શ્રીમદ્વાલ્મીકીય રામાયણે અરણ્યકાંડમ્ ।
અથ અષ્ટત્રિંશસ્સર્ગઃ ।
કદાચિદપ્યહં વીર્યાત્પર્યટન્પૃથિવીમિમામ્ ।
બલં નાગસહસ્રસ્ય ધારયન્પર્વતોપમઃ ॥ 1 ॥
નીલજીમૂતસંકાશસ્તપ્તકાંચનકુંડલઃ ।
ભયં લોકસ્ય જનયન્કિરીટી પરિઘાયુધઃ ॥ 2 ॥
વ્યચરં દંડકારણ્યે ઋષિમાંસાનિ ભક્ષયન્ ।
વિશ્વામિત્રોઽથ ધર્માત્મા મદ્વિત્રસ્તો મહામુનિઃ ॥ 3 ॥
સ્વયં ગત્વા દશરથં નરેંદ્રમિદમબ્રવીત્ ।
અદ્ય રક્ષતુ માં રામઃ પર્વકાલે સમાહિતઃ ॥ 4 ॥
મારીચાન્મે ભયં ઘોરં સમુત્પન્નં નરેશ્વર ।
ઇત્યેવમુક્તો ધર્માત્મા રાજા દશરથસ્તદા ॥ 5 ॥
પ્રત્યુવાચ મહાભાગં વિશ્વામિત્રં મહામુનિમ્ ।
બાલો દ્વાદશવર્ષોઽયમકૃતાસ્ત્રશ્ચ રાઘવઃ ॥ 6 ॥
કામં તુ મમ યત્સૈન્યં મયા સહ ગમિષ્યતિ ।
બલેન ચતુરંગેણ સ્વયમેત્ય નિશાચરાન્ ॥ 7 ॥
વધિષ્યામિ મુનિશ્રેષ્ઠ શત્રૂંસ્તે મનસેપ્સિતાન્ ।
ઇત્યેવમુક્તસ્સમુની રાજાનમિદમબ્રવીત્ ॥ 8 ॥
રામાન્નાન્યદ્બલં લોકે પર્યાપ્તં તસ્ય રક્ષસઃ ।
દેવતાનામપિ ભવાન્ સમરેષ્વભિપાલકઃ ॥ 9 ॥
આસીત્તવ કૃતં કર્મ ત્રિલોકે વિદિતં નૃપ ।
કામમસ્તુ મહત્સૈન્યં તિષ્ઠત્વિહ પરંતપ ॥ 10 ॥
બાલોઽપ્યેષ મહાતેજાસ્સમર્થસ્તસ્ય નિગ્રહે ।
ગમિષ્યે રામમાદાય સ્વસ્તિ તેઽસ્તુ પરંતપ ॥ 11 ॥
એવમુક્ત્વા તુ સ મુનિસ્તમાદાય નૃપાત્મજમ્ ।
જગામ પરમપ્રીતો વિશ્વામિત્રસ્સ્વમાશ્રમમ્ ॥ 12 ॥
તં તદા દંડકારણ્યે યજ્ઞમુદ્દિશ્ય દીક્ષિતમ્ ।
બભૂવોપસ્થિતો રામશ્ચિત્રં વિષ્ફારયંધનુઃ ॥ 13 ॥
અજાતવ્યંજનશ્રીમાન્પદ્મપત્રનિભેક્ષણઃ ।
એકવસ્ત્રધરો ધન્વી શિખી કનકમાલયા ॥ 14 ॥
શોભયન્ દંડકારણ્યં દીપ્તેન સ્વેન તેજસા ।
અદૃશ્યત તતો રામો બાલચંદ્ર ઇવોદિતઃ ॥ 15 ॥
તતોઽહં મેઘસંકાશસ્તપ્તકાંચનકુંડલઃ ।
બલી દત્તવરોદર્પાદાજગામ તદાશ્રમમ્ ॥ 16 ॥
તેન દૃષ્ટઃ પ્રવિષ્ટોઽહં સહસૈવોદ્યતાયુધઃ ।
માં તુ દૃષ્ટ્વા ધનુસ્સજ્યમસંભ્રાંતશ્ચકાર સઃ ॥ 17 ॥
અવજાનન્નહં મોહાદ્બાલોઽયમિતિ રાઘવમ્ ।
વિશ્વામિત્રસ્ય તાં વેદિમભ્યધાવં કૃતત્વરઃ ॥ 18 ॥
તેન મુક્તસ્તતો બાણઃ શિતશ્શત્રુનિબર્હણઃ ।
તેનાહં ત્વાહતઃ ક્ષિપ્તસ્સમુદ્રે શતયોજને ॥ 19 ॥
નેચ્છતા તાત માં હંતું તદા વીરેણ રક્ષિતઃ ।
રામસ્ય શરવેગેન નિરસ્તોઽહમચેતનઃ ॥ 20 ॥
પાતિતોઽહં તદા તેન ગંભીરે સાગરાંભસિ ।
પ્રાપ્ય સંજ્ઞાં ચિરાત્તાત લંકાં પ્રતિગતઃ પુરીમ્ ॥ 21 ॥
એવમસ્મિ તદા મુક્તસ્સહાયાસ્તુ નિપાતિતાઃ ।
અકૃતાસ્ત્રેણ બાલેન રામેણાક્લિષ્ટકર્મણા ॥ 22 ॥
તન્મયા વાર્યમાણસ્ત્વં યદિ રામેણ વિગ્રહમ્ ।
કરિષ્યસ્યાપદં ઘોરાં ક્ષિપ્રં પ્રાપ્સ્યસિ રાવણ ॥ 23 ॥
ક્રીડારતિવિધિજ્ઞાનાં સમાજોત્સવશાલિનામ્ ।
રક્ષસાં ચૈવ સંતાપમનર્થં ચાહરિષ્યસિ ॥ 24 ॥
હર્મ્યપ્રાસાદસંબાધાં નાનારત્નવિભૂષિતામ્ ।
દ્રક્ષ્યસિ ત્વં પુરીં લંકાં વિનષ્ટાં મૈથિલીકૃતે ॥ 25 ॥
અકુર્વંતોઽપિ પાપાનિ શુચયઃ પાપસંશ્રયાત્ ।
પરપાપૈર્વિનશ્યંતિ મત્સ્યા નાગહ્રદે યથા ॥ 26 ॥
દિવ્યચંદનદિગ્ધાંગાંદિવ્યાભરણભૂષિતાન્ ।
દ્રક્ષ્યસ્યભિહતાન્ભૂમૌ તવ દોષાત્તુ રાક્ષસાન્ ॥ 27 ॥
હૃતદારાન્ સદારાંશ્ચ દશ વિદ્રવતો દિશઃ ।
હતશેષાનશરણાંદ્રક્ષ્યસિ ત્વં નિશાચરાન્ ॥ 28 ॥
શરજાલપરિક્ષિપ્તામગ્નિજ્વાલાસમાવૃતામ્ ।
પ્રદગ્ધભવનાં લંકાં દ્રક્ષ્યસિ ત્વં ન સંશયઃ ॥ 29 ॥
પરદારાભિમર્શાત્તુ નાન્યત્પાપતરં મહત્ ।
પ્રમદાનાં સહસ્રં ચ તવ રાજન્પરિગ્રહઃ ॥ 30 ॥
ભવ સ્વદારનિરતસ્વકુલં રક્ષ રાક્ષસ ।
માનમૃદ્ધિં ચ રાજ્યં ચ જીવિતં ચેષ્ટમાત્મનઃ ॥ 31 ॥
કલત્રાણિ ચ સૌમ્યાનિ મિત્રવર્ગં તથૈવ ચ ।
યદીચ્છસિ ચિરં ભોક્તં મા કૃથા રામવિપ્રિયમ્ ॥ 32 ॥
નિવાર્યમાણસ્સુહૃદા મયા ભૃશં પ્રસહ્ય સીતાં યદિ ધર્ષયિષ્યસિ ।
ગમિષ્યસિ ક્ષીણબલસ્સબાંધવો યમક્ષયં રામશરાત્તજીવિતઃ ॥ 33 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે અષ્ટત્રિંશસ્સર્ગઃ ॥
