ശ്രീമദ്വാല്മീകീയ രാമായണേ അരണ്യകാംഡമ് ।
അഥ പംചാശസ്സര്ഗഃ ।
തം ശബ്ദമവസുപ്തസ്തു ജടായുരഥ ശുശ്രുവേ ।
നിരീക്ഷ്യ രാവണം ക്ഷിപ്രം വൈദേഹീം ച ദദര്ശ സഃ ॥ 1 ॥
തതഃ പർവതകൂടാഭസ്തീക്ഷ്ണതുംഡഃ ഖഗോത്തമഃ ।
വനസ്പതിഗതശ്ശ്രീമാന്വ്യാജഹാര ശുഭാം ഗിരമ് ॥ 2 ॥
ദശഗ്രീവ സ്ഥിതോ ധര്മേ പുരാണേ സത്യസംശ്രയഃ ।
ജടായുര്നാമ നാമ്നാഹം ഗൃധ്രരാജോ മഹാബലഃ ॥ 3 ॥
രാജാ സർവസ്യ ലോകസ്യ മഹേംദ്രവരുണോപമഃ ।
ലോകാനാം ച ഹിതേ യുക്തോ രാമോ ദശരഥാത്മജഃ ॥ 4 ॥
തസ്യൈഷാ ലോകനാഥസ്യ ധര്മപത്നീ യശസ്വിനീ ।
സീതാ നാമ വരാരോഹാ യാം ത്വം ഹര്തുമിഹേച്ഛസി ॥ 5 ॥
കഥം രാജാസ്ഥിതോ ധര്മേ പരദാരാന്പരാമൃശേത് ।
രക്ഷണീയാ വിശേഷേണ രാജദാരാ മഹാബല ॥ 6 ॥
നിവര്തയ മതിം നീചാം പരദാരാഭിമര്ശനാത് ।
ന തത്സമാചരേദ്ധീരോ യത്പരോഽസ്യ വിഗര്ഹയേത് ॥ 7 ॥
യഥാത്മനസ്തഥാന്യേഷാം ദാരാ രക്ഷ്യാ വിപശ്ചിതാ ।
ധര്മമര്ഥം വാ കാമം വാ ശിഷ്ടാശ്ശാസ്ത്രേഷ്വനാഗതമ് ॥ 8 ॥
വ്യവസ്യംത്യനു രാജാനം ധര്മം പൌലസ്ത്യനംദന ।
രാജാ ധര്മസ്യ കാമസ്യ ദ്രവ്യാണാം ചോത്തമോ നിധിഃ ॥ 9 ॥
ധര്മശ്ശുഭം വാ പാപം വാ രാജമൂലം പ്രവര്തതേ ।
പാപസ്വഭാവശ്ചപലഃ കഥം ത്വം രക്ഷസാം വര ॥ 10 ॥
ഐശ്വര്യമഭിസംപ്രാപ്തോ വിമാനമിവ ദുഷ്കൃതിഃ ।
കാമം സ്വഭാവോ യോ യസ്യ ന ശക്യഃ പരിമാര്ജിതുമ് ॥ 11 ॥
ന ഹി ദുഷ്ടാത്മനാമാര്യമാവസത്യാലയേ ചിരമ് ।
വിഷയേ വാ പുരേ വാ തേ യദാ രാമോ മഹാബലഃ ॥ 12 ॥
നാപരാധ്യതി ധര്മാത്മാ കഥം തസ്യാപരാധ്യസി ।
യദി ശൂര്പണഖാഹേതോര്ജനസ്ഥാനഗതഃ ഖരഃ ॥ 13 ॥
അതിവൃത്തോ ഹതഃ പൂർവം രാമേണാക്ലിഷ്ടകര്മണാ ।
അത്ര ബ്രൂഹി യഥാതത്ത്വം കോ രാമസ്യ വ്യതിക്രമഃ ॥ 14 ॥
യസ്യ ത്വം ലോകനാഥസ്യ ഭാര്യാം ഹൃത്വാ ഗമിഷ്യസി ।
ക്ഷിപ്രം വിസൃജ വൈദേഹീം മാ ത്വാ ഘോരേണ ചക്ഷുഷാ ॥ 15 ॥
ദഹേദ്ദഹനഭൂതേന വൃത്രമിംദ്രാശനിര്യഥാ ।
സര്പമാശീവിഷം ബദ്ധ്വാ വസ്ത്രാംതേ നാവബുധ്യസേ ॥ 16 ॥
ഗ്രീവായാം പ്രതിസക്തം ച കാലപാശം ന പശ്യസി ।
സ ഭാരസ്സൌമ്യ ഭര്തവ്യോ യോ നരം നാവസാദയേത് ॥ 17 ॥
തദന്നമപി ഭോക്തവ്യം ജീര്യതേ യദനാമയമ് ।
യത്കൃത്വാ ന ഭവേദ്ധര്മോ ന കീര്തിര്ന യശോ ഭുവി ॥ 18 ॥
ശരീരസ്യ ഭവേത്ഖേദഃ കസ്തത്കര്മ സമാചരേത് ।
ഷഷ്ടിർവര്ഷസഹസ്രാണി മമ ജാതസ്യ രാവണ ॥ 19 ॥
പിതൃപൈതാമഹം രാജ്യം യഥാവദനുതിഷ്ഠതഃ ।
വൃദ്ധോഽഹം ത്വം യുവാ ധന്വീ സശരഃ കവചീ രഥീ ॥ 20 ॥
തഥാപ്യാദായ വൈദേഹീം കുശലീ ന ഗമിഷ്യസി ।
ന ശക്തസ്ത്വം ബലാദ്ധര്തും വൈദേഹീം മമ പശ്യതഃ ॥ 21 ॥
ഹേതുഭിര്ന്യായസംസിദ്ധൈദ്ധൃവാം വേദശ്രുതീമിവ ।
യുദ്ധ്യസ്വ യദി ശൂരോഽസി മുഹൂര്തം തിഷ്ഠ രാവണ ॥ 22 ॥
ശയിഷ്യസേ ഹതോ ഭൂമൌ യഥാപൂർവം ഖരസ്തഥാ ।
അസകൃത്സംയുഗേ യേന നിഹതാ ദൈത്യദാനവാഃ ॥ 23 ॥
നചിരാച്ചീരവാസാസ്ത്വാം രാമോ യുധി വധിഷ്യതി ।
കിം നു ശക്യം മയാ കര്തും ഗതൌദൂരം നൃപാത്മജൌ ॥ 24 ॥
ക്ഷിപ്രം ത്വം നശ്യസേ നീച തയോര്ഭീതോ ന സംശയഃ ।
ന ഹി മേ ജീവമാനസ്യ നയിഷ്യസി ശുഭാമിമാമ് ॥ 25 ॥
സീതാം കമലപത്രാക്ഷീം രാമസ്യ മഹിഷീം പ്രിയാമ് ।
അവശ്യം തു മയാ കാര്യം പ്രിയം തസ്യ മഹാത്മനഃ ॥ 26 ॥
ജീവിതേനാപി രാമസ്യ തഥാ ദശരഥസ്യ ച ।
തിഷ്ഠ തിഷ്ഠ ദശഗ്രീവ മുഹൂര്തം പശ്യ രാവണ ॥ 27 ॥
യുദ്ധാതിഥ്യം പ്രദാസ്യാമി യഥാപ്രാണം നിശാചര ।
വൃംതാദിവ ഫലം ത്വാം തു പാതയേയം രഥോത്തമാത് ॥ 28 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ പംചാശസ്സര്ഗഃ ॥
