ശ്രീമദ്വാല്മീകീയ രാമായണേ അരണ്യകാംഡമ് ।
അഥ ചതുര്ഥസ്സര്ഗഃ ।
ഹ്രിയമാണൌ തു തൌ ദൃഷ്ട്വാ വൈദേഹീ രാമലക്ഷ്മണൌ ।
ഉച്ചൈസ്സ്വരേണ ചുക്രോശ പ്രഗൃഹ്യ സുമഹാജാഭുജൌ ॥ 1 ॥
ഏഷ ദാശരഥീ രാമഃ സത്യവാന് ശീലവാന് ശുചിഃ ।
രക്ഷസാ രൌദ്രരൂപേണ ഹ്രിയതേ സഹലക്ഷ്മണഃ ॥ 2 ॥
മാമൃകാ ഭക്ഷയിഷ്യംതി ശാര്ദൂലാദ്വീപിനസ്തഥാ ।
മാം ഹരോത്സൃജ കാകുത്സ്ഥൌ നമസ്തേ രാക്ഷസോത്തമ ॥ 3 ॥
തസ്യാസ്തദ്വചനം ശ്രുത്വാ വൈദേഹ്യാ രാമലക്ഷ്മണൌ ।
വേഗം പ്രചക്രതുർവീരൌ വധേ തസ്യ ദുരാത്മനഃ ॥ 4 ॥
തസ്യ രൌദ്രസ്യ സൌമിത്രിഃ സവ്യം ബാഹും ബഭംജ ഹ ।
രാമസ്തു ദക്ഷിണം ബാഹും തരസാ തസ്യ രക്ഷസഃ ॥ 5 ॥
സ ഭഗ്നബാഹുസ്സവിഗ്നോ നിപപാതാശു രാക്ഷസഃ ।
ധരണ്യാം മേഘസംകാശോ വജ്രഭിന്ന ഇവാചലഃ ॥ 6 ॥
മുഷ്ടിഭിര്ജാനുഭിഃ പദ്ഭിഃ സൂദയംതൌ തു രാക്ഷസമ് ।
ഉദ്യമ്യോദ്യമ്യ ചാപ്യേനം സ്ഥംഡിലേ നിഷ്പിപേഷതുഃ ॥ 7 ॥
സ വിദ്ധോ ബഹുഭിര്ബാണൈഃ ഖംഗാഭ്യാം ച പരിക്ഷതഃ ।
നിഷ്പിഷ്ടോ ബഹുധാ ഭൂമൌ ന മമാര സ രാക്ഷസഃ ॥ 8 ॥
തം പ്രേക്ഷ്യ രാമഃ സുഭൃശമവധ്യമചലോപമമ് ।
ഭയേഷ്വഭയദശ്ശ്രീമാനിദം വചനമബ്രവീത് ॥ 9 ॥
തപസാ പുരുഷവ്യാഘ്ര രാക്ഷസോഽയം ന ശക്യതേ ।
ശസ്ത്രേണ യുധി നിര്ജേതും രാക്ഷസം നിഖനാവഹേ ॥ 10 ॥
കുംജരസ്യേവ രൌദ്രസ്യ രാക്ഷസസ്യാസ്യ ലക്ഷ്മണ ।
വനേഽസ്മിന് സുമഹച്ഛ്വഭ്രം ഖന്യതാം രൌദ്രവര്ചസഃ ॥ 11 ॥
ഇത്യുക്ത്വാ ലക്ഷ്മണം രാമഃ പ്രദരഃ ഖന്യതാമിതി ।
തസ്ഥൌ വിരാധമാക്രമ്യ കംഠേ പാദേന വീര്യവാന് ॥ 12 ॥
തച്ഛ്രുത്വാ രാഘവേണോക്തം രാക്ഷസഃ പ്രശ്രിതം വചഃ ।
ഇദം പ്രോവാച കാകുത്ഥ്സം വിരാധഃ പുരുഷര്ഷഭമ് ॥ 13 ॥
ഹതോഽസ്മി പുരുഷവ്യാഘ്ര ശക്രതുല്യബലേന വൈ ।
മയാ തു പൂർവം ത്വം മോഹാന്ന ജ്ഞാതഃ പുരുഷര്ഷഭ ॥ 14 ॥
കൌസല്യാസുപ്രജാ രാമ താതസ്ത്വം വിദിതോ മയാ ।
വൈദേഹീ ച മഹാഭാഗാ ലക്ഷ്മണശ്ച മഹായശാഃ ॥ 15 ॥
അഭിശാപാദഹം ഘോരാം പ്രവിഷ്ടോ രാക്ഷസീം തനുമ് ।
തുംബുരുര്നാമ ഗംധർവഃ ശപ്തോ വൈശ്രവണേന ഹ ॥ 16 ॥
പ്രസാദ്യമാനശ്ച മയാ സോഽബ്രവീന്മാം മഹായശാഃ ।
യദാ ദാശരഥീ രാമസ്ത്വാം വധിഷ്യതി സംയുഗേ ।
തദാ പ്രകൃതിമാപന്നോ ഭവാന്സ്വര്ഗം ഗമിഷ്യതി ॥ 17 ॥
അനുപസ്ഥീയമാനോ മാം സ ക്രുദ്ധോ വ്യാജഹാര ഹ ।
ഇതി വൈശ്രവണോ രാജാ രംഭാസക്തമുവാച ഹ ॥ 18 ॥
തവ പ്രസാദാന്മുക്തോഽഹമിഹശാപാത്സുദാരുണാത് ।
ഭുവനം സ്വം ഗമിഷ്യാമി സ്വസ്തി വോഽസ്തു പരംതപ ॥ 19 ॥
ഇതോ വസതി ധര്മാത്മാ ശരഭംഗഃ പ്രതാപവാന് ॥ 20 ॥
അധ്യര്ധയോജനേ താത മഹര്ഷിസ്സൂര്യസന്നിഭഃ ।
തം ക്ഷിപ്രമധിഗച്ഛ ത്വം സ തേ ശ്രേയോഽഭിധാസ്യതി ॥ 21 ॥
അവടേ ചാപി മാം രാമ പ്രക്ഷിപ്യ കുശലീ വ്രജ ।
രക്ഷസാം ഗതസത്ത്വാനാമേഷ ധര്മസ്സസനാതനഃ ।
അവടേ യേ നിധീയംതേ തേഷാം ലോകാസ്സനാതനാഃ ॥ 22 ॥
ഏവമുക്ത്വാ തു കാകുത്ഥ്സം വിരാധശ്ശരപീഡിതഃ ।
ബഭൂവ സ്വര്ഗസംപ്രാപ്തോ ന്യസ്തദേഹോ മഹാബലഃ ॥ 23 ॥
തച്ഛ്രുത്വാ രാഘവോ വാക്യം ലക്ഷ്മണം വ്യാദിദേശ ഹ ।
കുംജരസ്യേവ രൌദ്രസ്യ രാക്ഷസസ്യാസ്യ ലക്ഷ്മണ ॥ 24 ॥
വനേഽസ്മിന് സുമഹച്ഛ്വഭ്രം ഖന്യതാം രൌദകര്മണഃ ।
ഇത്യുക്ത്വാ ലക്ഷ്മണം രാമഃ പ്രദരഃ ഖന്യതാമിതി ।
തസ്ഥൌ വിരാധമാക്രമ്യ കംഠേ പാദേന വീര്യവാന് ॥ 25 ॥
തതഃ ഖനിത്രമാദായ ലക്ഷ്മണശ്ശ്വഭ്രമുത്തമമ് ।
അഖനത്പാര്ശ്വതസ്തസ്യ വിരാധസ്യ മഹാത്മനഃ ॥ 26 ॥
തം മുക്തകംഠംനിക്ഷിപ്യ ശംകുകര്ണം മഹാസ്വനമ് ।
വിരാധം പ്രാക്ഷിപച്ഛ്വഭ്രേ നദംതം ഭൈരവസ്വനമ് ॥ 27 ॥
തമാഹവേ ദാരുണമാശുവിക്രമൌ സ്ഥിരാവുഭൌ സംയതി രാമലക്ഷ്മണൌ ।
മുദാന്വിതൌ ചിക്ഷിപതുര്ഭയാവഹം നദംതമുത്ക്ഷിപ്യ ബിലേ തു രാക്ഷസമ് ॥ 28 ॥
അവധ്യതാം പ്രേക്ഷ്യ മഹാസുരസ്യ തൌ ശിതേന ശസ്ത്രേണ തദാ നരര്ഷഭൌ ।
സമര്ഥ്യ ചാത്യര്ഥവിശാരദാവുഭൌ ബിലേ വിരാധസ്യ വധം പ്രചക്രതുഃ ॥ 29 ॥
സ്വയം വിരാധേന ഹി മൃത്യുരാത്മനഃ പ്രസഹ്യ രാമേണ യഥാര്ഥമീപ്സിതഃ ।
നിവേദിതഃ കാനനചാരിണാ സ്വയം ന മേ വധഃ ശസ്ത്രകൃതോ ഭവേദിതി ॥ 30 ॥
തദേവ രാമേണ നിശമ്യ ഭാഷിതം കൃതാ മതിസ്തസ്യ ബിലപ്രവേശനേ ।
ബിലം ച രാമേണാതിബലേന രക്ഷസാ പ്രവേശ്യമാനേന വനം വിനാദിതമ് ॥ 31 ॥
പ്രഹൃഷ്ടരൂപാവിവ രാമലക്ഷ്മണൌ വിരാധമുർവ്യാ പ്രദരേ നിഹത്യ തൌ ।
നനംദതുർവീതഭയൌ മഹാവനേ ശിലാഭിരംതര്ദധതുശ്ച രാക്ഷസമ് ॥ 32 ॥
തതസ്തു തൌ കാംചനചിത്രകാര്മുകൌ നിഹത്യ രക്ഷഃ പരിഗൃഹ്യ മൈഥിലീമ് ।
വിജഹ്രതു സ്തൌ മുദിതൌ മഹാവനേ ദിവി സ്ഥിതൌ ചംദ്രദിവാകരാവിവ ॥ 33 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ചതുര്ഥസ്സര്ഗഃ ॥
