ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഏകോനചത്വാരിംശസ്സര്ഗഃ ।
ഏവമസ്മി തദാ മുക്തഃ കഥംചിത്തേന സംയുഗേ ।
ഇദാനീമപി യദ്വൃത്തം തച്ഛൃണുഷ്വ നിരുത്തരമ് ॥ 1 ॥
രാക്ഷസാഭ്യാമഹം ദ്വാഭ്യാമനിർവിണ്ണസ്തഥാ കൃതഃ ।
സഹിതോ മൃഗരൂപാഭ്യാം പ്രവിഷ്ടോ ദംഡകാവനമ് ॥ 2 ॥
ദീപ്തജിഹ്വോ മഹാകായസ്തീക്ഷ്ണദംഷ്ട്രോ മഹാബലഃ ।
വ്യചരം ദംഡകാരണ്യം മാംസഭക്ഷോ മഹാമൃഗഃ ॥ 3 ॥
അഗ്നിഹോത്രേഷു തീര്ഥേഷു ചൈത്യവൃക്ഷേഷു രാവണ ।
അത്യംതഘോരോ വ്യചരം താപസാന്സംപ്രധര്ഷയന് ॥ 4 ॥
നിഹത്യ ദംഡകാരണ്യേ താപസാംധര്മചാരിണഃ ।
രുധിരാണി പിബംസ്തേഷാം തഥാ മാംസാനി ഭക്ഷയന് ॥ 5 ॥
ഋഷിമാംസാശനഃ ക്രൂരസ്ത്രാസയന്വനഗോചരാന് ।
തഥാ രുധിരമത്തോഽഹം വിചരംധര്മദൂഷകഃ ॥ 6 ॥
ആസാദയം തദാ രാമം താപസം ധര്മചാരിണമ് ।
വൈദേഹീം ച മഹാഭാഗാം ലക്ഷ്മണം ച മഹാരഥമ് ॥ 7 ॥
താപസം നിയതാഹാരം സർവഭൂതഹിതേ രതമ് ।
സോഽഹം വനഗതം രാമം പരിഭൂയ മഹാബലമ് ॥ 8 ॥
താപസോഽയമിതി ജ്ഞാത്വാ പൂർവവൈരമനുസ്മരന് ।
അഭ്യധാവം ഹി സംക്രുദ്ധസ്തീക്ഷ്ണ ശൃംഗോ മൃഗാകൃതിഃ ॥ 9 ॥
ജിഘാംസുരകൃതപ്രജ്ഞസ്തം പ്രഹാരമനുസ്മരന് ।
തേന മുക്താസ്ത്രയോ ബാണാശ്ശിതാശ്ശത്രുനിബര്ഹണാഃ ॥ 10 ॥
വികൃഷ്യ ബലവച്ചാപം സുപര്ണാനിലനിസ്സ്വനാഃ ।
തേ ബാണാ വജ്രസംകാശാസ്സുമുക്താ രക്തഭോജനാഃ ।
ആജഗ്മുസ്സഹിതാസ്സർവേ ത്രയസ്സന്നതപർവണഃ ॥ 11 ॥
പരാക്രമജ്ഞോ രാമസ്യ ശഠോ ദൃഷ്ടഭയഃ പുരാ ।
സമുദ്ഭാംതസ്തതോമുക്തസ്താവുഭൌ രാക്ഷസൌ ഹതൌ ॥ 12 ॥
ശരേണ മുക്തോ രാമസ്യ കഥംചിത്പ്രാപ്യ ജീവിതമ് ।
ഇഹ പ്രവ്രാജിതോ യുക്തസ്താപസോഽഹം സമാഹിതഃ ॥ 13 ॥
വൃക്ഷേ വൃക്ഷേ ച പശ്യാമി ചീരകൃഷ്ണാജിനാംബരമ് ।
ഗൃഹീതധനുഷം രാമം പാശഹസ്തമിവാംതകമ് ॥ 14 ॥
അപി രാമസഹസ്രാണി ഭീതഃ പശ്യാമി രാവണ ।
രാമഭൂതമിദം സർവമരണ്യം പ്രതിഭാതി മേ ॥ 15 ॥
രാമമേവ ഹി പശ്യാമി രഹിതേ രാക്ഷസാധിപ ।
ദൃഷ്ട്വാ സ്വപ്നഗതം രാമമുദ്ഭ്രമാമി വിചേതനഃ ॥ 16 ॥
രകാരാദീനി നാമാനി രാമത്രസ്തസ്യ രാവണ ।
രത്നാനി ച രഥാശ്ചൈവ ത്രാസം സംജനയംതി മേ ॥ 17 ॥
അഹം തസ്യ പ്രഭാവജ്ഞോ ന യുദ്ധം തേന തേ ക്ഷമമ് ।
ബലിം വാ നമുചിം വാപി ഹന്യാദ്ധി രഘുനംദനഃ ॥ 18 ॥
രണേ രാമേണ യുദ്ധ്യസ്വ ക്ഷമാം വാ കുരു രാക്ഷസ ।
ന തേ രാമകഥാ കാര്യാ യദി മാം ദ്രഷ്ടുമിച്ഛസി ॥ 19 ॥
ബഹവസ്സാധവോ ലോകേ യുക്താ ധര്മമനുഷ്ഠിതാഃ ।
പരേഷാമപരാധേന വിനഷ്ഠാസ്സപരിച്ഛദാഃ ॥ 20 ॥
സോഽഽഹം തവാപരാധേന വിനശ്യേയം നിശാചര ।
കുരു യത്തേ ക്ഷമം തത്ത്വമഹം ത്വാ നാനുയാമി ഹ ॥ 21 ॥
രാമശ്ച ഹി മഹാതേജാ മഹാസത്ത്വോ മഹാബലഃ ॥ 22 ॥
അപി രാക്ഷസലോകസ്യ ന ഭവേദംതകോഽപി സഃ ।
യദി ശൂര്പണഖാഹേതോര്ജനസ്ഥാനഗതഃ ഖരഃ ॥ 23 ॥
അതിവൃത്തോ ഹതഃ പൂർവം രാമേണാക്ലിഷ്ടകര്മണാ ।
അത്ര ബ്രൂഹി യഥാതത്ത്വം കോ രാമസ്യ വ്യതിക്രമഃ ॥ 24 ॥
ഇദം വചോ ബംധുഹിതാര്ഥിനാമയാ യഥോച്യമാനം യദി നാഭിപത്സ്യസേ ।
സബാംധവസ്ത്യക്ഷ്യസി ജീവിതം രണേ ഹതോഽഽദ്യ രാമേണ ശരൈരജിഹ്മഗൈഃ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഏകോനചത്വാരിംശസ്സര്ഗഃ ॥
