śrīmadvālmīkīya rāmāyaṇē araṇyakāṇḍam ।
atha saptatriṃśassargaḥ ।
tachChṛtvā rākṣasēndrasya vākyaṃ vākyaviśāradaḥ ।
pratyuvācha mahāprājñō mārīchō rākṣasēśvaram ॥ 1 ॥
sulabhāḥ puruṣā rājansatataṃ priyavādinaḥ ।
apriyasya tu pathyasya vaktā śrōtā cha durlabhaḥ ॥ 2 ॥
na nūnaṃ budhyasē rāmaṃ mahāvīryaṃ guṇōnnatam ।
ayuktachāraśchapalō mahēndravaruṇōpamam ॥ 3 ॥
api svasti bhavēttāta sarvēṣāṃ bhuvi rakṣasām ।
api rāmō nāsaṅkruddhaḥ kuryāllōkamarākṣasam ॥ 4 ॥
api tē jīvitāntāya nōtpannā janakātmajā ।
api sītānimittaṃ cha na bhavēdvyasanaṃ mama ॥ 5 ॥
api tvāmīśvaraṃ prāpya kāmavṛttaṃ niraṅkuśam ।
na vinaśyētpurī laṅkā tvayā saha sarākṣasā ॥ 6 ॥
tvadvidhaḥ kāmavṛttō hi duśśīlaḥ pāpamantritaḥ ।
ātmānaṃ svajanaṃ rāṣṭraṃ sa rājā hanti durmatiḥ ॥ 7 ॥
na cha pitrā parityaktō nāmaryādaḥ kathañchana ।
na lubdhō na cha duśśīlō na cha kṣatriyapāṃsanaḥ ॥ 8 ॥
na cha dharmaguṇairhīnaḥ kausalyānandavardhanaḥ ।
na tīkṣṇō na cha bhūtānāṃ sarvēṣāmahitē rataḥ ॥ 9 ॥
vañchitaṃ pitaraṃ dṛṣṭvā kaikēyyā satyavādinam ।
kariṣyāmīti dharmātmā tāta pravrajitō vanam ॥ 10 ॥
kaikēyyāḥ priyakāmārthaṃ piturdaśarathasya cha ।
hitvā rājyaṃ cha bhōgāṃścha praviṣṭō daṇḍakāvanam ॥ 11 ॥
na rāmaḥ karkaśastāta nāvidvānnājitēndriyaḥ ।
anṛtaṃ duśśrutaṃ chaiva naiva tvaṃ vaktumarhasi ॥ 12 ॥
rāmō vigrahavān dharmassādhussatyaparākramaḥ ।
rājā sarvasya lōkasya dēvānāṃ maghavāniva ॥ 13 ॥
kathaṃ tvaṃ tasya vaidēhīṃ rakṣitāṃ svēna tējasā ।
ichChasi prasabhaṃ hartuṃ prabhāmiva vivasvataḥ ॥ 14 ॥
śarārchiṣamādhṛṣyaṃ chāpakhaṅgēndhanaṃ raṇē ।
rāmāgniṃ sahasā dīptaṃ na pravēṣṭuṃ tvamarhasi ॥ 15 ॥
dhanurvyāditadīptāsyaṃ śarārchiṣamamarṣaṇam ।
chāpabāṇadharaṃ tīkṣṇaṃ śatrusainyaprahāriṇam ॥ 16 ॥
rājyaṃ sukhaṃ cha santyajya jīvitaṃ chēṣṭamātmanaḥ ।
nātyāsādayituṃ tāta rāmāntakamihārhasi ॥ 17 ॥
apramēyaṃ hi tattējō yasya sā janakātmajā ।
na tvaṃ samarthastāṃ hartuṃ rāmachāpāśrayaṃ vanē ॥ 18 ॥
tasya sā narasiṃhasya siṃhōraskasya bhāminī ।
prāṇēbhyō'pi priyatarā bhāryā nityamanuvratā ॥ 19 ॥
na sā dharṣayituṃ śakyā maithilyōjasvinaḥ priyā ।
dīptasyēva hutāśasya śikhā sītā sumadhyamā ॥ 20 ॥
kimudyamamimaṃ vyarthaṃ kṛtvā tē rākṣasādhipa ।
dṛṣṭaśchētvaṃ raṇē tēna tadantaṃ tava jīvitam ॥ 21 ॥
jīvitaṃ cha sukhaṃ chaiva rājyaṃ chaiva sudurlabham ।
yadīchChasi chiraṃ bhōktuṃ mā kṛthā rāmavipriyam ॥ 22 ॥
sa sarvaissachivaissārdhaṃ vibhīṣaṇapurōgamaiḥ ।
mantrayitvā tu dharmiṣṭhaiḥ kṛtvā niśchayamātmanaḥ ॥ 23 ॥
dōṣāṇāṃ cha guṇānāṃ cha sampradhārya balābalam ।
ātmanaścha balaṃ jñātvā rāghavasya cha tatvataḥ ॥ 24 ॥
hitāhitaṃ viniśchitya kṣamaṃ tvaṃ kartumarhasi ।
ahaṃ tu manyē tava na kṣamaṃ raṇē samāgamaṃ kōsalarājasūnunā ।
idaṃ hi bhūyaśśṛṇu vākyamuttamaṃ kṣamaṃ cha yuktaṃ cha niśācharēśvara ॥ 25 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē saptatriṃśassargaḥ ॥
