ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ସପ୍ତମସ୍ସର୍ଗଃ ।
ଏଵମୁକ୍ତସ୍ତୁ ସୁଗ୍ରୀଵୋ ରାମେଣାର୍ତେନ ଵାନରଃ ।
ଅବ୍ରଵୀତ୍ପ୍ରାଂଜଲିର୍ଵାକ୍ୟଂ ସବାଷ୍ପଂ ବାଷ୍ପଗଦ୍ଗଦଃ ॥ 1 ॥
ନ ଜାନେ ନିଲୟଂ ତସ୍ୟ ସର୍ଵଥା ପାପରକ୍ଷସଃ ।
ସାମର୍ଥ୍ୟଂ ଵିକ୍ରମଂ ଵାପି ଦୌଷ୍କୁଲେୟସ୍ୟ ଵା କୁଲମ୍ ॥ 2 ॥
ସତ୍ୟଂ ତେ ପ୍ରତିଜାନାମି ତ୍ୟଜ ଶୋକମରିଂଦମ ।
କରିଷ୍ୟାମି ତଥା ୟତ୍ନଂ ୟଥା ପ୍ରାପ୍ସ୍ୟସି ମୈଥିଲୀମ୍ ॥ 3 ॥
ରାଵଣଂ ସଗଣଂ ହତ୍ଵା ପରିତୋଷ୍ୟାତ୍ମପୌରୁଷମ୍ ।
ତଥାଽସ୍ମି କର୍ତା ନ ଚିରାଦ୍ୟଥା ପ୍ରୀତୋ ଭଵିଷ୍ୟସି ॥ 4 ॥
ଅଲଂ ଵୈକ୍ଲବ୍ୟମାଲଂବ୍ୟ ଧୈର୍ୟମାତ୍ମଗତଂ ସ୍ମର ।
ତ୍ଵଦ୍ଵିଧାନାଂ ନ ସଦୃଶମୀଦୃଶଂ ବୁଦ୍ଧିଲାଘଵମ୍ ॥ 5 ॥
ମୟାଽପି ଵ୍ୟସନଂ ପ୍ରାପ୍ତଂ ଭାର୍ୟାଵିରହଜଂ ମହତ୍ ।
ନାହମେଵଂ ହି ଶୋଚାମି ନ ଚ ଧୈର୍ୟଂ ପରିତ୍ୟଜେ ॥ 6 ॥
ନାହଂ ତାମନୁଶୋଚାମି ପ୍ରାକୃତୋ ଵାନରୋଽପି ସନ୍ ।
ମହାତ୍ମା ଚ ଵିନୀତଶ୍ଚ କିଂ ପୁନର୍ଧୃତିମାନ୍ଭଵାନ୍ ॥ 7 ॥
ବାଷ୍ପମାପତିତଂ ଧୈର୍ୟାନ୍ନିଗ୍ରହୀତୁଂ ତ୍ଵମର୍ହସି ।
ମର୍ୟାଦାଂ ସତ୍ତ୍ଵୟୁକ୍ତାନାଂ ଧୃତିଂ ନୋତ୍ସ୍ରଷ୍ଟୁମର୍ହସି ॥ 8 ॥
ଵ୍ୟସନେ ଵାଽର୍ଥକୃଚ୍ଛ୍ରେ ଵା ଭୟେ ଵା ଜୀଵିତାଂତକେ ।
ଵିମୃଶନ୍ଵୈ ସ୍ଵୟା ବୁଦ୍ଧ୍ୟା ଧୃତିମାନ୍ନାଵସୀଦତି ॥ 9 ॥
ବାଲିଶସ୍ତୁ ନରୋ ନିତ୍ୟଂ ଵୈକ୍ଲବ୍ୟଂ ୟୋଽନୁଵର୍ତତେ ।
ସ ମଜ୍ଜତ୍ୟଵଶଶ୍ଶୋକେ ଭାରାକ୍ରାଂତେଵ ନୌର୍ଜଲେ ॥ 10 ॥
ଏଷୋଽଂଜଲିର୍ମୟା ବଦ୍ଧଃ ପ୍ରଣୟାତ୍ତ୍ଵାଂ ପ୍ରସାଦୟେ ।
ପୌରୁଷଂ ଶ୍ରୟ ଶୋକସ୍ୟ ନାଂତରଂ ଦାତୁମର୍ହସି ॥ 11 ॥
ୟେ ଶୋକମନୁଵର୍ତଂତେ ନ ତେଷାଂ ଵିଦ୍ୟତେ ସୁଖମ୍ ।
ତେଜଶ୍ଚ କ୍ଷୀୟତେ ତେଷାଂ ନ ତ୍ଵଂ ଶୋଚିତୁମର୍ହସି ॥ 12 ॥
ଶୋକେନାଭିପ୍ରପନ୍ନସ୍ୟ ଜୀଵିତେ ଚାପି ସଂଶୟଃ ।
ସ ଶୋକଂ ତ୍ୟଜ ରାଜେଂଦ୍ର ଧୈର୍ୟମାଶ୍ରୟ କେଵଲମ୍ ॥ 13 ॥
ହିତଂ ଵୟସ୍ୟଭାଵେନ ବ୍ରୂମି ନୋପଦିଶାମି ତେ ।
ଵୟସ୍ୟତାଂ ପୂଜୟନ୍ମେ ନ ତ୍ଵଂ ଶୋଚିତୁମର୍ହସି ॥ 14 ॥
ମଧୁରଂ ସାଂତ୍ଵିତ ସ୍ତେନ ସୁଗ୍ରୀଵେଣ ସ ରାଘଵଃ ।
ମୁଖମଶ୍ରୁପରିକ୍ଲିନ୍ନଂ ଵସ୍ତ୍ରାଂତେନ ପ୍ରମାର୍ଜୟତ୍ ॥ 15 ॥
ପ୍ରକୃତିସ୍ଥସ୍ତୁ କାକୁତ୍ସ୍ଥସ୍ସୁଗ୍ରୀଵଵଚନାତ୍ପ୍ରଭୁଃ ।
ସଂପରିଷ୍ଵଜ୍ୟ ସୁଗ୍ରୀଵମିଦଂ ଵଚନମବ୍ରଵୀତ୍ ॥ 16 ॥
କର୍ତଵ୍ୟଂ ୟଦ୍ଵୟସ୍ୟେନ ସ୍ନିଗ୍ଧେନ ଚ ହିତେନ ଚ ।
ଅନୁରୂପଂ ଚ ୟୁକ୍ତଂ ଚ କୃତଂ ସୁଗ୍ରୀଵ ତତ୍ତ୍ଵୟା ॥ 17 ॥
ଏଷ ଚ ପ୍ରକୃତିସ୍ଥୋଽହମନୁନୀତସ୍ତ୍ଵୟା ସଖେ ।
ଦୁର୍ଲଭୋ ହୀଦୃଶୋ ବଂଧୁରସ୍ମିନ୍କାଲେ ଵିଶେଷତଃ ॥ 18 ॥
କିଂ ତୁ ୟତ୍ନସ୍ତ୍ଵୟା କାର୍ୟୋ ମୈଥିଲ୍ୟାଃ ପରିମାର୍ଗଣେ ।
ରାକ୍ଷସସ୍ୟ ଚ ରୌଦ୍ରସ୍ୟ ରାଵଣସ୍ୟ ଦୁରାତ୍ମନଃ ॥ 19 ॥
ମୟା ଚ ୟଦନୁଷ୍ଠେୟଂ ଵିସ୍ରବ୍ଧେନ ତଦୁଚ୍ୟତାମ୍ ।
ଵର୍ଷାସ୍ଵିଵ ଚ ସୁକ୍ଷେତ୍ରେ ସର୍ଵଂ ସଂପଦ୍ୟତେ ତଵ ॥ 20 ॥
ମୟା ଚ ୟଦିଦଂ ଵାକ୍ୟମଭିମାନାତ୍ସମୀରିତମ୍ ।
ତତ୍ତ୍ଵୟା ହରିଶାର୍ଦୂଲ ତତ୍ତ୍ଵମିତ୍ୟୁପଧାର୍ୟତାମ୍ ॥ 21 ॥
ଅନୃତଂ ନୋକ୍ତପୂର୍ଵଂ ମେ ନ ଚ ଵକ୍ଷ୍ୟେ କଦାଚନ ।
ଏତତ୍ତେ ପ୍ରତିଜାନାମି ସତ୍ୟେନୈଵ ଚ ତେ ଶପାମ୍ୟହମମ୍ ॥ 22 ॥
ତତଃ ପ୍ରହୃଷ୍ଟସ୍ସୁଗ୍ରୀଵୋ ଵାନରୈସ୍ସଚିଵୈସ୍ସହ ।
ରାଘଵସ୍ୟ ଵଚଶ୍ଶ୍ରୁତ୍ଵା ପ୍ରତିଜ୍ଞାତଂ ଵିଶେଷତଃ ॥ 23 ॥
ଏଵମେକାଂତସଂପୃକ୍ତୌ ତତସ୍ତୌ ନରଵାନରୌ ।
ଉଭାଵନ୍ୟୋନ୍ୟସଦୃଶଂ ସୁଖଂ ଦୁଃଖମଭାଷତାମ୍ ॥ 24 ॥
ମହାନୁଭାଵସ୍ୟ ଵଚୋ ନିଶମ୍ୟ ହରିର୍ନୃପାଣାମୃଷଭସ୍ୟ ତସ୍ୟ ।
କୃତଂ ସ ମେନେ ହରିଵୀରମୁଖ୍ୟ ସ୍ତଦା ସ୍ଵକାର୍ୟଂ ହୃଦୟେନ ଵିଦ୍ଵାନ୍ ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ସପ୍ତମସ୍ସର୍ଗଃ ॥
