ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ସପ୍ତତ୍ରିଂଶସ୍ସର୍ଗଃ ।
ତଚ୍ଛୃତ୍ଵା ରାକ୍ଷସେଂଦ୍ରସ୍ୟ ଵାକ୍ୟଂ ଵାକ୍ୟଵିଶାରଦଃ ।
ପ୍ରତ୍ୟୁଵାଚ ମହାପ୍ରାଜ୍ଞୋ ମାରୀଚୋ ରାକ୍ଷସେଶ୍ଵରମ୍ ॥ 1 ॥
ସୁଲଭାଃ ପୁରୁଷା ରାଜନ୍ସତତଂ ପ୍ରିୟଵାଦିନଃ ।
ଅପ୍ରିୟସ୍ୟ ତୁ ପଥ୍ୟସ୍ୟ ଵକ୍ତା ଶ୍ରୋତା ଚ ଦୁର୍ଲଭଃ ॥ 2 ॥
ନ ନୂନଂ ବୁଧ୍ୟସେ ରାମଂ ମହାଵୀର୍ୟଂ ଗୁଣୋନ୍ନତମ୍ ।
ଅୟୁକ୍ତଚାରଶ୍ଚପଲୋ ମହେଂଦ୍ରଵରୁଣୋପମମ୍ ॥ 3 ॥
ଅପି ସ୍ଵସ୍ତି ଭଵେତ୍ତାତ ସର୍ଵେଷାଂ ଭୁଵି ରକ୍ଷସାମ୍ ।
ଅପି ରାମୋ ନାସଂକ୍ରୁଦ୍ଧଃ କୁର୍ୟାଲ୍ଲୋକମରାକ୍ଷସମ୍ ॥ 4 ॥
ଅପି ତେ ଜୀଵିତାଂତାୟ ନୋତ୍ପନ୍ନା ଜନକାତ୍ମଜା ।
ଅପି ସୀତାନିମିତ୍ତଂ ଚ ନ ଭଵେଦ୍ଵ୍ୟସନଂ ମମ ॥ 5 ॥
ଅପି ତ୍ଵାମୀଶ୍ଵରଂ ପ୍ରାପ୍ୟ କାମଵୃତ୍ତଂ ନିରଂକୁଶମ୍ ।
ନ ଵିନଶ୍ୟେତ୍ପୁରୀ ଲଂକା ତ୍ଵୟା ସହ ସରାକ୍ଷସା ॥ 6 ॥
ତ୍ଵଦ୍ଵିଧଃ କାମଵୃତ୍ତୋ ହି ଦୁଶ୍ଶୀଲଃ ପାପମଂତ୍ରିତଃ ।
ଆତ୍ମାନଂ ସ୍ଵଜନଂ ରାଷ୍ଟ୍ରଂ ସ ରାଜା ହଂତି ଦୁର୍ମତିଃ ॥ 7 ॥
ନ ଚ ପିତ୍ରା ପରିତ୍ୟକ୍ତୋ ନାମର୍ୟାଦଃ କଥଂଚନ ।
ନ ଲୁବ୍ଧୋ ନ ଚ ଦୁଶ୍ଶୀଲୋ ନ ଚ କ୍ଷତ୍ରିୟପାଂସନଃ ॥ 8 ॥
ନ ଚ ଧର୍ମଗୁଣୈର୍ହୀନଃ କୌସଲ୍ୟାନଂଦଵର୍ଧନଃ ।
ନ ତୀକ୍ଷ୍ଣୋ ନ ଚ ଭୂତାନାଂ ସର୍ଵେଷାମହିତେ ରତଃ ॥ 9 ॥
ଵଂଚିତଂ ପିତରଂ ଦୃଷ୍ଟ୍ଵା କୈକେୟ୍ୟା ସତ୍ୟଵାଦିନମ୍ ।
କରିଷ୍ୟାମୀତି ଧର୍ମାତ୍ମା ତାତ ପ୍ରଵ୍ରଜିତୋ ଵନମ୍ ॥ 10 ॥
କୈକେୟ୍ୟାଃ ପ୍ରିୟକାମାର୍ଥଂ ପିତୁର୍ଦଶରଥସ୍ୟ ଚ ।
ହିତ୍ଵା ରାଜ୍ୟଂ ଚ ଭୋଗାଂଶ୍ଚ ପ୍ରଵିଷ୍ଟୋ ଦଂଡକାଵନମ୍ ॥ 11 ॥
ନ ରାମଃ କର୍କଶସ୍ତାତ ନାଵିଦ୍ଵାନ୍ନାଜିତେଂଦ୍ରିୟଃ ।
ଅନୃତଂ ଦୁଶ୍ଶ୍ରୁତଂ ଚୈଵ ନୈଵ ତ୍ଵଂ ଵକ୍ତୁମର୍ହସି ॥ 12 ॥
ରାମୋ ଵିଗ୍ରହଵାନ୍ ଧର୍ମସ୍ସାଧୁସ୍ସତ୍ୟପରାକ୍ରମଃ ।
ରାଜା ସର୍ଵସ୍ୟ ଲୋକସ୍ୟ ଦେଵାନାଂ ମଘଵାନିଵ ॥ 13 ॥
କଥଂ ତ୍ଵଂ ତସ୍ୟ ଵୈଦେହୀଂ ରକ୍ଷିତାଂ ସ୍ଵେନ ତେଜସା ।
ଇଚ୍ଛସି ପ୍ରସଭଂ ହର୍ତୁଂ ପ୍ରଭାମିଵ ଵିଵସ୍ଵତଃ ॥ 14 ॥
ଶରାର୍ଚିଷମାଧୃଷ୍ୟଂ ଚାପଖଂଗେଂଧନଂ ରଣେ ।
ରାମାଗ୍ନିଂ ସହସା ଦୀପ୍ତଂ ନ ପ୍ରଵେଷ୍ଟୁଂ ତ୍ଵମର୍ହସି ॥ 15 ॥
ଧନୁର୍ଵ୍ୟାଦିତଦୀପ୍ତାସ୍ୟଂ ଶରାର୍ଚିଷମମର୍ଷଣମ୍ ।
ଚାପବାଣଧରଂ ତୀକ୍ଷ୍ଣଂ ଶତ୍ରୁସୈନ୍ୟପ୍ରହାରିଣମ୍ ॥ 16 ॥
ରାଜ୍ୟଂ ସୁଖଂ ଚ ସଂତ୍ୟଜ୍ୟ ଜୀଵିତଂ ଚେଷ୍ଟମାତ୍ମନଃ ।
ନାତ୍ୟାସାଦୟିତୁଂ ତାତ ରାମାଂତକମିହାର୍ହସି ॥ 17 ॥
ଅପ୍ରମେୟଂ ହି ତତ୍ତେଜୋ ୟସ୍ୟ ସା ଜନକାତ୍ମଜା ।
ନ ତ୍ଵଂ ସମର୍ଥସ୍ତାଂ ହର୍ତୁଂ ରାମଚାପାଶ୍ରୟଂ ଵନେ ॥ 18 ॥
ତସ୍ୟ ସା ନରସିଂହସ୍ୟ ସିଂହୋରସ୍କସ୍ୟ ଭାମିନୀ ।
ପ୍ରାଣେଭ୍ୟୋଽପି ପ୍ରିୟତରା ଭାର୍ୟା ନିତ୍ୟମନୁଵ୍ରତା ॥ 19 ॥
ନ ସା ଧର୍ଷୟିତୁଂ ଶକ୍ୟା ମୈଥିଲ୍ୟୋଜସ୍ଵିନଃ ପ୍ରିୟା ।
ଦୀପ୍ତସ୍ୟେଵ ହୁତାଶସ୍ୟ ଶିଖା ସୀତା ସୁମଧ୍ୟମା ॥ 20 ॥
କିମୁଦ୍ୟମମିମଂ ଵ୍ୟର୍ଥଂ କୃତ୍ଵା ତେ ରାକ୍ଷସାଧିପ ।
ଦୃଷ୍ଟଶ୍ଚେତ୍ଵଂ ରଣେ ତେନ ତଦଂତଂ ତଵ ଜୀଵିତମ୍ ॥ 21 ॥
ଜୀଵିତଂ ଚ ସୁଖଂ ଚୈଵ ରାଜ୍ୟଂ ଚୈଵ ସୁଦୁର୍ଲଭମ୍ ।
ୟଦୀଚ୍ଛସି ଚିରଂ ଭୋକ୍ତୁଂ ମା କୃଥା ରାମଵିପ୍ରିୟମ୍ ॥ 22 ॥
ସ ସର୍ଵୈସ୍ସଚିଵୈସ୍ସାର୍ଧଂ ଵିଭୀଷଣପୁରୋଗମୈଃ ।
ମଂତ୍ରୟିତ୍ଵା ତୁ ଧର୍ମିଷ୍ଠୈଃ କୃତ୍ଵା ନିଶ୍ଚୟମାତ୍ମନଃ ॥ 23 ॥
ଦୋଷାଣାଂ ଚ ଗୁଣାନାଂ ଚ ସଂପ୍ରଧାର୍ୟ ବଲାବଲମ୍ ।
ଆତ୍ମନଶ୍ଚ ବଲଂ ଜ୍ଞାତ୍ଵା ରାଘଵସ୍ୟ ଚ ତତ୍ଵତଃ ॥ 24 ॥
ହିତାହିତଂ ଵିନିଶ୍ଚିତ୍ୟ କ୍ଷମଂ ତ୍ଵଂ କର୍ତୁମର୍ହସି ।
ଅହଂ ତୁ ମନ୍ୟେ ତଵ ନ କ୍ଷମଂ ରଣେ ସମାଗମଂ କୋସଲରାଜସୂନୁନା ।
ଇଦଂ ହି ଭୂୟଶ୍ଶୃଣୁ ଵାକ୍ୟମୁତ୍ତମଂ କ୍ଷମଂ ଚ ୟୁକ୍ତଂ ଚ ନିଶାଚରେଶ୍ଵର ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ସପ୍ତତ୍ରିଂଶସ୍ସର୍ଗଃ ॥
