ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଦ୍ଵିପଂଚାଶସ୍ସର୍ଗଃ ।
ଅଥ ତାନବ୍ରଵୀତ୍ସର୍ଵାନ୍ଵିଶ୍ରାଂତାନ୍ହରିୟୂଥପାନ୍ ।
ଇଦଂ ଵଚନମେକାଗ୍ରା ତାପସୀ ଧର୍ମଚାରିଣୀ ॥ 1 ॥
ଵାନରା ୟଦି ଵଃ ଖେଦଃ ପ୍ରନଷ୍ଟଃ ଫଲଭକ୍ଷଣାତ୍ ।
ୟଦି ଚୈତନ୍ମୟା ଶ୍ରାଵ୍ୟଂ ଶ୍ରୋତୁମିଚ୍ଛାମି କଥ୍ୟତାମ୍ ॥ 2 ॥
ତସ୍ୟାସ୍ତଦ୍ଵଚନଂ ଶ୍ରୁତ୍ଵା ହନୂମାନ୍ମାରୁତାତ୍ମଜଃ ।
ଆର୍ଜଵେନ ୟଥାତତ୍ତ୍ଵମାଖ୍ୟାତୁମୁପଚକ୍ରମେ ॥ 3 ॥
ରାଜା ସର୍ଵସ୍ୟ ଲୋକସ୍ୟ ମହେଂଦ୍ରଵରୁଣୋପମଃ ।
ରାମୋ ଦାଶରଥିଶ୍ଶୀମାନ୍ପ୍ରଵିଷ୍ଟୋ ଦଂଡକାଵନମ୍ ॥ 4 ॥
ଲକ୍ଷ୍ମଣେନ ସହ ଭ୍ରାତ୍ରା ଵୈଦେହ୍ୟା ଚାପି ଭାର୍ୟୟା ।
ତସ୍ୟ ଭାର୍ୟା ଜନସ୍ଥାନାଦ୍ରାଵଣେନ ହୃତା ବଲାତ୍ ॥ 5 ॥
ଵୀରସ୍ତସ୍ୟ ସଖା ରାଜ୍ଞସ୍ସୁଗ୍ରୀଵୋ ନାମ ଵାନରଃ ।
ରାଜା ଵାନରମୁଖ୍ୟାନାଂ ୟେନ ପ୍ରସ୍ଥାପିତା ଵୟମ୍ ॥ 6 ॥
ଅଗସ୍ତ୍ୟଚରିତାମାଶାଂ ଦକ୍ଷିଣାଂ ୟମରକ୍ଷିତାମ୍ ।
ସହୈଭିର୍ଵାନରୈର୍ଘୋରୈରଂଗଦପ୍ରମୁଖୈର୍ଵୟମ୍ ॥ 7 ॥
ରାଵଣଂ ସହିତାସ୍ସର୍ଵେ ରାକ୍ଷସଂ କାମରୂପିଣମ୍ ।
ସୀତୟା ସହ ଵୈଦେହ୍ୟା ମାର୍ଗଧ୍ଵମିତି ଚୋଦିତାଃ ॥ 8 ॥
ଵିଚିତ୍ୟ ତୁ ଵୟଂ ସର୍ଵେ ସମଗ୍ରାଂ ଦକ୍ଷିଣାଂ ଦିଶମ୍ ।
ପରିତ୍ରାଂତା ବୁଭୁକ୍ଷିତା ଵୃକ୍ଷମୂଲମୁପାଶ୍ରିତାଃ ॥ 9 ॥
ଵିଵର୍ଣଵଦନାସ୍ସର୍ଵେ ସର୍ଵେ ଧ୍ୟାନପରାୟଣାଃ ।
ନାଧିଗଚ୍ଛାମହେ ପାରଂ ମଗ୍ନାଶ୍ଚିଂତାମହାର୍ଣଵେ ॥ 10 ॥
ଚାରୟଂତସ୍ତତଶ୍ଚକ୍ଷୁର୍ଦୃଷ୍ଟଵଂତୋ ଵୟଂ ବିଲମ୍ ।
ଲତାପାଦପସଂଚ୍ଛନ୍ନଂ ତିମିରେଣ ସମାଵୃତମ୍ ॥ 11 ॥
ଅସ୍ମାଦ୍ଧଂସା ଜଲକ୍ଲିନ୍ନାଃ ପକ୍ଷୈସ୍ସଲିଲଵିସ୍ରଵୈଃ ।
କୁରରାସ୍ସାରସାଶ୍ଚୈଵ ନିଷ୍ପତଂତି ପତତ୍ରିଣଃ ॥ 12 ॥
ସାଧ୍ଵତ୍ର ପ୍ରଵିଶାମେତି ମୟା ତୂକ୍ତାଃ ପ୍ଲଵଂଗମାଃ ।
ତେଷାମପି ହି ସର୍ଵେଷାମନୁମାନମୁପାଗତମ୍ ॥ 13 ॥
ଗଚ୍ଛାମ ପ୍ରଵିଶାମେତି ଭର୍ତୃକାର୍ୟତ୍ଵରାନ୍ଵିତାଃ ।
ତତୋ ଗାଢଂ ନିପତିତା ଗୃହ୍ୟ ହସ୍ତୌ ପରସ୍ପରମ୍ ॥ 14 ॥
ଇଦଂ ପ୍ରଵିଷ୍ଟାସ୍ସହସା ବିଲଂ ତିମିରସଂଵୃତମ୍ ।
ଏତନ୍ନଃ କାର୍ୟମେତେନ କୃତ୍ୟେନ ଵୟମାଗତାଃ ॥ 15 ॥
ତ୍ଵାଂ ଚୈଵୋପଗତାସ୍ସର୍ଵେ ପରିଦ୍ୟୂନା ବୁଭୁକ୍ଷିତାଃ ।
ଆତିଥ୍ୟଧର୍ମଦତ୍ତାନି ମୂଲାନି ଚ ଫଲାନି ଚ ॥ 16 ॥
ଅସ୍ମାଭିରୁପଭୁକ୍ତାନି ବୁଭୁକ୍ଷାପରିପୀଡିତୈଃ ।
ୟତ୍ତ୍ଵୟା ରକ୍ଷିତାସ୍ସର୍ଵେ ମ୍ରିୟମାଣା ବୁଭୁକ୍ଷୟା ॥ 17 ॥
ବ୍ରୂହି ପ୍ରତ୍ୟୁପକାରାର୍ଥଂ କିଂ ତେ କୁର୍ଵଂତୁ ଵାନରାଃ ।
ଏଵମୁକ୍ତା ତୁ ଧର୍ମଜ୍ଞୈର୍ଵାନରୈସ୍ତୈସ୍ସ୍ଵୟଂପ୍ରଭା ॥ 18 ॥
ପ୍ରତ୍ୟୁଵାଚ ତତସ୍ସର୍ଵାନିଦଂ ଵାନରପୁଂଗଵାନ୍ ।
ସର୍ଵେଷାଂ ପରିତୁଷ୍ଟାଽସ୍ମି ଵାନରାଣାଂ ତରସ୍ଵିନାମ୍ ॥ 19 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଦ୍ଵିପଂଚାଶସ୍ସର୍ଗଃ ॥
