ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ദ്വിപംചാശസ്സര്ഗഃ ।
അഥ താനബ്രവീത്സർവാന്വിശ്രാംതാന്ഹരിയൂഥപാന് ।
ഇദം വചനമേകാഗ്രാ താപസീ ധര്മചാരിണീ ॥ 1 ॥
വാനരാ യദി വഃ ഖേദഃ പ്രനഷ്ടഃ ഫലഭക്ഷണാത് ।
യദി ചൈതന്മയാ ശ്രാവ്യം ശ്രോതുമിച്ഛാമി കഥ്യതാമ് ॥ 2 ॥
തസ്യാസ്തദ്വചനം ശ്രുത്വാ ഹനൂമാന്മാരുതാത്മജഃ ।
ആര്ജവേന യഥാതത്ത്വമാഖ്യാതുമുപചക്രമേ ॥ 3 ॥
രാജാ സർവസ്യ ലോകസ്യ മഹേംദ്രവരുണോപമഃ ।
രാമോ ദാശരഥിശ്ശീമാന്പ്രവിഷ്ടോ ദംഡകാവനമ് ॥ 4 ॥
ലക്ഷ്മണേന സഹ ഭ്രാത്രാ വൈദേഹ്യാ ചാപി ഭാര്യയാ ।
തസ്യ ഭാര്യാ ജനസ്ഥാനാദ്രാവണേന ഹൃതാ ബലാത് ॥ 5 ॥
വീരസ്തസ്യ സഖാ രാജ്ഞസ്സുഗ്രീവോ നാമ വാനരഃ ।
രാജാ വാനരമുഖ്യാനാം യേന പ്രസ്ഥാപിതാ വയമ് ॥ 6 ॥
അഗസ്ത്യചരിതാമാശാം ദക്ഷിണാം യമരക്ഷിതാമ് ।
സഹൈഭിർവാനരൈര്ഘോരൈരംഗദപ്രമുഖൈർവയമ് ॥ 7 ॥
രാവണം സഹിതാസ്സർവേ രാക്ഷസം കാമരൂപിണമ് ।
സീതയാ സഹ വൈദേഹ്യാ മാര്ഗധ്വമിതി ചോദിതാഃ ॥ 8 ॥
വിചിത്യ തു വയം സർവേ സമഗ്രാം ദക്ഷിണാം ദിശമ് ।
പരിത്രാംതാ ബുഭുക്ഷിതാ വൃക്ഷമൂലമുപാശ്രിതാഃ ॥ 9 ॥
വിവര്ണവദനാസ്സർവേ സർവേ ധ്യാനപരായണാഃ ।
നാധിഗച്ഛാമഹേ പാരം മഗ്നാശ്ചിംതാമഹാര്ണവേ ॥ 10 ॥
ചാരയംതസ്തതശ്ചക്ഷുര്ദൃഷ്ടവംതോ വയം ബിലമ് ।
ലതാപാദപസംച്ഛന്നം തിമിരേണ സമാവൃതമ് ॥ 11 ॥
അസ്മാദ്ധംസാ ജലക്ലിന്നാഃ പക്ഷൈസ്സലിലവിസ്രവൈഃ ।
കുരരാസ്സാരസാശ്ചൈവ നിഷ്പതംതി പതത്രിണഃ ॥ 12 ॥
സാധ്വത്ര പ്രവിശാമേതി മയാ തൂക്താഃ പ്ലവംഗമാഃ ।
തേഷാമപി ഹി സർവേഷാമനുമാനമുപാഗതമ് ॥ 13 ॥
ഗച്ഛാമ പ്രവിശാമേതി ഭര്തൃകാര്യത്വരാന്വിതാഃ ।
തതോ ഗാഢം നിപതിതാ ഗൃഹ്യ ഹസ്തൌ പരസ്പരമ് ॥ 14 ॥
ഇദം പ്രവിഷ്ടാസ്സഹസാ ബിലം തിമിരസംവൃതമ് ।
ഏതന്നഃ കാര്യമേതേന കൃത്യേന വയമാഗതാഃ ॥ 15 ॥
ത്വാം ചൈവോപഗതാസ്സർവേ പരിദ്യൂനാ ബുഭുക്ഷിതാഃ ।
ആതിഥ്യധര്മദത്താനി മൂലാനി ച ഫലാനി ച ॥ 16 ॥
അസ്മാഭിരുപഭുക്താനി ബുഭുക്ഷാപരിപീഡിതൈഃ ।
യത്ത്വയാ രക്ഷിതാസ്സർവേ മ്രിയമാണാ ബുഭുക്ഷയാ ॥ 17 ॥
ബ്രൂഹി പ്രത്യുപകാരാര്ഥം കിം തേ കുർവംതു വാനരാഃ ।
ഏവമുക്താ തു ധര്മജ്ഞൈർവാനരൈസ്തൈസ്സ്വയംപ്രഭാ ॥ 18 ॥
പ്രത്യുവാച തതസ്സർവാനിദം വാനരപുംഗവാന് ।
സർവേഷാം പരിതുഷ്ടാഽസ്മി വാനരാണാം തരസ്വിനാമ് ॥ 19 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ദ്വിപംചാശസ്സര്ഗഃ ॥
