ശ്രീമദ്വാല്മീകീയ രാമായണേ ബാലകാംഡമ് ।
അഥ ഏകത്രിംശസ്സര്ഗഃ ।
അഥ താം രജനീം തത്ര കൃതാര്ഥൌ രാമലക്ഷ്മണൌ ।
ഊഷതുര്മുദിതൌ വീരൌ പ്രഹൃഷ്ടേനാംതരാത്മനാ ॥ 1 ॥
പ്രഭാതായാം തു ശർവര്യാം കൃതപൌർവാഹ്ണികക്രിയൌ ।
വിശ്വാമിത്രമൃഷീംശ്ചാന്യാന് സഹിതാവഭിജഗ്മതുഃ ॥ 2 ॥
അഭിവാദ്യ മുനിശ്രേഷ്ഠം ജ്വലംതമിവ പാവകമ് ।
ഊചതുര്മധുരോദാരം വാക്യം മധുരഭാഷിണൌ ॥ 3 ॥
ഇമൌ സ്മ മുനിശാര്ദൂല കിംകരൌ സമുപസ്ഥിതൌ ।
ആജ്ഞാപയ യഥേഷ്ടം വൈ ശാസനം കരവാവ കിമ് ॥ 4 ॥
ഏവമുക്താ സ്തതസ്താഭ്യാം സർവ ഏവ മഹര്ഷയഃ ।
വിശ്വാമിത്രം പുരസ്കൃത്യ രാമം വചനമബ്രുവന് ॥ 5 ॥
മൈഥിലസ്യ നരശ്രേഷ്ഠ ജനകസ്യ ഭവിഷ്യതി ।
യജ്ഞഃ പരമധര്മിഷ്ഠസ്തസ്യ യാസ്യാമഹേ വയമ് ॥ 6 ॥
ത്വം ചൈവ നരശാര്ദൂല സഹാസ്മാഭിര്ഗമിഷ്യസി ।
അദ്ഭുതം ധനുരത്നം ച തത്ര തദ്രഷ്ടുമര്ഹസി ॥ 7 ॥
തദ്ധി പൂർവം നരശ്രേഷ്ഠ ദത്തം സദസി ദൈവതൈഃ ।
അപ്രമേയബലം ഘോരം മഖേ പരമഭാസ്വരമ് ॥ 8 ॥
നാസ്യ ദേവാ ന ഗംധർവാ നാസുരാ ന ച രാക്ഷസാഃ ।
കര്തുമാരോപണം ശക്താ ന കഥംചന മാനുഷാഃ ॥ 9 ॥
ധനുഷസ്തസ്യ വീര്യം തു ജിജ്ഞാസംതോ മഹീക്ഷിതഃ ।
ന ശേകുരാരോപയിതും രാജപുത്രാ മഹാബലാഃ ॥ 10 ॥
തദ്ധനുര്നരശാര്ദൂല മൈഥിലസ്യ മഹാത്മനഃ ।
തത്ര ദ്രക്ഷ്യസി കാകുത്സ്ഥ യജ്ഞം ചാദ്ഭുതദര്ശനമ് ॥ 11 ॥
തദ്ധി യജ്ഞഫലം തേന മൈഥിലേനോത്തമം ധനുഃ ।
യാചിതം നരശാര്ദൂല സുനാഭം സർവദൈവതൈഃ ॥ 12 ॥
ആയാഗഭൂതം നൃപതേസ്തസ്യ വേശ്മനി രാഘവ ।
അര്ചിതം വിവിധൈര്ഗംധൈര്ധൂപൈശ്ചാഗരുഗംധിഭിഃ ॥ 13 ॥
ഏവമുക്ത്വാ മുനിവരഃ പ്രസ്ഥാനമകരോത്തദാ ।
സര്ഷിസംഘ സ്സകാകുത്സ്ഥഃ ആമംത്ര്യ വനദേവതാഃ ॥ 14 ॥
സ്വസ്തി വോഽസ്തു ഗമിഷ്യാമി സിദ്വസ്സിദ്ധാശ്രമാദഹമ് ।
ഉത്തരേ ജാഹ്നവീതീരേ ഹിമവംതം ശിലോച്ചയമ് ॥ 15 ॥
പ്രദക്ഷിണം തതഃ കൃത്വാ സിദ്ധാശ്രമമനുത്തമമ് ।
ഉത്തരാം ദിശമുദ്ദിശ്യ പ്രസ്ഥാതുമുപചക്രമേ ॥ 16 ॥
തം പ്രയാംതം മുനിവരമന്വയാദനുസാരിണമ് ।
ശകടീശതമാത്രം തു പ്രായേണ ബ്രഹ്മവാദിനാമ് ॥ 17 ॥
മൃഗപക്ഷിഗണാശ്ചൈവ സിദ്ധാശ്രമനിവാസിനഃ ।
അനുജഗ്മുര്മഹാത്മാനം വിശ്വാമിത്രം മഹാമുനിമ് ॥ 18 ॥
നിവര്തയാമാസ തതഃ പക്ഷിസംഘാന് മൃഗാനപി ।
തേ ഗത്വാ ദൂരമധ്വാനം ലംബമാനേ ദിവാകരേ ।
വാസം ചക്രുര്മുനിഗണാഃ ശോണാകൂലേ സമാഹിതാഃ ॥ 19 ॥
തേഽസ്തം ഗതേ ദിനകരേ സ്നാത്വാ ഹുതഹുതാശനാഃ ।
വിശ്വാമിത്രം പുരസ്കൃത്യ നിഷേദുരമിതൌജസഃ ॥ 20 ॥
രാമോഽപി സഹസൌമിത്രിര്മുനീം സ്താനഭിപൂജ്യ ച ।
അഗ്രതോ നിഷസാദാഥ വിശ്വാമിത്രസ്യ ധീമതഃ ॥ 21 ॥
അഥ രാമോ മഹാതേജാഃ വിശ്വാമിത്രം മഹാമുനിമ് ।
പപ്രച്ഛ നരശാര്ദൂലഃ കൌതൂഹലസമന്വിതഃ ॥ 22 ॥
ഭഗവന് കോഽന്വയം ദേശസ്സമൃദ്ധവനശോഭിതഃ ।
ശ്രോതുമിച്ഛാമി ഭദ്രം തേ വക്തുമര്ഹസി തത്ത്വതഃ ॥ 23 ॥
ചോദിതോ രാമവാക്യേന കഥയാമാസ സുവ്രതഃ ।
തസ്യ ദേശസ്യ നിഖിലമൃഷിമധ്യേ മഹാതപാഃ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഏകത്രിംശസ്സര്ഗഃ ॥
