શ્રીમદ્વાલ્મીકીય રામાયણે કિષ્કિંધાકાંડમ્ ।
અથ સપ્તમસ્સર્ગઃ ।
એવમુક્તસ્તુ સુગ્રીવો રામેણાર્તેન વાનરઃ ।
અબ્રવીત્પ્રાંજલિર્વાક્યં સબાષ્પં બાષ્પગદ્ગદઃ ॥ 1 ॥
ન જાને નિલયં તસ્ય સર્વથા પાપરક્ષસઃ ।
સામર્થ્યં વિક્રમં વાપિ દૌષ્કુલેયસ્ય વા કુલમ્ ॥ 2 ॥
સત્યં તે પ્રતિજાનામિ ત્યજ શોકમરિંદમ ।
કરિષ્યામિ તથા યત્નં યથા પ્રાપ્સ્યસિ મૈથિલીમ્ ॥ 3 ॥
રાવણં સગણં હત્વા પરિતોષ્યાત્મપૌરુષમ્ ।
તથાઽસ્મિ કર્તા ન ચિરાદ્યથા પ્રીતો ભવિષ્યસિ ॥ 4 ॥
અલં વૈક્લબ્યમાલંબ્ય ધૈર્યમાત્મગતં સ્મર ।
ત્વદ્વિધાનાં ન સદૃશમીદૃશં બુદ્ધિલાઘવમ્ ॥ 5 ॥
મયાઽપિ વ્યસનં પ્રાપ્તં ભાર્યાવિરહજં મહત્ ।
નાહમેવં હિ શોચામિ ન ચ ધૈર્યં પરિત્યજે ॥ 6 ॥
નાહં તામનુશોચામિ પ્રાકૃતો વાનરોઽપિ સન્ ।
મહાત્મા ચ વિનીતશ્ચ કિં પુનર્ધૃતિમાન્ભવાન્ ॥ 7 ॥
બાષ્પમાપતિતં ધૈર્યાન્નિગ્રહીતું ત્વમર્હસિ ।
મર્યાદાં સત્ત્વયુક્તાનાં ધૃતિં નોત્સ્રષ્ટુમર્હસિ ॥ 8 ॥
વ્યસને વાઽર્થકૃચ્છ્રે વા ભયે વા જીવિતાંતકે ।
વિમૃશન્વૈ સ્વયા બુદ્ધ્યા ધૃતિમાન્નાવસીદતિ ॥ 9 ॥
બાલિશસ્તુ નરો નિત્યં વૈક્લબ્યં યોઽનુવર્તતે ।
સ મજ્જત્યવશશ્શોકે ભારાક્રાંતેવ નૌર્જલે ॥ 10 ॥
એષોઽંજલિર્મયા બદ્ધઃ પ્રણયાત્ત્વાં પ્રસાદયે ।
પૌરુષં શ્રય શોકસ્ય નાંતરં દાતુમર્હસિ ॥ 11 ॥
યે શોકમનુવર્તંતે ન તેષાં વિદ્યતે સુખમ્ ।
તેજશ્ચ ક્ષીયતે તેષાં ન ત્વં શોચિતુમર્હસિ ॥ 12 ॥
શોકેનાભિપ્રપન્નસ્ય જીવિતે ચાપિ સંશયઃ ।
સ શોકં ત્યજ રાજેંદ્ર ધૈર્યમાશ્રય કેવલમ્ ॥ 13 ॥
હિતં વયસ્યભાવેન બ્રૂમિ નોપદિશામિ તે ।
વયસ્યતાં પૂજયન્મે ન ત્વં શોચિતુમર્હસિ ॥ 14 ॥
મધુરં સાંત્વિત સ્તેન સુગ્રીવેણ સ રાઘવઃ ।
મુખમશ્રુપરિક્લિન્નં વસ્ત્રાંતેન પ્રમાર્જયત્ ॥ 15 ॥
પ્રકૃતિસ્થસ્તુ કાકુત્સ્થસ્સુગ્રીવવચનાત્પ્રભુઃ ।
સંપરિષ્વજ્ય સુગ્રીવમિદં વચનમબ્રવીત્ ॥ 16 ॥
કર્તવ્યં યદ્વયસ્યેન સ્નિગ્ધેન ચ હિતેન ચ ।
અનુરૂપં ચ યુક્તં ચ કૃતં સુગ્રીવ તત્ત્વયા ॥ 17 ॥
એષ ચ પ્રકૃતિસ્થોઽહમનુનીતસ્ત્વયા સખે ।
દુર્લભો હીદૃશો બંધુરસ્મિન્કાલે વિશેષતઃ ॥ 18 ॥
કિં તુ યત્નસ્ત્વયા કાર્યો મૈથિલ્યાઃ પરિમાર્ગણે ।
રાક્ષસસ્ય ચ રૌદ્રસ્ય રાવણસ્ય દુરાત્મનઃ ॥ 19 ॥
મયા ચ યદનુષ્ઠેયં વિસ્રબ્ધેન તદુચ્યતામ્ ।
વર્ષાસ્વિવ ચ સુક્ષેત્રે સર્વં સંપદ્યતે તવ ॥ 20 ॥
મયા ચ યદિદં વાક્યમભિમાનાત્સમીરિતમ્ ।
તત્ત્વયા હરિશાર્દૂલ તત્ત્વમિત્યુપધાર્યતામ્ ॥ 21 ॥
અનૃતં નોક્તપૂર્વં મે ન ચ વક્ષ્યે કદાચન ।
એતત્તે પ્રતિજાનામિ સત્યેનૈવ ચ તે શપામ્યહમમ્ ॥ 22 ॥
તતઃ પ્રહૃષ્ટસ્સુગ્રીવો વાનરૈસ્સચિવૈસ્સહ ।
રાઘવસ્ય વચશ્શ્રુત્વા પ્રતિજ્ઞાતં વિશેષતઃ ॥ 23 ॥
એવમેકાંતસંપૃક્તૌ તતસ્તૌ નરવાનરૌ ।
ઉભાવન્યોન્યસદૃશં સુખં દુઃખમભાષતામ્ ॥ 24 ॥
મહાનુભાવસ્ય વચો નિશમ્ય હરિર્નૃપાણામૃષભસ્ય તસ્ય ।
કૃતં સ મેને હરિવીરમુખ્ય સ્તદા સ્વકાર્યં હૃદયેન વિદ્વાન્ ॥ 25 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે સપ્તમસ્સર્ગઃ ॥
