ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ സപ്തമസ്സര്ഗഃ ।
ഏവമുക്തസ്തു സുഗ്രീവോ രാമേണാര്തേന വാനരഃ ।
അബ്രവീത്പ്രാംജലിർവാക്യം സബാഷ്പം ബാഷ്പഗദ്ഗദഃ ॥ 1 ॥
ന ജാനേ നിലയം തസ്യ സർവഥാ പാപരക്ഷസഃ ।
സാമര്ഥ്യം വിക്രമം വാപി ദൌഷ്കുലേയസ്യ വാ കുലമ് ॥ 2 ॥
സത്യം തേ പ്രതിജാനാമി ത്യജ ശോകമരിംദമ ।
കരിഷ്യാമി തഥാ യത്നം യഥാ പ്രാപ്സ്യസി മൈഥിലീമ് ॥ 3 ॥
രാവണം സഗണം ഹത്വാ പരിതോഷ്യാത്മപൌരുഷമ് ।
തഥാഽസ്മി കര്താ ന ചിരാദ്യഥാ പ്രീതോ ഭവിഷ്യസി ॥ 4 ॥
അലം വൈക്ലബ്യമാലംബ്യ ധൈര്യമാത്മഗതം സ്മര ।
ത്വദ്വിധാനാം ന സദൃശമീദൃശം ബുദ്ധിലാഘവമ് ॥ 5 ॥
മയാഽപി വ്യസനം പ്രാപ്തം ഭാര്യാവിരഹജം മഹത് ।
നാഹമേവം ഹി ശോചാമി ന ച ധൈര്യം പരിത്യജേ ॥ 6 ॥
നാഹം താമനുശോചാമി പ്രാകൃതോ വാനരോഽപി സന് ।
മഹാത്മാ ച വിനീതശ്ച കിം പുനര്ധൃതിമാന്ഭവാന് ॥ 7 ॥
ബാഷ്പമാപതിതം ധൈര്യാന്നിഗ്രഹീതും ത്വമര്ഹസി ।
മര്യാദാം സത്ത്വയുക്താനാം ധൃതിം നോത്സ്രഷ്ടുമര്ഹസി ॥ 8 ॥
വ്യസനേ വാഽര്ഥകൃച്ഛ്രേ വാ ഭയേ വാ ജീവിതാംതകേ ।
വിമൃശന്വൈ സ്വയാ ബുദ്ധ്യാ ധൃതിമാന്നാവസീദതി ॥ 9 ॥
ബാലിശസ്തു നരോ നിത്യം വൈക്ലബ്യം യോഽനുവര്തതേ ।
സ മജ്ജത്യവശശ്ശോകേ ഭാരാക്രാംതേവ നൌര്ജലേ ॥ 10 ॥
ഏഷോഽംജലിര്മയാ ബദ്ധഃ പ്രണയാത്ത്വാം പ്രസാദയേ ।
പൌരുഷം ശ്രയ ശോകസ്യ നാംതരം ദാതുമര്ഹസി ॥ 11 ॥
യേ ശോകമനുവര്തംതേ ന തേഷാം വിദ്യതേ സുഖമ് ।
തേജശ്ച ക്ഷീയതേ തേഷാം ന ത്വം ശോചിതുമര്ഹസി ॥ 12 ॥
ശോകേനാഭിപ്രപന്നസ്യ ജീവിതേ ചാപി സംശയഃ ।
സ ശോകം ത്യജ രാജേംദ്ര ധൈര്യമാശ്രയ കേവലമ് ॥ 13 ॥
ഹിതം വയസ്യഭാവേന ബ്രൂമി നോപദിശാമി തേ ।
വയസ്യതാം പൂജയന്മേ ന ത്വം ശോചിതുമര്ഹസി ॥ 14 ॥
മധുരം സാംത്വിത സ്തേന സുഗ്രീവേണ സ രാഘവഃ ।
മുഖമശ്രുപരിക്ലിന്നം വസ്ത്രാംതേന പ്രമാര്ജയത് ॥ 15 ॥
പ്രകൃതിസ്ഥസ്തു കാകുത്സ്ഥസ്സുഗ്രീവവചനാത്പ്രഭുഃ ।
സംപരിഷ്വജ്യ സുഗ്രീവമിദം വചനമബ്രവീത് ॥ 16 ॥
കര്തവ്യം യദ്വയസ്യേന സ്നിഗ്ധേന ച ഹിതേന ച ।
അനുരൂപം ച യുക്തം ച കൃതം സുഗ്രീവ തത്ത്വയാ ॥ 17 ॥
ഏഷ ച പ്രകൃതിസ്ഥോഽഹമനുനീതസ്ത്വയാ സഖേ ।
ദുര്ലഭോ ഹീദൃശോ ബംധുരസ്മിന്കാലേ വിശേഷതഃ ॥ 18 ॥
കിം തു യത്നസ്ത്വയാ കാര്യോ മൈഥില്യാഃ പരിമാര്ഗണേ ।
രാക്ഷസസ്യ ച രൌദ്രസ്യ രാവണസ്യ ദുരാത്മനഃ ॥ 19 ॥
മയാ ച യദനുഷ്ഠേയം വിസ്രബ്ധേന തദുച്യതാമ് ।
വര്ഷാസ്വിവ ച സുക്ഷേത്രേ സർവം സംപദ്യതേ തവ ॥ 20 ॥
മയാ ച യദിദം വാക്യമഭിമാനാത്സമീരിതമ് ।
തത്ത്വയാ ഹരിശാര്ദൂല തത്ത്വമിത്യുപധാര്യതാമ് ॥ 21 ॥
അനൃതം നോക്തപൂർവം മേ ന ച വക്ഷ്യേ കദാചന ।
ഏതത്തേ പ്രതിജാനാമി സത്യേനൈവ ച തേ ശപാമ്യഹമമ് ॥ 22 ॥
തതഃ പ്രഹൃഷ്ടസ്സുഗ്രീവോ വാനരൈസ്സചിവൈസ്സഹ ।
രാഘവസ്യ വചശ്ശ്രുത്വാ പ്രതിജ്ഞാതം വിശേഷതഃ ॥ 23 ॥
ഏവമേകാംതസംപൃക്തൌ തതസ്തൌ നരവാനരൌ ।
ഉഭാവന്യോന്യസദൃശം സുഖം ദുഃഖമഭാഷതാമ് ॥ 24 ॥
മഹാനുഭാവസ്യ വചോ നിശമ്യ ഹരിര്നൃപാണാമൃഷഭസ്യ തസ്യ ।
കൃതം സ മേനേ ഹരിവീരമുഖ്യ സ്തദാ സ്വകാര്യം ഹൃദയേന വിദ്വാന് ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ സപ്തമസ്സര്ഗഃ ॥
