શ્રીમદ્વાલ્મીકીય રામાયણે કિષ્કિંધાકાંડમ્ ।
અથ દ્વિપંચાશસ્સર્ગઃ ।
અથ તાનબ્રવીત્સર્વાન્વિશ્રાંતાન્હરિયૂથપાન્ ।
ઇદં વચનમેકાગ્રા તાપસી ધર્મચારિણી ॥ 1 ॥
વાનરા યદિ વઃ ખેદઃ પ્રનષ્ટઃ ફલભક્ષણાત્ ।
યદિ ચૈતન્મયા શ્રાવ્યં શ્રોતુમિચ્છામિ કથ્યતામ્ ॥ 2 ॥
તસ્યાસ્તદ્વચનં શ્રુત્વા હનૂમાન્મારુતાત્મજઃ ।
આર્જવેન યથાતત્ત્વમાખ્યાતુમુપચક્રમે ॥ 3 ॥
રાજા સર્વસ્ય લોકસ્ય મહેંદ્રવરુણોપમઃ ।
રામો દાશરથિશ્શીમાન્પ્રવિષ્ટો દંડકાવનમ્ ॥ 4 ॥
લક્ષ્મણેન સહ ભ્રાત્રા વૈદેહ્યા ચાપિ ભાર્યયા ।
તસ્ય ભાર્યા જનસ્થાનાદ્રાવણેન હૃતા બલાત્ ॥ 5 ॥
વીરસ્તસ્ય સખા રાજ્ઞસ્સુગ્રીવો નામ વાનરઃ ।
રાજા વાનરમુખ્યાનાં યેન પ્રસ્થાપિતા વયમ્ ॥ 6 ॥
અગસ્ત્યચરિતામાશાં દક્ષિણાં યમરક્ષિતામ્ ।
સહૈભિર્વાનરૈર્ઘોરૈરંગદપ્રમુખૈર્વયમ્ ॥ 7 ॥
રાવણં સહિતાસ્સર્વે રાક્ષસં કામરૂપિણમ્ ।
સીતયા સહ વૈદેહ્યા માર્ગધ્વમિતિ ચોદિતાઃ ॥ 8 ॥
વિચિત્ય તુ વયં સર્વે સમગ્રાં દક્ષિણાં દિશમ્ ।
પરિત્રાંતા બુભુક્ષિતા વૃક્ષમૂલમુપાશ્રિતાઃ ॥ 9 ॥
વિવર્ણવદનાસ્સર્વે સર્વે ધ્યાનપરાયણાઃ ।
નાધિગચ્છામહે પારં મગ્નાશ્ચિંતામહાર્ણવે ॥ 10 ॥
ચારયંતસ્તતશ્ચક્ષુર્દૃષ્ટવંતો વયં બિલમ્ ।
લતાપાદપસંચ્છન્નં તિમિરેણ સમાવૃતમ્ ॥ 11 ॥
અસ્માદ્ધંસા જલક્લિન્નાઃ પક્ષૈસ્સલિલવિસ્રવૈઃ ।
કુરરાસ્સારસાશ્ચૈવ નિષ્પતંતિ પતત્રિણઃ ॥ 12 ॥
સાધ્વત્ર પ્રવિશામેતિ મયા તૂક્તાઃ પ્લવંગમાઃ ।
તેષામપિ હિ સર્વેષામનુમાનમુપાગતમ્ ॥ 13 ॥
ગચ્છામ પ્રવિશામેતિ ભર્તૃકાર્યત્વરાન્વિતાઃ ।
તતો ગાઢં નિપતિતા ગૃહ્ય હસ્તૌ પરસ્પરમ્ ॥ 14 ॥
ઇદં પ્રવિષ્ટાસ્સહસા બિલં તિમિરસંવૃતમ્ ।
એતન્નઃ કાર્યમેતેન કૃત્યેન વયમાગતાઃ ॥ 15 ॥
ત્વાં ચૈવોપગતાસ્સર્વે પરિદ્યૂના બુભુક્ષિતાઃ ।
આતિથ્યધર્મદત્તાનિ મૂલાનિ ચ ફલાનિ ચ ॥ 16 ॥
અસ્માભિરુપભુક્તાનિ બુભુક્ષાપરિપીડિતૈઃ ।
યત્ત્વયા રક્ષિતાસ્સર્વે મ્રિયમાણા બુભુક્ષયા ॥ 17 ॥
બ્રૂહિ પ્રત્યુપકારાર્થં કિં તે કુર્વંતુ વાનરાઃ ।
એવમુક્તા તુ ધર્મજ્ઞૈર્વાનરૈસ્તૈસ્સ્વયંપ્રભા ॥ 18 ॥
પ્રત્યુવાચ તતસ્સર્વાનિદં વાનરપુંગવાન્ ।
સર્વેષાં પરિતુષ્ટાઽસ્મિ વાનરાણાં તરસ્વિનામ્ ॥ 19 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે દ્વિપંચાશસ્સર્ગઃ ॥
