരമ് ॥ 6 ॥
തയാ പരുഷിതഃ പൂർവം പുനരേവ പ്രശംസിതഃ ।
അബ്രവീദ്ദൂഷണം നാമ ഖരസ്സേനാപതിം തദാ ॥ 7 ॥
ചതുര്ദശ സഹസ്രാണി മമ ചിത്താനുവര്തിനാമ് ।
രക്ഷസാം ഭീമവേഗാനാം സമരേഷ്വനിവര്തിനാമ് ॥ 8 ॥
നീലജീമൂതവര്ണാനാം ഘോരാണാം ക്രൂരകര്മണാമ് ।
ലോകഹിംസാവിഹാരാണാം ബലിനാമുഗ്രതേജസാമ് ॥ 9 ॥
തേഷാം ശാര്ദൂലദര്പാണാം മഹാസ്യാനാം മഹൌജസാമ് ।
സർവോദ്യോഗ മുദീര്ണാനാം രക്ഷസാം സൌമ്യ കാരയ ॥ 10 ॥
ഉപസ്ഥാപയ മേ ക്ഷിപ്രം രഥം സൌമ്യ ധനൂംഷി ച ।
ശരാംശ്ചിത്രാംശ്ച ഖംഗാംശ്ച ശക്തീശ്ച വിവിധാശ്ശിതാഃ ॥ 11 ॥
അഗ്രേ നിര്യാതുമിച്ഛാമി പൌലസ്ത്യാനാം മഹാത്മനാമ് ।
വധാര്ഥം ദുർവിനീതസ്യ രാമസ്യ രണകോവിദഃ ॥ 12 ॥
ഇതി തസ്യ ബ്രുവാണസ്യ സൂര്യവര്ണം മഹാരഥമ് ।
സദശ്വൈശ്ശബലൈര്യുക്തമാചചക്ഷേഽഥ ദൂഷണഃ ॥ 13 ॥
തം മേരുശിഖരാകാരം തപ്തകാംചനഭൂഷണമ് ।
ഹേമചക്രമസംബാധം വൈദൂര്യമയകൂബരമ് ॥ 14 ॥
മത്സ്യൈഃ പുഷ്പൈര്ദ്രുമൈശ്ശൈലൈശ്ചംദ്രസൂര്യൈശ്ച കാംചനൈഃ ।
മംഗലൈഃ പക്ഷിസംഘൈശ്ച താരാഭിരഭിസംവൃതമ് ॥ 15 ॥
ധ്വജനിസ്ത്രിംശസംപന്നം കിംകിണീകവിരാജിതമ് ।
സദശ്വയുക്തം സോഽമര്ഷാദാരുരോഹ ഖരോ രഥമ് ॥ 16 ॥
നിശാമ്യ തു രഥസ്ഥം തം രാക്ഷസാ ഭീമവിക്രമാഃ ।
തസ്ഥുസ്സംപരിവാര്യൈനം ദൂഷണം ച മഹാബലമ് ॥ 17 ॥
ഖരസ്തു താന്മഹേഷ്വാസാന്ഘോരവര്മായുധധ്വജാന് ।
നിര്യാതേത്യബ്രവീദ്ദൃഷ്ട്വാ രഥസ്ഥസ്സർവരാക്ഷസാന് ॥ 18 ॥
തതസ്തദ് രാക്ഷസം സൈന്യം ഘോരചര്മായുധധ്വജമ് ।
നിര്ജഗാമ ജനസ്ഥാനാന്മഹാനാദം മഹാജവമ് ॥ 19 ॥
മുദ്ഗരൈഃ പട്ടിസൈശ്ശൂലൈസ്സുതീക്ഷ്ണൈശ്ച പരശ്വധൈഃ ।
ഖംഗൈശ്ചക്രൈശ്ച ഹസ്തസ്ഥൈര്ഭ്രാജമാനൈശ്ച തോമരൈഃ ॥ 20 ॥
ശക്തിഭിഃ പരിഘൈര്ഘോരൈരതിമാത്രൈശ്ച കാര്മുകൈഃ ।
ഗദാസിമുസലൈർവജ്രൈര്ഗൃഹീതൈര്ഭീമദര്ശനൈഃ ॥ 21 ॥
രാക്ഷസാനാം സുഘോരാണാം സഹസ്രാണി ചതുര്ദശ ।
നിര്യാതാനി ജനസ്ഥാനാത്ഖരചിത്താനുവര്തിനാമ് ॥ 22 ॥
താംസ്ത്വഭിദ്രവതോ ദൃഷ്ട്വാ രാക്ഷസാന് ഭീമവിക്രമാന് ।
ഖരസ്യാപി രഥഃ കിംചിജ്ജഗാമ തദനംതരമ് ॥ 23 ॥
തതസ്താംഛബലാനശ്വാസ്തപ്തകാംചനഭൂഷിതാന് ।
ഖരസ്യ മതിമാജ്ഞായ സാരഥിസ്സമചോദയത് ॥ 24 ॥
സ ചോദിതോ രഥശ്ശീഘ്രം ഖരസ്യ രിപുഘാതിനഃ ।
ശബ്ദേനാപൂരയാമാസ ദിശശ്ച പ്രദിശസ്തദാ ॥ 25 ॥
പ്രവൃദ്ധമന്യുസ്തു ഖരഃ ഖരസ്വനോ രിപോർവധാര്ഥം ത്വരിതോ യഥാംതകഃ ।
അചൂചുദത്സാരഥിമുന്നദന്ഘനം മഹാബലോ മേഘ ഇവാശ്മവര്ഷവാന് ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ദ്വാവിംശസ്സര്ഗഃ ॥
