śrīmadvālmīkīya rāmāyaṇē kiṣkindhākāṇḍam ।
atha dvipañchāśassargaḥ ।
atha tānabravītsarvānviśrāntānhariyūthapān ।
idaṃ vachanamēkāgrā tāpasī dharmachāriṇī ॥ 1 ॥
vānarā yadi vaḥ khēdaḥ pranaṣṭaḥ phalabhakṣaṇāt ।
yadi chaitanmayā śrāvyaṃ śrōtumichChāmi kathyatām ॥ 2 ॥
tasyāstadvachanaṃ śrutvā hanūmānmārutātmajaḥ ।
ārjavēna yathātattvamākhyātumupachakramē ॥ 3 ॥
rājā sarvasya lōkasya mahēndravaruṇōpamaḥ ।
rāmō dāśarathiśśīmānpraviṣṭō daṇḍakāvanam ॥ 4 ॥
lakṣmaṇēna saha bhrātrā vaidēhyā chāpi bhāryayā ।
tasya bhāryā janasthānādrāvaṇēna hṛtā balāt ॥ 5 ॥
vīrastasya sakhā rājñassugrīvō nāma vānaraḥ ।
rājā vānaramukhyānāṃ yēna prasthāpitā vayam ॥ 6 ॥
agastyacharitāmāśāṃ dakṣiṇāṃ yamarakṣitām ।
sahaibhirvānarairghōrairaṅgadapramukhairvayam ॥ 7 ॥
rāvaṇaṃ sahitāssarvē rākṣasaṃ kāmarūpiṇam ।
sītayā saha vaidēhyā mārgadhvamiti chōditāḥ ॥ 8 ॥
vichitya tu vayaṃ sarvē samagrāṃ dakṣiṇāṃ diśam ।
paritrāntā bubhukṣitā vṛkṣamūlamupāśritāḥ ॥ 9 ॥
vivarṇavadanāssarvē sarvē dhyānaparāyaṇāḥ ।
nādhigachChāmahē pāraṃ magnāśchintāmahārṇavē ॥ 10 ॥
chārayantastataśchakṣurdṛṣṭavantō vayaṃ bilam ।
latāpādapasañchChannaṃ timirēṇa samāvṛtam ॥ 11 ॥
asmāddhaṃsā jalaklinnāḥ pakṣaissalilavisravaiḥ ।
kurarāssārasāśchaiva niṣpatanti patatriṇaḥ ॥ 12 ॥
sādhvatra praviśāmēti mayā tūktāḥ plavaṅgamāḥ ।
tēṣāmapi hi sarvēṣāmanumānamupāgatam ॥ 13 ॥
gachChāma praviśāmēti bhartṛkāryatvarānvitāḥ ।
tatō gāḍhaṃ nipatitā gṛhya hastau parasparam ॥ 14 ॥
idaṃ praviṣṭāssahasā bilaṃ timirasaṃvṛtam ।
ētannaḥ kāryamētēna kṛtyēna vayamāgatāḥ ॥ 15 ॥
tvāṃ chaivōpagatāssarvē paridyūnā bubhukṣitāḥ ।
ātithyadharmadattāni mūlāni cha phalāni cha ॥ 16 ॥
asmābhirupabhuktāni bubhukṣāparipīḍitaiḥ ।
yattvayā rakṣitāssarvē mriyamāṇā bubhukṣayā ॥ 17 ॥
brūhi pratyupakārārthaṃ kiṃ tē kurvantu vānarāḥ ।
ēvamuktā tu dharmajñairvānaraistaissvayamprabhā ॥ 18 ॥
pratyuvācha tatassarvānidaṃ vānarapuṅgavān ।
sarvēṣāṃ parituṣṭā'smi vānarāṇāṃ tarasvinām ॥ 19 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē dvipañchāśassargaḥ ॥
