śrīmadvālmīkīya rāmāyaṇē kiṣkindhākāṇḍam ।
atha saptamassargaḥ ।
ēvamuktastu sugrīvō rāmēṇārtēna vānaraḥ ।
abravītprāñjalirvākyaṃ sabāṣpaṃ bāṣpagadgadaḥ ॥ 1 ॥
na jānē nilayaṃ tasya sarvathā pāparakṣasaḥ ।
sāmarthyaṃ vikramaṃ vāpi dauṣkulēyasya vā kulam ॥ 2 ॥
satyaṃ tē pratijānāmi tyaja śōkamarindama ।
kariṣyāmi tathā yatnaṃ yathā prāpsyasi maithilīm ॥ 3 ॥
rāvaṇaṃ sagaṇaṃ hatvā paritōṣyātmapauruṣam ।
tathā'smi kartā na chirādyathā prītō bhaviṣyasi ॥ 4 ॥
alaṃ vaiklabyamālambya dhairyamātmagataṃ smara ।
tvadvidhānāṃ na sadṛśamīdṛśaṃ buddhilāghavam ॥ 5 ॥
mayā'pi vyasanaṃ prāptaṃ bhāryāvirahajaṃ mahat ।
nāhamēvaṃ hi śōchāmi na cha dhairyaṃ parityajē ॥ 6 ॥
nāhaṃ tāmanuśōchāmi prākṛtō vānarō'pi san ।
mahātmā cha vinītaścha kiṃ punardhṛtimānbhavān ॥ 7 ॥
bāṣpamāpatitaṃ dhairyānnigrahītuṃ tvamarhasi ।
maryādāṃ sattvayuktānāṃ dhṛtiṃ nōtsraṣṭumarhasi ॥ 8 ॥
vyasanē vā'rthakṛchChrē vā bhayē vā jīvitāntakē ।
vimṛśanvai svayā buddhyā dhṛtimānnāvasīdati ॥ 9 ॥
bāliśastu narō nityaṃ vaiklabyaṃ yō'nuvartatē ।
sa majjatyavaśaśśōkē bhārākrāntēva naurjalē ॥ 10 ॥
ēṣō'ñjalirmayā baddhaḥ praṇayāttvāṃ prasādayē ।
pauruṣaṃ śraya śōkasya nāntaraṃ dātumarhasi ॥ 11 ॥
yē śōkamanuvartantē na tēṣāṃ vidyatē sukham ।
tējaścha kṣīyatē tēṣāṃ na tvaṃ śōchitumarhasi ॥ 12 ॥
śōkēnābhiprapannasya jīvitē chāpi saṃśayaḥ ।
sa śōkaṃ tyaja rājēndra dhairyamāśraya kēvalam ॥ 13 ॥
hitaṃ vayasyabhāvēna brūmi nōpadiśāmi tē ।
vayasyatāṃ pūjayanmē na tvaṃ śōchitumarhasi ॥ 14 ॥
madhuraṃ sāntvita stēna sugrīvēṇa sa rāghavaḥ ।
mukhamaśrupariklinnaṃ vastrāntēna pramārjayat ॥ 15 ॥
prakṛtisthastu kākutsthassugrīvavachanātprabhuḥ ।
sampariṣvajya sugrīvamidaṃ vachanamabravīt ॥ 16 ॥
kartavyaṃ yadvayasyēna snigdhēna cha hitēna cha ।
anurūpaṃ cha yuktaṃ cha kṛtaṃ sugrīva tattvayā ॥ 17 ॥
ēṣa cha prakṛtisthō'hamanunītastvayā sakhē ।
durlabhō hīdṛśō bandhurasminkālē viśēṣataḥ ॥ 18 ॥
kiṃ tu yatnastvayā kāryō maithilyāḥ parimārgaṇē ।
rākṣasasya cha raudrasya rāvaṇasya durātmanaḥ ॥ 19 ॥
mayā cha yadanuṣṭhēyaṃ visrabdhēna taduchyatām ।
varṣāsviva cha sukṣētrē sarvaṃ sampadyatē tava ॥ 20 ॥
mayā cha yadidaṃ vākyamabhimānātsamīritam ।
tattvayā hariśārdūla tattvamityupadhāryatām ॥ 21 ॥
anṛtaṃ nōktapūrvaṃ mē na cha vakṣyē kadāchana ।
ētattē pratijānāmi satyēnaiva cha tē śapāmyahamam ॥ 22 ॥
tataḥ prahṛṣṭassugrīvō vānaraissachivaissaha ।
rāghavasya vachaśśrutvā pratijñātaṃ viśēṣataḥ ॥ 23 ॥
ēvamēkāntasampṛktau tatastau naravānarau ।
ubhāvanyōnyasadṛśaṃ sukhaṃ duḥkhamabhāṣatām ॥ 24 ॥
mahānubhāvasya vachō niśamya harirnṛpāṇāmṛṣabhasya tasya ।
kṛtaṃ sa mēnē harivīramukhya stadā svakāryaṃ hṛdayēna vidvān ॥ 25 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē saptamassargaḥ ॥
