ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഏകസപ്തതിതമസ്സര്ഗഃ ।
പുരാ രാമ മഹാബാഹോ മഹാബലപരാക്രമ ।
രൂപമാസീന്മമാ ചിംത്യം ത്രിഷു ലോകേഷു വിശ്രുതമ് ॥ 1 ॥
യഥാ സോമസ്യ ശക്രസ്യ സൂര്യസ്യ ച യഥാ വപുഃ ।
സോഽഹം രൂപമിദം കൃത്വാ ലോകവിത്രാസനം മഹത് ॥ 2 ॥
ഋഷീന്വനഗതാന്രാമ ത്രാസയാമി തതസ്തതഃ ।
തതസ്സ്ഥൂലശിരാ നാമ മഹര്ഷിഃ കോപിതോ മയാ ॥ 3 ॥
സംചിന്വന്വിവിധം വന്യം രൂപേണാനേന ധര്ഷിതഃ ।
തേനാഹമുക്തഃ പ്രേക്ഷ്യൈവം ഘോരശാപാഭിധായിനാ ॥ 4 ॥
ഏതദേവ നൃശംസം തേ രൂപമസ്തു വിഗര്ഹിതമ് ।
സ മയാ യാചിതഃ ക്രുദ്ധശ്ശാപസ്യോംതോ ഭവേദിതി ॥ 5 ॥
അഭിശാപകൃതസ്യേതി തേനേദം ഭാഷിതം വചഃ ।
യദാ ഛിത്ത്വാ ഭുജൌ രാമസ്ത്വാം ദഹേദ്വിജനേ വനേ ॥ 6 ॥
തദാ ത്വം പ്രാപ്സ്യസേ രൂപം സ്വമേവ വിപുലം ശുഭമ് ।
ശ്രിയാ വിരാജിതം പുത്രം ദനോസ്ത്വം വിദ്ധി ലക്ഷ്മണ ॥ 7 ॥
ഇംദ്രകോപാദിദം രൂപം പ്രാപ്തമേവം രണാജിരേ ।
അഹം ഹി തപസോഗ്രേണ പിതാമഹമതോഷയമ് ॥ 8 ॥
ദീര്ഘമായുസ്സ മേ പ്രാദാത്തതോ മാം വിഭ്രമോഽസ്പൃശത് ।
ദീര്ഘമായുര്മയാ പ്രാപ്തം കിം മേ ശക്രഃ കരിഷ്യതി ॥ 9 ॥
ഇത്യേവം ബുദ്ധിമാസ്ഥായ രണേ ശക്രമധര്ഷയമ് ।
തസ്യ ബാഹുപ്രയുക്തേന വജ്രേണ ശതപർവണാ ॥ 10 ॥
സക്ഥിനീ ചൈവ മൂര്ധാ ച ശരീരേ സംപ്രവേശിതമ് ।
സ മയാ യാച്യമാനസ്സന്നാനയദ്യമസാദനമ് ॥ 11 ॥
പിതാമഹവചസ്സത്യം തദസ്ത്വിതി മമാബ്രവീത് ।
അനാഹാരഃ കഥം ശക്തോ ഭഗ്നസക്ഥിശിരോമുഖഃ ॥ 12 ॥
വജ്രേണാഭിഹതഃ കാലം സുദീര്ഘമപി ജീവിതുമ് ।
ഏവമുക്തസ്തു മേ ശക്രോ ബാഹൂ യോജനമായതൌ ॥ 13 ॥
പ്രാദാദാസ്യം ച മേ കുക്ഷൌ തീക്ഷ്ണദംഷ്ട്രമകല്പയത് ।
സോഽഹം ഭുജാഭ്യാം ദീര്ഘാഭ്യാം സംകൃഷ്യാസ്മിന്വനേ ചരാന് ॥ 14 ॥
സിംഹവ്ദിപമൃഗവ്യാഘ്രാന് ഭക്ഷയാമി സമംതതഃ ।
സ തു മാമബ്രവീദിംദ്രോ യദാ രാമസ്സലക്ഷ്മണഃ ॥ 15 ॥
ഛേത്സ്യതേ സമരേ ബാഹൂ തദാ സ്വര്ഗം ഗമിഷ്യസി ।
അനേന വപുഷാ രാമ വനേഽസ്മിന്രാജസത്തമ ॥ 16 ॥
യദ്യത്പശ്യാമി സർവസ്യ ഗ്രഹണം സാധു രോചയേ ।
അവശ്യം ഗ്രഹണം രാമോ മന്യേഽഹം സമുപൈഷ്യതി ॥ 17 ॥
ഇമാം ബുദ്ധിം പുരസ്കൃത്യ ദേഹന്യാസകൃതശ്രമഃ ।
സ ത്വം രാമോഽസി ഭദ്രം തേ നാഹമന്യേന രാഘവ ॥ 18 ॥
ശക്യോ ഹംതും യഥാതത്ത്വമേവമുക്തം മഹര്ഷിണാ ।
അഹം ഹി മതിസാചിവ്യം കരിഷ്യാമി നരര്ഷഭ ॥ 19 ॥
മിത്രം ചൈവോപദേക്ഷ്യാമി യുവാഭ്യാം സംസ്കൃതോഽഗ്നിനാ ।
ഏവമുക്തസ്തു ധര്മാത്മാ ദനുനാ തേന രാഘവഃ ॥ 20 ॥
ഇദം ജഗാദ വചനം ലക്ഷ്മണസ്യോപശൃണ്വതഃ ।
രാവണേന ഹൃതാ ഭാര്യാ മമ സീതാ യശസ്സ്വിനീ ॥ 21 ॥
നിഷ്ക്രാംതസ്യ ജനസ്ഥാനാത്സഹഭ്രാത്രാ യഥാസുഖമ് ।
നാമമാത്രം തു ജാനാമി ന രൂപം തസ്യ രക്ഷസഃ ॥ 22 ॥
നിവാസം വാ പ്രഭാവം വാ വയം തസ്യ ന വിദ്മഹേ ।
ശോകാര്താനാമനാഥാനാമേവം വിപരിധാവതാമ് ॥ 23 ॥
കാരുണ്യം സദൃശം കര്തുമുപകാരേ ച വര്തതാമ് ।
കാഷ്ഠാന്യാദായ ശുഷ്കാണി കാലേ ഭഗ്നാനി കുംജരൈഃ ॥ 24 ॥
ധക്ഷ്യാമസ്ത്വാം വയം വീര ശ്വഭ്രേ മഹതി കല്പിതേ ।
സ ത്വം സീതാം സമാചക്ഷ്വ യേന വാ യത്ര വാ ഹൃതാ ॥ 25 ॥
കുരു കല്യാണമത്യര്ഥം യദി ജാനാസി തത്ത്വതഃ ।
ഏവമുക്തസ്തു രാമേണ വാക്യം ദനുരനുത്തമമ് ॥ 26 ॥
പ്രോവാച കുശലോ വക്തും വക്താരമപി രാഘവമ് ।
ദിവ്യമസ്തി ന മേ ജ്ഞാനം നാഭിജാനാമി മൈഥിലീമ് ॥ 27 ॥
യസ്താം ജ്ഞാസ്യതി തം വക്ഷ്യേ ദഗ്ധസ്സ്വം രൂപമാസ്ഥിതഃ ।
അദഗ്ധസ്യ തു വിജ്ഞാതും ശക്തിരസ്തി ന മേ പ്രഭോ ॥ 28 ॥
രാക്ഷസം തം മഹാവീര്യം സീതാ യേന ഹൃതാ തവ ।
വിജ്ഞാനം ഹി മമ ഭ്രഷ്ടം ശാപദോഷേണ രാഘവ ॥ 29 ॥
സ്വകൃതേന മയാ പ്രാപ്തം രൂപം ലോകവിഗര്ഹിതമ് ।
കിം തു യാവന്ന യാത്യസ്തം സവിതാ ശ്രാംതവാഹനഃ ॥ 30 ॥
താവന്മാമവടേ ക്ഷിപ്ത്വാ ദഹ രാമ യഥാവിധി ।
ദഗ്ധസ്ത്വയാഹമവടേ ന്യായേന രഘുനംധന ॥ 31 ॥
വക്ഷ്യാമി തമഹം വീര യസ്തം ജ്ഞാസ്യതി രാക്ഷസമ് ।
തേന സഖ്യം ച കര്തവ്യം ന്യായ്യവൃത്തേന രാഘവ ॥ 32 ॥
കല്പയിഷ്യതി തേ പ്രീതസ്സാഹായ്യം ലഘുവിക്രമഃ ।
ന ഹി തസ്യാസ്ത്യവിജ്ഞാതം ത്രിഷു ലേകേഷു രാഘവ ॥ 33 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഏകസപ്തതിതമസ്സര്ഗഃ ॥
