śrīmadvālmīkīya rāmāyaṇē bālakāṇḍam ।
atha ēkatriṃśassargaḥ ।
atha tāṃ rajanīṃ tatra kṛtārthau rāmalakṣmaṇau ।
ūṣaturmuditau vīrau prahṛṣṭēnāntarātmanā ॥ 1 ॥
prabhātāyāṃ tu śarvaryāṃ kṛtapaurvāhṇikakriyau ।
viśvāmitramṛṣīṃśchānyān sahitāvabhijagmatuḥ ॥ 2 ॥
abhivādya muniśrēṣṭhaṃ jvalantamiva pāvakam ।
ūchaturmadhurōdāraṃ vākyaṃ madhurabhāṣiṇau ॥ 3 ॥
imau sma muniśārdūla kiṅkarau samupasthitau ।
ājñāpaya yathēṣṭaṃ vai śāsanaṃ karavāva kim ॥ 4 ॥
ēvamuktā statastābhyāṃ sarva ēva maharṣayaḥ ।
viśvāmitraṃ puraskṛtya rāmaṃ vachanamabruvan ॥ 5 ॥
maithilasya naraśrēṣṭha janakasya bhaviṣyati ।
yajñaḥ paramadharmiṣṭhastasya yāsyāmahē vayam ॥ 6 ॥
tvaṃ chaiva naraśārdūla sahāsmābhirgamiṣyasi ।
adbhutaṃ dhanuratnaṃ cha tatra tadraṣṭumarhasi ॥ 7 ॥
taddhi pūrvaṃ naraśrēṣṭha dattaṃ sadasi daivataiḥ ।
apramēyabalaṃ ghōraṃ makhē paramabhāsvaram ॥ 8 ॥
nāsya dēvā na gandharvā nāsurā na cha rākṣasāḥ ।
kartumārōpaṇaṃ śaktā na kathañchana mānuṣāḥ ॥ 9 ॥
dhanuṣastasya vīryaṃ tu jijñāsantō mahīkṣitaḥ ।
na śēkurārōpayituṃ rājaputrā mahābalāḥ ॥ 10 ॥
taddhanurnaraśārdūla maithilasya mahātmanaḥ ।
tatra drakṣyasi kākutstha yajñaṃ chādbhutadarśanam ॥ 11 ॥
taddhi yajñaphalaṃ tēna maithilēnōttamaṃ dhanuḥ ।
yāchitaṃ naraśārdūla sunābhaṃ sarvadaivataiḥ ॥ 12 ॥
āyāgabhūtaṃ nṛpatēstasya vēśmani rāghava ।
architaṃ vividhairgandhairdhūpaiśchāgarugandhibhiḥ ॥ 13 ॥
ēvamuktvā munivaraḥ prasthānamakarōttadā ।
sarṣisaṅgha ssakākutsthaḥ āmantrya vanadēvatāḥ ॥ 14 ॥
svasti vō'stu gamiṣyāmi sidvassiddhāśramādaham ।
uttarē jāhnavītīrē himavantaṃ śilōchchayam ॥ 15 ॥
pradakṣiṇaṃ tataḥ kṛtvā siddhāśramamanuttamam ।
uttarāṃ diśamuddiśya prasthātumupachakramē ॥ 16 ॥
taṃ prayāntaṃ munivaramanvayādanusāriṇam ।
śakaṭīśatamātraṃ tu prāyēṇa brahmavādinām ॥ 17 ॥
mṛgapakṣigaṇāśchaiva siddhāśramanivāsinaḥ ।
anujagmurmahātmānaṃ viśvāmitraṃ mahāmunim ॥ 18 ॥
nivartayāmāsa tataḥ pakṣisaṅghān mṛgānapi ।
tē gatvā dūramadhvānaṃ lambamānē divākarē ।
vāsaṃ chakrurmunigaṇāḥ śōṇākūlē samāhitāḥ ॥ 19 ॥
tē'staṃ gatē dinakarē snātvā hutahutāśanāḥ ।
viśvāmitraṃ puraskṛtya niṣēduramitaujasaḥ ॥ 20 ॥
rāmō'pi sahasaumitrirmunīṃ stānabhipūjya cha ।
agratō niṣasādātha viśvāmitrasya dhīmataḥ ॥ 21 ॥
atha rāmō mahātējāḥ viśvāmitraṃ mahāmunim ।
paprachCha naraśārdūlaḥ kautūhalasamanvitaḥ ॥ 22 ॥
bhagavan kō'nvayaṃ dēśassamṛddhavanaśōbhitaḥ ।
śrōtumichChāmi bhadraṃ tē vaktumarhasi tattvataḥ ॥ 23 ॥
chōditō rāmavākyēna kathayāmāsa suvrataḥ ।
tasya dēśasya nikhilamṛṣimadhyē mahātapāḥ ॥ 24 ॥
ityārṣē śrīmadrāmāyaṇē vālmīkīya ādikāvyē bālakāṇḍē ēkatriṃśassargaḥ ॥
