ശ്രീമദ്വാല്മീകീയ രാമായണേ അരണ്യകാംഡമ് ।
അഥ അഷ്ടത്രിംശസ്സര്ഗഃ ।
കദാചിദപ്യഹം വീര്യാത്പര്യടന്പൃഥിവീമിമാമ് ।
ബലം നാഗസഹസ്രസ്യ ധാരയന്പർവതോപമഃ ॥ 1 ॥
നീലജീമൂതസംകാശസ്തപ്തകാംചനകുംഡലഃ ।
ഭയം ലോകസ്യ ജനയന്കിരീടീ പരിഘായുധഃ ॥ 2 ॥
വ്യചരം ദംഡകാരണ്യേ ഋഷിമാംസാനി ഭക്ഷയന് ।
വിശ്വാമിത്രോഽഥ ധര്മാത്മാ മദ്വിത്രസ്തോ മഹാമുനിഃ ॥ 3 ॥
സ്വയം ഗത്വാ ദശരഥം നരേംദ്രമിദമബ്രവീത് ।
അദ്യ രക്ഷതു മാം രാമഃ പർവകാലേ സമാഹിതഃ ॥ 4 ॥
മാരീചാന്മേ ഭയം ഘോരം സമുത്പന്നം നരേശ്വര ।
ഇത്യേവമുക്തോ ധര്മാത്മാ രാജാ ദശരഥസ്തദാ ॥ 5 ॥
പ്രത്യുവാച മഹാഭാഗം വിശ്വാമിത്രം മഹാമുനിമ് ।
ബാലോ ദ്വാദശവര്ഷോഽയമകൃതാസ്ത്രശ്ച രാഘവഃ ॥ 6 ॥
കാമം തു മമ യത്സൈന്യം മയാ സഹ ഗമിഷ്യതി ।
ബലേന ചതുരംഗേണ സ്വയമേത്യ നിശാചരാന് ॥ 7 ॥
വധിഷ്യാമി മുനിശ്രേഷ്ഠ ശത്രൂംസ്തേ മനസേപ്സിതാന് ।
ഇത്യേവമുക്തസ്സമുനീ രാജാനമിദമബ്രവീത് ॥ 8 ॥
രാമാന്നാന്യദ്ബലം ലോകേ പര്യാപ്തം തസ്യ രക്ഷസഃ ।
ദേവതാനാമപി ഭവാന് സമരേഷ്വഭിപാലകഃ ॥ 9 ॥
ആസീത്തവ കൃതം കര്മ ത്രിലോകേ വിദിതം നൃപ ।
കാമമസ്തു മഹത്സൈന്യം തിഷ്ഠത്വിഹ പരംതപ ॥ 10 ॥
ബാലോഽപ്യേഷ മഹാതേജാസ്സമര്ഥസ്തസ്യ നിഗ്രഹേ ।
ഗമിഷ്യേ രാമമാദായ സ്വസ്തി തേഽസ്തു പരംതപ ॥ 11 ॥
ഏവമുക്ത്വാ തു സ മുനിസ്തമാദായ നൃപാത്മജമ് ।
ജഗാമ പരമപ്രീതോ വിശ്വാമിത്രസ്സ്വമാശ്രമമ് ॥ 12 ॥
തം തദാ ദംഡകാരണ്യേ യജ്ഞമുദ്ദിശ്യ ദീക്ഷിതമ് ।
ബഭൂവോപസ്ഥിതോ രാമശ്ചിത്രം വിഷ്ഫാരയംധനുഃ ॥ 13 ॥
അജാതവ്യംജനശ്രീമാന്പദ്മപത്രനിഭേക്ഷണഃ ।
ഏകവസ്ത്രധരോ ധന്വീ ശിഖീ കനകമാലയാ ॥ 14 ॥
ശോഭയന് ദംഡകാരണ്യം ദീപ്തേന സ്വേന തേജസാ ।
അദൃശ്യത തതോ രാമോ ബാലചംദ്ര ഇവോദിതഃ ॥ 15 ॥
തതോഽഹം മേഘസംകാശസ്തപ്തകാംചനകുംഡലഃ ।
ബലീ ദത്തവരോദര്പാദാജഗാമ തദാശ്രമമ് ॥ 16 ॥
തേന ദൃഷ്ടഃ പ്രവിഷ്ടോഽഹം സഹസൈവോദ്യതായുധഃ ।
മാം തു ദൃഷ്ട്വാ ധനുസ്സജ്യമസംഭ്രാംതശ്ചകാര സഃ ॥ 17 ॥
അവജാനന്നഹം മോഹാദ്ബാലോഽയമിതി രാഘവമ് ।
വിശ്വാമിത്രസ്യ താം വേദിമഭ്യധാവം കൃതത്വരഃ ॥ 18 ॥
തേന മുക്തസ്തതോ ബാണഃ ശിതശ്ശത്രുനിബര്ഹണഃ ।
തേനാഹം ത്വാഹതഃ ക്ഷിപ്തസ്സമുദ്രേ ശതയോജനേ ॥ 19 ॥
നേച്ഛതാ താത മാം ഹംതും തദാ വീരേണ രക്ഷിതഃ ।
രാമസ്യ ശരവേഗേന നിരസ്തോഽഹമചേതനഃ ॥ 20 ॥
പാതിതോഽഹം തദാ തേന ഗംഭീരേ സാഗരാംഭസി ।
പ്രാപ്യ സംജ്ഞാം ചിരാത്താത ലംകാം പ്രതിഗതഃ പുരീമ് ॥ 21 ॥
ഏവമസ്മി തദാ മുക്തസ്സഹായാസ്തു നിപാതിതാഃ ।
അകൃതാസ്ത്രേണ ബാലേന രാമേണാക്ലിഷ്ടകര്മണാ ॥ 22 ॥
തന്മയാ വാര്യമാണസ്ത്വം യദി രാമേണ വിഗ്രഹമ് ।
കരിഷ്യസ്യാപദം ഘോരാം ക്ഷിപ്രം പ്രാപ്സ്യസി രാവണ ॥ 23 ॥
ക്രീഡാരതിവിധിജ്ഞാനാം സമാജോത്സവശാലിനാമ് ।
രക്ഷസാം ചൈവ സംതാപമനര്ഥം ചാഹരിഷ്യസി ॥ 24 ॥
ഹര്മ്യപ്രാസാദസംബാധാം നാനാരത്നവിഭൂഷിതാമ് ।
ദ്രക്ഷ്യസി ത്വം പുരീം ലംകാം വിനഷ്ടാം മൈഥിലീകൃതേ ॥ 25 ॥
അകുർവംതോഽപി പാപാനി ശുചയഃ പാപസംശ്രയാത് ।
പരപാപൈർവിനശ്യംതി മത്സ്യാ നാഗഹ്രദേ യഥാ ॥ 26 ॥
ദിവ്യചംദനദിഗ്ധാംഗാംദിവ്യാഭരണഭൂഷിതാന് ।
ദ്രക്ഷ്യസ്യഭിഹതാന്ഭൂമൌ തവ ദോഷാത്തു രാക്ഷസാന് ॥ 27 ॥
ഹൃതദാരാന് സദാരാംശ്ച ദശ വിദ്രവതോ ദിശഃ ।
ഹതശേഷാനശരണാംദ്രക്ഷ്യസി ത്വം നിശാചരാന് ॥ 28 ॥
ശരജാലപരിക്ഷിപ്താമഗ്നിജ്വാലാസമാവൃതാമ് ।
പ്രദഗ്ധഭവനാം ലംകാം ദ്രക്ഷ്യസി ത്വം ന സംശയഃ ॥ 29 ॥
പരദാരാഭിമര്ശാത്തു നാന്യത്പാപതരം മഹത് ।
പ്രമദാനാം സഹസ്രം ച തവ രാജന്പരിഗ്രഹഃ ॥ 30 ॥
ഭവ സ്വദാരനിരതസ്വകുലം രക്ഷ രാക്ഷസ ।
മാനമൃദ്ധിം ച രാജ്യം ച ജീവിതം ചേഷ്ടമാത്മനഃ ॥ 31 ॥
കലത്രാണി ച സൌമ്യാനി മിത്രവര്ഗം തഥൈവ ച ।
യദീച്ഛസി ചിരം ഭോക്തം മാ കൃഥാ രാമവിപ്രിയമ് ॥ 32 ॥
നിവാര്യമാണസ്സുഹൃദാ മയാ ഭൃശം പ്രസഹ്യ സീതാം യദി ധര്ഷയിഷ്യസി ।
ഗമിഷ്യസി ക്ഷീണബലസ്സബാംധവോ യമക്ഷയം രാമശരാത്തജീവിതഃ ॥ 33 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ അഷ്ടത്രിംശസ്സര്ഗഃ ॥
