ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ପଂଚାଶସ୍ସର୍ଗଃ ।
ତଂ ଶବ୍ଦମଵସୁପ୍ତସ୍ତୁ ଜଟାୟୁରଥ ଶୁଶ୍ରୁଵେ ।
ନିରୀକ୍ଷ୍ୟ ରାଵଣଂ କ୍ଷିପ୍ରଂ ଵୈଦେହୀଂ ଚ ଦଦର୍ଶ ସଃ ॥ 1 ॥
ତତଃ ପର୍ଵତକୂଟାଭସ୍ତୀକ୍ଷ୍ଣତୁଂଡଃ ଖଗୋତ୍ତମଃ ।
ଵନସ୍ପତିଗତଶ୍ଶ୍ରୀମାନ୍ଵ୍ୟାଜହାର ଶୁଭାଂ ଗିରମ୍ ॥ 2 ॥
ଦଶଗ୍ରୀଵ ସ୍ଥିତୋ ଧର୍ମେ ପୁରାଣେ ସତ୍ୟସଂଶ୍ରୟଃ ।
ଜଟାୟୁର୍ନାମ ନାମ୍ନାହଂ ଗୃଧ୍ରରାଜୋ ମହାବଲଃ ॥ 3 ॥
ରାଜା ସର୍ଵସ୍ୟ ଲୋକସ୍ୟ ମହେଂଦ୍ରଵରୁଣୋପମଃ ।
ଲୋକାନାଂ ଚ ହିତେ ୟୁକ୍ତୋ ରାମୋ ଦଶରଥାତ୍ମଜଃ ॥ 4 ॥
ତସ୍ୟୈଷା ଲୋକନାଥସ୍ୟ ଧର୍ମପତ୍ନୀ ୟଶସ୍ଵିନୀ ।
ସୀତା ନାମ ଵରାରୋହା ୟାଂ ତ୍ଵଂ ହର୍ତୁମିହେଚ୍ଛସି ॥ 5 ॥
କଥଂ ରାଜାସ୍ଥିତୋ ଧର୍ମେ ପରଦାରାନ୍ପରାମୃଶେତ୍ ।
ରକ୍ଷଣୀୟା ଵିଶେଷେଣ ରାଜଦାରା ମହାବଲ ॥ 6 ॥
ନିଵର୍ତୟ ମତିଂ ନୀଚାଂ ପରଦାରାଭିମର୍ଶନାତ୍ ।
ନ ତତ୍ସମାଚରେଦ୍ଧୀରୋ ୟତ୍ପରୋଽସ୍ୟ ଵିଗର୍ହୟେତ୍ ॥ 7 ॥
ୟଥାତ୍ମନସ୍ତଥାନ୍ୟେଷାଂ ଦାରା ରକ୍ଷ୍ୟା ଵିପଶ୍ଚିତା ।
ଧର୍ମମର୍ଥଂ ଵା କାମଂ ଵା ଶିଷ୍ଟାଶ୍ଶାସ୍ତ୍ରେଷ୍ଵନାଗତମ୍ ॥ 8 ॥
ଵ୍ୟଵସ୍ୟଂତ୍ୟନୁ ରାଜାନଂ ଧର୍ମଂ ପୌଲସ୍ତ୍ୟନଂଦନ ।
ରାଜା ଧର୍ମସ୍ୟ କାମସ୍ୟ ଦ୍ରଵ୍ୟାଣାଂ ଚୋତ୍ତମୋ ନିଧିଃ ॥ 9 ॥
ଧର୍ମଶ୍ଶୁଭଂ ଵା ପାପଂ ଵା ରାଜମୂଲଂ ପ୍ରଵର୍ତତେ ।
ପାପସ୍ଵଭାଵଶ୍ଚପଲଃ କଥଂ ତ୍ଵଂ ରକ୍ଷସାଂ ଵର ॥ 10 ॥
ଐଶ୍ଵର୍ୟମଭିସଂପ୍ରାପ୍ତୋ ଵିମାନମିଵ ଦୁଷ୍କୃତିଃ ।
କାମଂ ସ୍ଵଭାଵୋ ୟୋ ୟସ୍ୟ ନ ଶକ୍ୟଃ ପରିମାର୍ଜିତୁମ୍ ॥ 11 ॥
ନ ହି ଦୁଷ୍ଟାତ୍ମନାମାର୍ୟମାଵସତ୍ୟାଲୟେ ଚିରମ୍ ।
ଵିଷୟେ ଵା ପୁରେ ଵା ତେ ୟଦା ରାମୋ ମହାବଲଃ ॥ 12 ॥
ନାପରାଧ୍ୟତି ଧର୍ମାତ୍ମା କଥଂ ତସ୍ୟାପରାଧ୍ୟସି ।
ୟଦି ଶୂର୍ପଣଖାହେତୋର୍ଜନସ୍ଥାନଗତଃ ଖରଃ ॥ 13 ॥
ଅତିଵୃତ୍ତୋ ହତଃ ପୂର୍ଵଂ ରାମେଣାକ୍ଲିଷ୍ଟକର୍ମଣା ।
ଅତ୍ର ବ୍ରୂହି ୟଥାତତ୍ତ୍ଵଂ କୋ ରାମସ୍ୟ ଵ୍ୟତିକ୍ରମଃ ॥ 14 ॥
ୟସ୍ୟ ତ୍ଵଂ ଲୋକନାଥସ୍ୟ ଭାର୍ୟାଂ ହୃତ୍ଵା ଗମିଷ୍ୟସି ।
କ୍ଷିପ୍ରଂ ଵିସୃଜ ଵୈଦେହୀଂ ମା ତ୍ଵା ଘୋରେଣ ଚକ୍ଷୁଷା ॥ 15 ॥
ଦହେଦ୍ଦହନଭୂତେନ ଵୃତ୍ରମିଂଦ୍ରାଶନିର୍ୟଥା ।
ସର୍ପମାଶୀଵିଷଂ ବଦ୍ଧ୍ଵା ଵସ୍ତ୍ରାଂତେ ନାଵବୁଧ୍ୟସେ ॥ 16 ॥
ଗ୍ରୀଵାୟାଂ ପ୍ରତିସକ୍ତଂ ଚ କାଲପାଶଂ ନ ପଶ୍ୟସି ।
ସ ଭାରସ୍ସୌମ୍ୟ ଭର୍ତଵ୍ୟୋ ୟୋ ନରଂ ନାଵସାଦୟେତ୍ ॥ 17 ॥
ତଦନ୍ନମପି ଭୋକ୍ତଵ୍ୟଂ ଜୀର୍ୟତେ ୟଦନାମୟମ୍ ।
ୟତ୍କୃତ୍ଵା ନ ଭଵେଦ୍ଧର୍ମୋ ନ କୀର୍ତିର୍ନ ୟଶୋ ଭୁଵି ॥ 18 ॥
ଶରୀରସ୍ୟ ଭଵେତ୍ଖେଦଃ କସ୍ତତ୍କର୍ମ ସମାଚରେତ୍ ।
ଷଷ୍ଟିର୍ଵର୍ଷସହସ୍ରାଣି ମମ ଜାତସ୍ୟ ରାଵଣ ॥ 19 ॥
ପିତୃପୈତାମହଂ ରାଜ୍ୟଂ ୟଥାଵଦନୁତିଷ୍ଠତଃ ।
ଵୃଦ୍ଧୋଽହଂ ତ୍ଵଂ ୟୁଵା ଧନ୍ଵୀ ସଶରଃ କଵଚୀ ରଥୀ ॥ 20 ॥
ତଥାପ୍ୟାଦାୟ ଵୈଦେହୀଂ କୁଶଲୀ ନ ଗମିଷ୍ୟସି ।
ନ ଶକ୍ତସ୍ତ୍ଵଂ ବଲାଦ୍ଧର୍ତୁଂ ଵୈଦେହୀଂ ମମ ପଶ୍ୟତଃ ॥ 21 ॥
ହେତୁଭିର୍ନ୍ୟାୟସଂସିଦ୍ଧୈଦ୍ଧୃଵାଂ ଵେଦଶ୍ରୁତୀମିଵ ।
ୟୁଦ୍ଧ୍ୟସ୍ଵ ୟଦି ଶୂରୋଽସି ମୁହୂର୍ତଂ ତିଷ୍ଠ ରାଵଣ ॥ 22 ॥
ଶୟିଷ୍ୟସେ ହତୋ ଭୂମୌ ୟଥାପୂର୍ଵଂ ଖରସ୍ତଥା ।
ଅସକୃତ୍ସଂୟୁଗେ ୟେନ ନିହତା ଦୈତ୍ୟଦାନଵାଃ ॥ 23 ॥
ନଚିରାଚ୍ଚୀରଵାସାସ୍ତ୍ଵାଂ ରାମୋ ୟୁଧି ଵଧିଷ୍ୟତି ।
କିଂ ନୁ ଶକ୍ୟଂ ମୟା କର୍ତୁଂ ଗତୌଦୂରଂ ନୃପାତ୍ମଜୌ ॥ 24 ॥
କ୍ଷିପ୍ରଂ ତ୍ଵଂ ନଶ୍ୟସେ ନୀଚ ତୟୋର୍ଭୀତୋ ନ ସଂଶୟଃ ।
ନ ହି ମେ ଜୀଵମାନସ୍ୟ ନୟିଷ୍ୟସି ଶୁଭାମିମାମ୍ ॥ 25 ॥
ସୀତାଂ କମଲପତ୍ରାକ୍ଷୀଂ ରାମସ୍ୟ ମହିଷୀଂ ପ୍ରିୟାମ୍ ।
ଅଵଶ୍ୟଂ ତୁ ମୟା କାର୍ୟଂ ପ୍ରିୟଂ ତସ୍ୟ ମହାତ୍ମନଃ ॥ 26 ॥
ଜୀଵିତେନାପି ରାମସ୍ୟ ତଥା ଦଶରଥସ୍ୟ ଚ ।
ତିଷ୍ଠ ତିଷ୍ଠ ଦଶଗ୍ରୀଵ ମୁହୂର୍ତଂ ପଶ୍ୟ ରାଵଣ ॥ 27 ॥
ୟୁଦ୍ଧାତିଥ୍ୟଂ ପ୍ରଦାସ୍ୟାମି ୟଥାପ୍ରାଣଂ ନିଶାଚର ।
ଵୃଂତାଦିଵ ଫଲଂ ତ୍ଵାଂ ତୁ ପାତୟେୟଂ ରଥୋତ୍ତମାତ୍ ॥ 28 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ପଂଚାଶସ୍ସର୍ଗଃ ॥
