ശ്രീമദ്വാല്മീകീയ രാമായണേ അരണ്യകാംഡമ് ।
അഥ സപ്തത്രിംശസ്സര്ഗഃ ।
തച്ഛൃത്വാ രാക്ഷസേംദ്രസ്യ വാക്യം വാക്യവിശാരദഃ ।
പ്രത്യുവാച മഹാപ്രാജ്ഞോ മാരീചോ രാക്ഷസേശ്വരമ് ॥ 1 ॥
സുലഭാഃ പുരുഷാ രാജന്സതതം പ്രിയവാദിനഃ ।
അപ്രിയസ്യ തു പഥ്യസ്യ വക്താ ശ്രോതാ ച ദുര്ലഭഃ ॥ 2 ॥
ന നൂനം ബുധ്യസേ രാമം മഹാവീര്യം ഗുണോന്നതമ് ।
അയുക്തചാരശ്ചപലോ മഹേംദ്രവരുണോപമമ് ॥ 3 ॥
അപി സ്വസ്തി ഭവേത്താത സർവേഷാം ഭുവി രക്ഷസാമ് ।
അപി രാമോ നാസംക്രുദ്ധഃ കുര്യാല്ലോകമരാക്ഷസമ് ॥ 4 ॥
അപി തേ ജീവിതാംതായ നോത്പന്നാ ജനകാത്മജാ ।
അപി സീതാനിമിത്തം ച ന ഭവേദ്വ്യസനം മമ ॥ 5 ॥
അപി ത്വാമീശ്വരം പ്രാപ്യ കാമവൃത്തം നിരംകുശമ് ।
ന വിനശ്യേത്പുരീ ലംകാ ത്വയാ സഹ സരാക്ഷസാ ॥ 6 ॥
ത്വദ്വിധഃ കാമവൃത്തോ ഹി ദുശ്ശീലഃ പാപമംത്രിതഃ ।
ആത്മാനം സ്വജനം രാഷ്ട്രം സ രാജാ ഹംതി ദുര്മതിഃ ॥ 7 ॥
ന ച പിത്രാ പരിത്യക്തോ നാമര്യാദഃ കഥംചന ।
ന ലുബ്ധോ ന ച ദുശ്ശീലോ ന ച ക്ഷത്രിയപാംസനഃ ॥ 8 ॥
ന ച ധര്മഗുണൈര്ഹീനഃ കൌസല്യാനംദവര്ധനഃ ।
ന തീക്ഷ്ണോ ന ച ഭൂതാനാം സർവേഷാമഹിതേ രതഃ ॥ 9 ॥
വംചിതം പിതരം ദൃഷ്ട്വാ കൈകേയ്യാ സത്യവാദിനമ് ।
കരിഷ്യാമീതി ധര്മാത്മാ താത പ്രവ്രജിതോ വനമ് ॥ 10 ॥
കൈകേയ്യാഃ പ്രിയകാമാര്ഥം പിതുര്ദശരഥസ്യ ച ।
ഹിത്വാ രാജ്യം ച ഭോഗാംശ്ച പ്രവിഷ്ടോ ദംഡകാവനമ് ॥ 11 ॥
ന രാമഃ കര്കശസ്താത നാവിദ്വാന്നാജിതേംദ്രിയഃ ।
അനൃതം ദുശ്ശ്രുതം ചൈവ നൈവ ത്വം വക്തുമര്ഹസി ॥ 12 ॥
രാമോ വിഗ്രഹവാന് ധര്മസ്സാധുസ്സത്യപരാക്രമഃ ।
രാജാ സർവസ്യ ലോകസ്യ ദേവാനാം മഘവാനിവ ॥ 13 ॥
കഥം ത്വം തസ്യ വൈദേഹീം രക്ഷിതാം സ്വേന തേജസാ ।
ഇച്ഛസി പ്രസഭം ഹര്തും പ്രഭാമിവ വിവസ്വതഃ ॥ 14 ॥
ശരാര്ചിഷമാധൃഷ്യം ചാപഖംഗേംധനം രണേ ।
രാമാഗ്നിം സഹസാ ദീപ്തം ന പ്രവേഷ്ടും ത്വമര്ഹസി ॥ 15 ॥
ധനുർവ്യാദിതദീപ്താസ്യം ശരാര്ചിഷമമര്ഷണമ് ।
ചാപബാണധരം തീക്ഷ്ണം ശത്രുസൈന്യപ്രഹാരിണമ് ॥ 16 ॥
രാജ്യം സുഖം ച സംത്യജ്യ ജീവിതം ചേഷ്ടമാത്മനഃ ।
നാത്യാസാദയിതും താത രാമാംതകമിഹാര്ഹസി ॥ 17 ॥
അപ്രമേയം ഹി തത്തേജോ യസ്യ സാ ജനകാത്മജാ ।
ന ത്വം സമര്ഥസ്താം ഹര്തും രാമചാപാശ്രയം വനേ ॥ 18 ॥
തസ്യ സാ നരസിംഹസ്യ സിംഹോരസ്കസ്യ ഭാമിനീ ।
പ്രാണേഭ്യോഽപി പ്രിയതരാ ഭാര്യാ നിത്യമനുവ്രതാ ॥ 19 ॥
ന സാ ധര്ഷയിതും ശക്യാ മൈഥില്യോജസ്വിനഃ പ്രിയാ ।
ദീപ്തസ്യേവ ഹുതാശസ്യ ശിഖാ സീതാ സുമധ്യമാ ॥ 20 ॥
കിമുദ്യമമിമം വ്യര്ഥം കൃത്വാ തേ രാക്ഷസാധിപ ।
ദൃഷ്ടശ്ചേത്വം രണേ തേന തദംതം തവ ജീവിതമ് ॥ 21 ॥
ജീവിതം ച സുഖം ചൈവ രാജ്യം ചൈവ സുദുര്ലഭമ് ।
യദീച്ഛസി ചിരം ഭോക്തും മാ കൃഥാ രാമവിപ്രിയമ് ॥ 22 ॥
സ സർവൈസ്സചിവൈസ്സാര്ധം വിഭീഷണപുരോഗമൈഃ ।
മംത്രയിത്വാ തു ധര്മിഷ്ഠൈഃ കൃത്വാ നിശ്ചയമാത്മനഃ ॥ 23 ॥
ദോഷാണാം ച ഗുണാനാം ച സംപ്രധാര്യ ബലാബലമ് ।
ആത്മനശ്ച ബലം ജ്ഞാത്വാ രാഘവസ്യ ച തത്വതഃ ॥ 24 ॥
ഹിതാഹിതം വിനിശ്ചിത്യ ക്ഷമം ത്വം കര്തുമര്ഹസി ।
അഹം തു മന്യേ തവ ന ക്ഷമം രണേ സമാഗമം കോസലരാജസൂനുനാ ।
ഇദം ഹി ഭൂയശ്ശൃണു വാക്യമുത്തമം ക്ഷമം ച യുക്തം ച നിശാചരേശ്വര ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ സപ്തത്രിംശസ്സര്ഗഃ ॥
