śrīmadvālmīkīya rāmāyaṇē araṇyakāṇḍam ।
atha pañchāśassargaḥ ।
taṃ śabdamavasuptastu jaṭāyuratha śuśruvē ।
nirīkṣya rāvaṇaṃ kṣipraṃ vaidēhīṃ cha dadarśa saḥ ॥ 1 ॥
tataḥ parvatakūṭābhastīkṣṇatuṇḍaḥ khagōttamaḥ ।
vanaspatigataśśrīmānvyājahāra śubhāṃ giram ॥ 2 ॥
daśagrīva sthitō dharmē purāṇē satyasaṃśrayaḥ ।
jaṭāyurnāma nāmnāhaṃ gṛdhrarājō mahābalaḥ ॥ 3 ॥
rājā sarvasya lōkasya mahēndravaruṇōpamaḥ ।
lōkānāṃ cha hitē yuktō rāmō daśarathātmajaḥ ॥ 4 ॥
tasyaiṣā lōkanāthasya dharmapatnī yaśasvinī ।
sītā nāma varārōhā yāṃ tvaṃ hartumihēchChasi ॥ 5 ॥
kathaṃ rājāsthitō dharmē paradārānparāmṛśēt ।
rakṣaṇīyā viśēṣēṇa rājadārā mahābala ॥ 6 ॥
nivartaya matiṃ nīchāṃ paradārābhimarśanāt ।
na tatsamācharēddhīrō yatparō'sya vigarhayēt ॥ 7 ॥
yathātmanastathānyēṣāṃ dārā rakṣyā vipaśchitā ।
dharmamarthaṃ vā kāmaṃ vā śiṣṭāśśāstrēṣvanāgatam ॥ 8 ॥
vyavasyantyanu rājānaṃ dharmaṃ paulastyanandana ।
rājā dharmasya kāmasya dravyāṇāṃ chōttamō nidhiḥ ॥ 9 ॥
dharmaśśubhaṃ vā pāpaṃ vā rājamūlaṃ pravartatē ।
pāpasvabhāvaśchapalaḥ kathaṃ tvaṃ rakṣasāṃ vara ॥ 10 ॥
aiśvaryamabhisamprāptō vimānamiva duṣkṛtiḥ ।
kāmaṃ svabhāvō yō yasya na śakyaḥ parimārjitum ॥ 11 ॥
na hi duṣṭātmanāmāryamāvasatyālayē chiram ।
viṣayē vā purē vā tē yadā rāmō mahābalaḥ ॥ 12 ॥
nāparādhyati dharmātmā kathaṃ tasyāparādhyasi ।
yadi śūrpaṇakhāhētōrjanasthānagataḥ kharaḥ ॥ 13 ॥
ativṛttō hataḥ pūrvaṃ rāmēṇākliṣṭakarmaṇā ।
atra brūhi yathātattvaṃ kō rāmasya vyatikramaḥ ॥ 14 ॥
yasya tvaṃ lōkanāthasya bhāryāṃ hṛtvā gamiṣyasi ।
kṣipraṃ visṛja vaidēhīṃ mā tvā ghōrēṇa chakṣuṣā ॥ 15 ॥
dahēddahanabhūtēna vṛtramindrāśaniryathā ।
sarpamāśīviṣaṃ baddhvā vastrāntē nāvabudhyasē ॥ 16 ॥
grīvāyāṃ pratisaktaṃ cha kālapāśaṃ na paśyasi ।
sa bhārassaumya bhartavyō yō naraṃ nāvasādayēt ॥ 17 ॥
tadannamapi bhōktavyaṃ jīryatē yadanāmayam ।
yatkṛtvā na bhavēddharmō na kīrtirna yaśō bhuvi ॥ 18 ॥
śarīrasya bhavētkhēdaḥ kastatkarma samācharēt ।
ṣaṣṭirvarṣasahasrāṇi mama jātasya rāvaṇa ॥ 19 ॥
pitṛpaitāmahaṃ rājyaṃ yathāvadanutiṣṭhataḥ ।
vṛddhō'haṃ tvaṃ yuvā dhanvī saśaraḥ kavachī rathī ॥ 20 ॥
tathāpyādāya vaidēhīṃ kuśalī na gamiṣyasi ।
na śaktastvaṃ balāddhartuṃ vaidēhīṃ mama paśyataḥ ॥ 21 ॥
hētubhirnyāyasaṃsiddhaiddhṛvāṃ vēdaśrutīmiva ।
yuddhyasva yadi śūrō'si muhūrtaṃ tiṣṭha rāvaṇa ॥ 22 ॥
śayiṣyasē hatō bhūmau yathāpūrvaṃ kharastathā ।
asakṛtsaṃyugē yēna nihatā daityadānavāḥ ॥ 23 ॥
nachirāchchīravāsāstvāṃ rāmō yudhi vadhiṣyati ।
kiṃ nu śakyaṃ mayā kartuṃ gataudūraṃ nṛpātmajau ॥ 24 ॥
kṣipraṃ tvaṃ naśyasē nīcha tayōrbhītō na saṃśayaḥ ।
na hi mē jīvamānasya nayiṣyasi śubhāmimām ॥ 25 ॥
sītāṃ kamalapatrākṣīṃ rāmasya mahiṣīṃ priyām ।
avaśyaṃ tu mayā kāryaṃ priyaṃ tasya mahātmanaḥ ॥ 26 ॥
jīvitēnāpi rāmasya tathā daśarathasya cha ।
tiṣṭha tiṣṭha daśagrīva muhūrtaṃ paśya rāvaṇa ॥ 27 ॥
yuddhātithyaṃ pradāsyāmi yathāprāṇaṃ niśāchara ।
vṛntādiva phalaṃ tvāṃ tu pātayēyaṃ rathōttamāt ॥ 28 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē pañchāśassargaḥ ॥
