ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଅଷ୍ଟତ୍ରିଂଶସ୍ସର୍ଗଃ ।
କଦାଚିଦପ୍ୟହଂ ଵୀର୍ୟାତ୍ପର୍ୟଟନ୍ପୃଥିଵୀମିମାମ୍ ।
ବଲଂ ନାଗସହସ୍ରସ୍ୟ ଧାରୟନ୍ପର୍ଵତୋପମଃ ॥ 1 ॥
ନୀଲଜୀମୂତସଂକାଶସ୍ତପ୍ତକାଂଚନକୁଂଡଲଃ ।
ଭୟଂ ଲୋକସ୍ୟ ଜନୟନ୍କିରୀଟୀ ପରିଘାୟୁଧଃ ॥ 2 ॥
ଵ୍ୟଚରଂ ଦଂଡକାରଣ୍ୟେ ଋଷିମାଂସାନି ଭକ୍ଷୟନ୍ ।
ଵିଶ୍ଵାମିତ୍ରୋଽଥ ଧର୍ମାତ୍ମା ମଦ୍ଵିତ୍ରସ୍ତୋ ମହାମୁନିଃ ॥ 3 ॥
ସ୍ଵୟଂ ଗତ୍ଵା ଦଶରଥଂ ନରେଂଦ୍ରମିଦମବ୍ରଵୀତ୍ ।
ଅଦ୍ୟ ରକ୍ଷତୁ ମାଂ ରାମଃ ପର୍ଵକାଲେ ସମାହିତଃ ॥ 4 ॥
ମାରୀଚାନ୍ମେ ଭୟଂ ଘୋରଂ ସମୁତ୍ପନ୍ନଂ ନରେଶ୍ଵର ।
ଇତ୍ୟେଵମୁକ୍ତୋ ଧର୍ମାତ୍ମା ରାଜା ଦଶରଥସ୍ତଦା ॥ 5 ॥
ପ୍ରତ୍ୟୁଵାଚ ମହାଭାଗଂ ଵିଶ୍ଵାମିତ୍ରଂ ମହାମୁନିମ୍ ।
ବାଲୋ ଦ୍ଵାଦଶଵର୍ଷୋଽୟମକୃତାସ୍ତ୍ରଶ୍ଚ ରାଘଵଃ ॥ 6 ॥
କାମଂ ତୁ ମମ ୟତ୍ସୈନ୍ୟଂ ମୟା ସହ ଗମିଷ୍ୟତି ।
ବଲେନ ଚତୁରଂଗେଣ ସ୍ଵୟମେତ୍ୟ ନିଶାଚରାନ୍ ॥ 7 ॥
ଵଧିଷ୍ୟାମି ମୁନିଶ୍ରେଷ୍ଠ ଶତ୍ରୂଂସ୍ତେ ମନସେପ୍ସିତାନ୍ ।
ଇତ୍ୟେଵମୁକ୍ତସ୍ସମୁନୀ ରାଜାନମିଦମବ୍ରଵୀତ୍ ॥ 8 ॥
ରାମାନ୍ନାନ୍ୟଦ୍ବଲଂ ଲୋକେ ପର୍ୟାପ୍ତଂ ତସ୍ୟ ରକ୍ଷସଃ ।
ଦେଵତାନାମପି ଭଵାନ୍ ସମରେଷ୍ଵଭିପାଲକଃ ॥ 9 ॥
ଆସୀତ୍ତଵ କୃତଂ କର୍ମ ତ୍ରିଲୋକେ ଵିଦିତଂ ନୃପ ।
କାମମସ୍ତୁ ମହତ୍ସୈନ୍ୟଂ ତିଷ୍ଠତ୍ଵିହ ପରଂତପ ॥ 10 ॥
ବାଲୋଽପ୍ୟେଷ ମହାତେଜାସ୍ସମର୍ଥସ୍ତସ୍ୟ ନିଗ୍ରହେ ।
ଗମିଷ୍ୟେ ରାମମାଦାୟ ସ୍ଵସ୍ତି ତେଽସ୍ତୁ ପରଂତପ ॥ 11 ॥
ଏଵମୁକ୍ତ୍ଵା ତୁ ସ ମୁନିସ୍ତମାଦାୟ ନୃପାତ୍ମଜମ୍ ।
ଜଗାମ ପରମପ୍ରୀତୋ ଵିଶ୍ଵାମିତ୍ରସ୍ସ୍ଵମାଶ୍ରମମ୍ ॥ 12 ॥
ତଂ ତଦା ଦଂଡକାରଣ୍ୟେ ୟଜ୍ଞମୁଦ୍ଦିଶ୍ୟ ଦୀକ୍ଷିତମ୍ ।
ବଭୂଵୋପସ୍ଥିତୋ ରାମଶ୍ଚିତ୍ରଂ ଵିଷ୍ଫାରୟଂଧନୁଃ ॥ 13 ॥
ଅଜାତଵ୍ୟଂଜନଶ୍ରୀମାନ୍ପଦ୍ମପତ୍ରନିଭେକ୍ଷଣଃ ।
ଏକଵସ୍ତ୍ରଧରୋ ଧନ୍ଵୀ ଶିଖୀ କନକମାଲୟା ॥ 14 ॥
ଶୋଭୟନ୍ ଦଂଡକାରଣ୍ୟଂ ଦୀପ୍ତେନ ସ୍ଵେନ ତେଜସା ।
ଅଦୃଶ୍ୟତ ତତୋ ରାମୋ ବାଲଚଂଦ୍ର ଇଵୋଦିତଃ ॥ 15 ॥
ତତୋଽହଂ ମେଘସଂକାଶସ୍ତପ୍ତକାଂଚନକୁଂଡଲଃ ।
ବଲୀ ଦତ୍ତଵରୋଦର୍ପାଦାଜଗାମ ତଦାଶ୍ରମମ୍ ॥ 16 ॥
ତେନ ଦୃଷ୍ଟଃ ପ୍ରଵିଷ୍ଟୋଽହଂ ସହସୈଵୋଦ୍ୟତାୟୁଧଃ ।
ମାଂ ତୁ ଦୃଷ୍ଟ୍ଵା ଧନୁସ୍ସଜ୍ୟମସଂଭ୍ରାଂତଶ୍ଚକାର ସଃ ॥ 17 ॥
ଅଵଜାନନ୍ନହଂ ମୋହାଦ୍ବାଲୋଽୟମିତି ରାଘଵମ୍ ।
ଵିଶ୍ଵାମିତ୍ରସ୍ୟ ତାଂ ଵେଦିମଭ୍ୟଧାଵଂ କୃତତ୍ଵରଃ ॥ 18 ॥
ତେନ ମୁକ୍ତସ୍ତତୋ ବାଣଃ ଶିତଶ୍ଶତ୍ରୁନିବର୍ହଣଃ ।
ତେନାହଂ ତ୍ଵାହତଃ କ୍ଷିପ୍ତସ୍ସମୁଦ୍ରେ ଶତୟୋଜନେ ॥ 19 ॥
ନେଚ୍ଛତା ତାତ ମାଂ ହଂତୁଂ ତଦା ଵୀରେଣ ରକ୍ଷିତଃ ।
ରାମସ୍ୟ ଶରଵେଗେନ ନିରସ୍ତୋଽହମଚେତନଃ ॥ 20 ॥
ପାତିତୋଽହଂ ତଦା ତେନ ଗଂଭୀରେ ସାଗରାଂଭସି ।
ପ୍ରାପ୍ୟ ସଂଜ୍ଞାଂ ଚିରାତ୍ତାତ ଲଂକାଂ ପ୍ରତିଗତଃ ପୁରୀମ୍ ॥ 21 ॥
ଏଵମସ୍ମି ତଦା ମୁକ୍ତସ୍ସହାୟାସ୍ତୁ ନିପାତିତାଃ ।
ଅକୃତାସ୍ତ୍ରେଣ ବାଲେନ ରାମେଣାକ୍ଲିଷ୍ଟକର୍ମଣା ॥ 22 ॥
ତନ୍ମୟା ଵାର୍ୟମାଣସ୍ତ୍ଵଂ ୟଦି ରାମେଣ ଵିଗ୍ରହମ୍ ।
କରିଷ୍ୟସ୍ୟାପଦଂ ଘୋରାଂ କ୍ଷିପ୍ରଂ ପ୍ରାପ୍ସ୍ୟସି ରାଵଣ ॥ 23 ॥
କ୍ରୀଡାରତିଵିଧିଜ୍ଞାନାଂ ସମାଜୋତ୍ସଵଶାଲିନାମ୍ ।
ରକ୍ଷସାଂ ଚୈଵ ସଂତାପମନର୍ଥଂ ଚାହରିଷ୍ୟସି ॥ 24 ॥
ହର୍ମ୍ୟପ୍ରାସାଦସଂବାଧାଂ ନାନାରତ୍ନଵିଭୂଷିତାମ୍ ।
ଦ୍ରକ୍ଷ୍ୟସି ତ୍ଵଂ ପୁରୀଂ ଲଂକାଂ ଵିନଷ୍ଟାଂ ମୈଥିଲୀକୃତେ ॥ 25 ॥
ଅକୁର୍ଵଂତୋଽପି ପାପାନି ଶୁଚୟଃ ପାପସଂଶ୍ରୟାତ୍ ।
ପରପାପୈର୍ଵିନଶ୍ୟଂତି ମତ୍ସ୍ୟା ନାଗହ୍ରଦେ ୟଥା ॥ 26 ॥
ଦିଵ୍ୟଚଂଦନଦିଗ୍ଧାଂଗାଂଦିଵ୍ୟାଭରଣଭୂଷିତାନ୍ ।
ଦ୍ରକ୍ଷ୍ୟସ୍ୟଭିହତାନ୍ଭୂମୌ ତଵ ଦୋଷାତ୍ତୁ ରାକ୍ଷସାନ୍ ॥ 27 ॥
ହୃତଦାରାନ୍ ସଦାରାଂଶ୍ଚ ଦଶ ଵିଦ୍ରଵତୋ ଦିଶଃ ।
ହତଶେଷାନଶରଣାଂଦ୍ରକ୍ଷ୍ୟସି ତ୍ଵଂ ନିଶାଚରାନ୍ ॥ 28 ॥
ଶରଜାଲପରିକ୍ଷିପ୍ତାମଗ୍ନିଜ୍ଵାଲାସମାଵୃତାମ୍ ।
ପ୍ରଦଗ୍ଧଭଵନାଂ ଲଂକାଂ ଦ୍ରକ୍ଷ୍ୟସି ତ୍ଵଂ ନ ସଂଶୟଃ ॥ 29 ॥
ପରଦାରାଭିମର୍ଶାତ୍ତୁ ନାନ୍ୟତ୍ପାପତରଂ ମହତ୍ ।
ପ୍ରମଦାନାଂ ସହସ୍ରଂ ଚ ତଵ ରାଜନ୍ପରିଗ୍ରହଃ ॥ 30 ॥
ଭଵ ସ୍ଵଦାରନିରତସ୍ଵକୁଲଂ ରକ୍ଷ ରାକ୍ଷସ ।
ମାନମୃଦ୍ଧିଂ ଚ ରାଜ୍ୟଂ ଚ ଜୀଵିତଂ ଚେଷ୍ଟମାତ୍ମନଃ ॥ 31 ॥
କଲତ୍ରାଣି ଚ ସୌମ୍ୟାନି ମିତ୍ରଵର୍ଗଂ ତଥୈଵ ଚ ।
ୟଦୀଚ୍ଛସି ଚିରଂ ଭୋକ୍ତଂ ମା କୃଥା ରାମଵିପ୍ରିୟମ୍ ॥ 32 ॥
ନିଵାର୍ୟମାଣସ୍ସୁହୃଦା ମୟା ଭୃଶଂ ପ୍ରସହ୍ୟ ସୀତାଂ ୟଦି ଧର୍ଷୟିଷ୍ୟସି ।
ଗମିଷ୍ୟସି କ୍ଷୀଣବଲସ୍ସବାଂଧଵୋ ୟମକ୍ଷୟଂ ରାମଶରାତ୍ତଜୀଵିତଃ ॥ 33 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଅଷ୍ଟତ୍ରିଂଶସ୍ସର୍ଗଃ ॥
