ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକତ୍ରିଂଶସ୍ସର୍ଗଃ ।
ଅଥ ତାଂ ରଜନୀଂ ତତ୍ର କୃତାର୍ଥୌ ରାମଲକ୍ଷ୍ମଣୌ ।
ଊଷତୁର୍ମୁଦିତୌ ଵୀରୌ ପ୍ରହୃଷ୍ଟେନାଂତରାତ୍ମନା ॥ 1 ॥
ପ୍ରଭାତାୟାଂ ତୁ ଶର୍ଵର୍ୟାଂ କୃତପୌର୍ଵାହ୍ଣିକକ୍ରିୟୌ ।
ଵିଶ୍ଵାମିତ୍ରମୃଷୀଂଶ୍ଚାନ୍ୟାନ୍ ସହିତାଵଭିଜଗ୍ମତୁଃ ॥ 2 ॥
ଅଭିଵାଦ୍ୟ ମୁନିଶ୍ରେଷ୍ଠଂ ଜ୍ଵଲଂତମିଵ ପାଵକମ୍ ।
ଊଚତୁର୍ମଧୁରୋଦାରଂ ଵାକ୍ୟଂ ମଧୁରଭାଷିଣୌ ॥ 3 ॥
ଇମୌ ସ୍ମ ମୁନିଶାର୍ଦୂଲ କିଂକରୌ ସମୁପସ୍ଥିତୌ ।
ଆଜ୍ଞାପୟ ୟଥେଷ୍ଟଂ ଵୈ ଶାସନଂ କରଵାଵ କିମ୍ ॥ 4 ॥
ଏଵମୁକ୍ତା ସ୍ତତସ୍ତାଭ୍ୟାଂ ସର୍ଵ ଏଵ ମହର୍ଷୟଃ ।
ଵିଶ୍ଵାମିତ୍ରଂ ପୁରସ୍କୃତ୍ୟ ରାମଂ ଵଚନମବ୍ରୁଵନ୍ ॥ 5 ॥
ମୈଥିଲସ୍ୟ ନରଶ୍ରେଷ୍ଠ ଜନକସ୍ୟ ଭଵିଷ୍ୟତି ।
ୟଜ୍ଞଃ ପରମଧର୍ମିଷ୍ଠସ୍ତସ୍ୟ ୟାସ୍ୟାମହେ ଵୟମ୍ ॥ 6 ॥
ତ୍ଵଂ ଚୈଵ ନରଶାର୍ଦୂଲ ସହାସ୍ମାଭିର୍ଗମିଷ୍ୟସି ।
ଅଦ୍ଭୁତଂ ଧନୁରତ୍ନଂ ଚ ତତ୍ର ତଦ୍ରଷ୍ଟୁମର୍ହସି ॥ 7 ॥
ତଦ୍ଧି ପୂର୍ଵଂ ନରଶ୍ରେଷ୍ଠ ଦତ୍ତଂ ସଦସି ଦୈଵତୈଃ ।
ଅପ୍ରମେୟବଲଂ ଘୋରଂ ମଖେ ପରମଭାସ୍ଵରମ୍ ॥ 8 ॥
ନାସ୍ୟ ଦେଵା ନ ଗଂଧର୍ଵା ନାସୁରା ନ ଚ ରାକ୍ଷସାଃ ।
କର୍ତୁମାରୋପଣଂ ଶକ୍ତା ନ କଥଂଚନ ମାନୁଷାଃ ॥ 9 ॥
ଧନୁଷସ୍ତସ୍ୟ ଵୀର୍ୟଂ ତୁ ଜିଜ୍ଞାସଂତୋ ମହୀକ୍ଷିତଃ ।
ନ ଶେକୁରାରୋପୟିତୁଂ ରାଜପୁତ୍ରା ମହାବଲାଃ ॥ 10 ॥
ତଦ୍ଧନୁର୍ନରଶାର୍ଦୂଲ ମୈଥିଲସ୍ୟ ମହାତ୍ମନଃ ।
ତତ୍ର ଦ୍ରକ୍ଷ୍ୟସି କାକୁତ୍ସ୍ଥ ୟଜ୍ଞଂ ଚାଦ୍ଭୁତଦର୍ଶନମ୍ ॥ 11 ॥
ତଦ୍ଧି ୟଜ୍ଞଫଲଂ ତେନ ମୈଥିଲେନୋତ୍ତମଂ ଧନୁଃ ।
ୟାଚିତଂ ନରଶାର୍ଦୂଲ ସୁନାଭଂ ସର୍ଵଦୈଵତୈଃ ॥ 12 ॥
ଆୟାଗଭୂତଂ ନୃପତେସ୍ତସ୍ୟ ଵେଶ୍ମନି ରାଘଵ ।
ଅର୍ଚିତଂ ଵିଵିଧୈର୍ଗଂଧୈର୍ଧୂପୈଶ୍ଚାଗରୁଗଂଧିଭିଃ ॥ 13 ॥
ଏଵମୁକ୍ତ୍ଵା ମୁନିଵରଃ ପ୍ରସ୍ଥାନମକରୋତ୍ତଦା ।
ସର୍ଷିସଂଘ ସ୍ସକାକୁତ୍ସ୍ଥଃ ଆମଂତ୍ର୍ୟ ଵନଦେଵତାଃ ॥ 14 ॥
ସ୍ଵସ୍ତି ଵୋଽସ୍ତୁ ଗମିଷ୍ୟାମି ସିଦ୍ଵସ୍ସିଦ୍ଧାଶ୍ରମାଦହମ୍ ।
ଉତ୍ତରେ ଜାହ୍ନଵୀତୀରେ ହିମଵଂତଂ ଶିଲୋଚ୍ଚୟମ୍ ॥ 15 ॥
ପ୍ରଦକ୍ଷିଣଂ ତତଃ କୃତ୍ଵା ସିଦ୍ଧାଶ୍ରମମନୁତ୍ତମମ୍ ।
ଉତ୍ତରାଂ ଦିଶମୁଦ୍ଦିଶ୍ୟ ପ୍ରସ୍ଥାତୁମୁପଚକ୍ରମେ ॥ 16 ॥
ତଂ ପ୍ରୟାଂତଂ ମୁନିଵରମନ୍ଵୟାଦନୁସାରିଣମ୍ ।
ଶକଟୀଶତମାତ୍ରଂ ତୁ ପ୍ରାୟେଣ ବ୍ରହ୍ମଵାଦିନାମ୍ ॥ 17 ॥
ମୃଗପକ୍ଷିଗଣାଶ୍ଚୈଵ ସିଦ୍ଧାଶ୍ରମନିଵାସିନଃ ।
ଅନୁଜଗ୍ମୁର୍ମହାତ୍ମାନଂ ଵିଶ୍ଵାମିତ୍ରଂ ମହାମୁନିମ୍ ॥ 18 ॥
ନିଵର୍ତୟାମାସ ତତଃ ପକ୍ଷିସଂଘାନ୍ ମୃଗାନପି ।
ତେ ଗତ୍ଵା ଦୂରମଧ୍ଵାନଂ ଲଂବମାନେ ଦିଵାକରେ ।
ଵାସଂ ଚକ୍ରୁର୍ମୁନିଗଣାଃ ଶୋଣାକୂଲେ ସମାହିତାଃ ॥ 19 ॥
ତେଽସ୍ତଂ ଗତେ ଦିନକରେ ସ୍ନାତ୍ଵା ହୁତହୁତାଶନାଃ ।
ଵିଶ୍ଵାମିତ୍ରଂ ପୁରସ୍କୃତ୍ୟ ନିଷେଦୁରମିତୌଜସଃ ॥ 20 ॥
ରାମୋଽପି ସହସୌମିତ୍ରିର୍ମୁନୀଂ ସ୍ତାନଭିପୂଜ୍ୟ ଚ ।
ଅଗ୍ରତୋ ନିଷସାଦାଥ ଵିଶ୍ଵାମିତ୍ରସ୍ୟ ଧୀମତଃ ॥ 21 ॥
ଅଥ ରାମୋ ମହାତେଜାଃ ଵିଶ୍ଵାମିତ୍ରଂ ମହାମୁନିମ୍ ।
ପପ୍ରଚ୍ଛ ନରଶାର୍ଦୂଲଃ କୌତୂହଲସମନ୍ଵିତଃ ॥ 22 ॥
ଭଗଵନ୍ କୋଽନ୍ଵୟଂ ଦେଶସ୍ସମୃଦ୍ଧଵନଶୋଭିତଃ ।
ଶ୍ରୋତୁମିଚ୍ଛାମି ଭଦ୍ରଂ ତେ ଵକ୍ତୁମର୍ହସି ତତ୍ତ୍ଵତଃ ॥ 23 ॥
ଚୋଦିତୋ ରାମଵାକ୍ୟେନ କଥୟାମାସ ସୁଵ୍ରତଃ ।
ତସ୍ୟ ଦେଶସ୍ୟ ନିଖିଲମୃଷିମଧ୍ୟେ ମହାତପାଃ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକତ୍ରିଂଶସ୍ସର୍ଗଃ ॥
