śrīmadvālmīkīya rāmāyaṇē araṇyakāṇḍam ।
atha aṣṭatriṃśassargaḥ ।
kadāchidapyahaṃ vīryātparyaṭanpṛthivīmimām ।
balaṃ nāgasahasrasya dhārayanparvatōpamaḥ ॥ 1 ॥
nīlajīmūtasaṅkāśastaptakāñchanakuṇḍalaḥ ।
bhayaṃ lōkasya janayankirīṭī parighāyudhaḥ ॥ 2 ॥
vyacharaṃ daṇḍakāraṇyē ṛṣimāṃsāni bhakṣayan ।
viśvāmitrō'tha dharmātmā madvitrastō mahāmuniḥ ॥ 3 ॥
svayaṃ gatvā daśarathaṃ narēndramidamabravīt ।
adya rakṣatu māṃ rāmaḥ parvakālē samāhitaḥ ॥ 4 ॥
mārīchānmē bhayaṃ ghōraṃ samutpannaṃ narēśvara ।
ityēvamuktō dharmātmā rājā daśarathastadā ॥ 5 ॥
pratyuvācha mahābhāgaṃ viśvāmitraṃ mahāmunim ।
bālō dvādaśavarṣō'yamakṛtāstraścha rāghavaḥ ॥ 6 ॥
kāmaṃ tu mama yatsainyaṃ mayā saha gamiṣyati ।
balēna chaturaṅgēṇa svayamētya niśācharān ॥ 7 ॥
vadhiṣyāmi muniśrēṣṭha śatrūṃstē manasēpsitān ।
ityēvamuktassamunī rājānamidamabravīt ॥ 8 ॥
rāmānnānyadbalaṃ lōkē paryāptaṃ tasya rakṣasaḥ ।
dēvatānāmapi bhavān samarēṣvabhipālakaḥ ॥ 9 ॥
āsīttava kṛtaṃ karma trilōkē viditaṃ nṛpa ।
kāmamastu mahatsainyaṃ tiṣṭhatviha parantapa ॥ 10 ॥
bālō'pyēṣa mahātējāssamarthastasya nigrahē ।
gamiṣyē rāmamādāya svasti tē'stu parantapa ॥ 11 ॥
ēvamuktvā tu sa munistamādāya nṛpātmajam ।
jagāma paramaprītō viśvāmitrassvamāśramam ॥ 12 ॥
taṃ tadā daṇḍakāraṇyē yajñamuddiśya dīkṣitam ।
babhūvōpasthitō rāmaśchitraṃ viṣphārayandhanuḥ ॥ 13 ॥
ajātavyañjanaśrīmānpadmapatranibhēkṣaṇaḥ ।
ēkavastradharō dhanvī śikhī kanakamālayā ॥ 14 ॥
śōbhayan daṇḍakāraṇyaṃ dīptēna svēna tējasā ।
adṛśyata tatō rāmō bālachandra ivōditaḥ ॥ 15 ॥
tatō'haṃ mēghasaṅkāśastaptakāñchanakuṇḍalaḥ ।
balī dattavarōdarpādājagāma tadāśramam ॥ 16 ॥
tēna dṛṣṭaḥ praviṣṭō'haṃ sahasaivōdyatāyudhaḥ ।
māṃ tu dṛṣṭvā dhanussajyamasambhrāntaśchakāra saḥ ॥ 17 ॥
avajānannahaṃ mōhādbālō'yamiti rāghavam ।
viśvāmitrasya tāṃ vēdimabhyadhāvaṃ kṛtatvaraḥ ॥ 18 ॥
tēna muktastatō bāṇaḥ śitaśśatrunibarhaṇaḥ ।
tēnāhaṃ tvāhataḥ kṣiptassamudrē śatayōjanē ॥ 19 ॥
nēchChatā tāta māṃ hantuṃ tadā vīrēṇa rakṣitaḥ ।
rāmasya śaravēgēna nirastō'hamachētanaḥ ॥ 20 ॥
pātitō'haṃ tadā tēna gambhīrē sāgarāmbhasi ।
prāpya sañjñāṃ chirāttāta laṅkāṃ pratigataḥ purīm ॥ 21 ॥
ēvamasmi tadā muktassahāyāstu nipātitāḥ ।
akṛtāstrēṇa bālēna rāmēṇākliṣṭakarmaṇā ॥ 22 ॥
tanmayā vāryamāṇastvaṃ yadi rāmēṇa vigraham ।
kariṣyasyāpadaṃ ghōrāṃ kṣipraṃ prāpsyasi rāvaṇa ॥ 23 ॥
krīḍāratividhijñānāṃ samājōtsavaśālinām ।
rakṣasāṃ chaiva santāpamanarthaṃ chāhariṣyasi ॥ 24 ॥
harmyaprāsādasambādhāṃ nānāratnavibhūṣitām ।
drakṣyasi tvaṃ purīṃ laṅkāṃ vinaṣṭāṃ maithilīkṛtē ॥ 25 ॥
akurvantō'pi pāpāni śuchayaḥ pāpasaṃśrayāt ।
parapāpairvinaśyanti matsyā nāgahradē yathā ॥ 26 ॥
divyachandanadigdhāṅgāndivyābharaṇabhūṣitān ।
drakṣyasyabhihatānbhūmau tava dōṣāttu rākṣasān ॥ 27 ॥
hṛtadārān sadārāṃścha daśa vidravatō diśaḥ ।
hataśēṣānaśaraṇāndrakṣyasi tvaṃ niśācharān ॥ 28 ॥
śarajālaparikṣiptāmagnijvālāsamāvṛtām ।
pradagdhabhavanāṃ laṅkāṃ drakṣyasi tvaṃ na saṃśayaḥ ॥ 29 ॥
paradārābhimarśāttu nānyatpāpataraṃ mahat ।
pramadānāṃ sahasraṃ cha tava rājanparigrahaḥ ॥ 30 ॥
bhava svadāraniratasvakulaṃ rakṣa rākṣasa ।
mānamṛddhiṃ cha rājyaṃ cha jīvitaṃ chēṣṭamātmanaḥ ॥ 31 ॥
kalatrāṇi cha saumyāni mitravargaṃ tathaiva cha ।
yadīchChasi chiraṃ bhōktaṃ mā kṛthā rāmavipriyam ॥ 32 ॥
nivāryamāṇassuhṛdā mayā bhṛśaṃ prasahya sītāṃ yadi dharṣayiṣyasi ।
gamiṣyasi kṣīṇabalassabāndhavō yamakṣayaṃ rāmaśarāttajīvitaḥ ॥ 33 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē aṣṭatriṃśassargaḥ ॥
