śrīmadvālmīkīya rāmāyaṇē araṇyakāṇḍam ।
atha chatvāriṃśassargaḥ ।
mārīchēna tu tadvākyaṃ kṣamaṃ yuktaṃ cha niśācharaḥ ।
uktō na pratijagrāha martukāma ivauṣadham ॥ 1 ॥
taṃ pathyahitavaktāraṃ mārīchaṃ rākṣasādhipaḥ ।
abravītparuṣaṃ vākyamayuktaṃ kālachōditaḥ ॥ 2 ॥
yatkilaitadayuktārthaṃ mārīcha mayi kathyatē ।
vākyaṃ niṣphalamatyarthamuptaṃ bījamivōṣarē ॥ 3 ॥
tvadvākyairna tu māṃ śakyaṃ bhēttuṃ rāmasya saṃyugē ।
pāpaśīlasya mūrkhasya mānuṣasya viśēṣataḥ ॥ 4 ॥
yastyaktvā suhṛdō rājyaṃ mātaraṃ pitaraṃ tathā ।
strīvākyaṃ prākṛtaṃ śrutvā vanamēkapadē gataḥ ॥ 5 ॥
avaśyantu mayā tasya saṃyugē kharaghātinaḥ ।
prāṇaiḥ priyatarā sītā hartavyā tava sannidhau ॥ 6 ॥
ēvaṃ mē niśchitā buddhirhṛdi mārīcha vartatē ।
na vyāvartayituṃ śakyā sēndrairapi surāsuraiḥ ॥ 7 ॥
dōṣaṃ guṇaṃ vā sampṛṣṭastvamēvaṃ vaktumarhasi ।
apāyaṃ vāpyupāyaṃ vā kāryasyāsya viniśchayē ॥ 8 ॥
sampṛṣṭēna tu vaktavyaṃ sachivēna vipaśchitā ।
udyatāñjalinā rājñē ya ichChēdbhūtimātmanaḥ ॥ 9 ॥
vākyamapritakūlaṃ tu mṛdupūrvaṃ hitaṃ śubham ।
upachārēṇa yuktaṃ cha vaktavyō vasudhādhipaḥ ॥ 10 ॥
sāvamardaṃ tu yadvākyaṃ mārīcha hitamuchyatē ।
nābhinandati tadrājā mānārhō mānavarjitam ॥ 11 ॥
pañcha rūpāṇi rājānō dhārayantyamitaujasaḥ ।
agnērindrasya sōmasya varuṇasya yamasya cha ॥ 12 ॥
auṣṇyaṃ tathā vikramaṃ cha saumyaṃ daṇḍaṃ prasannatām ।
dhārayanti mahātmānō rājānaḥ kṣaṇadāchara ॥ 13 ॥
tasmātsarvāsvavasthāsu mānyāḥ pūjyāścha pārthivāḥ ।
tvaṃ tu dharmamavijñāya kēvalaṃ mōhamāsthitaḥ ।
abhyāgataṃ māṃ daurātmyātparuṣaṃ vaktumichChasi ॥ 14 ॥
guṇadōṣau na pṛchChāmi kṣamaṃ chātmani rākṣasa ।
mayōktaṃ tava chaitāvatsampratyamitavikramaḥ ॥ 15 ॥
asmiṃstu tvaṃ mahākṛtyē sāhāyyaṃ kartumarhasi ।
śṛṇu tatkarma sāhāyyē yatkāryaṃ vachanānmama ॥ 16 ॥
sauvarṇastvaṃ mṛgō bhūtvā chitrō rajatabindubhiḥ ।
āśramē tasya rāmasya sītāyāḥ pramukhē chara ॥ 17 ॥
sauvarṇastvaṃ mṛgō bhūtvā chitrō rajatabindubhiḥ ।
āśramē tasya rāmasya sītāyāḥ pramukhē chara ।
pralōbhayitvā vaidēhīṃ yathēṣṭaṃ gantumarhasi ॥ 18 ॥
tvāṃ tu māyāmṛgaṃ dṛṣṭvā kāñchanaṃ jātavismayā ।
ānayainamiti kṣipraṃ rāmaṃ vakṣyati maithilī ॥ 19 ॥
apakrāntē tu kākutsthē dūraṃ yātvāpyudāhara ।
hā sītē lakṣmaṇētyēvaṃ rāmavākyānurūpakam ॥ 20 ॥
tachChrutvā rāmapadavīṃ sītayā cha prachōditaḥ ।
anugachChati sambhrāntaḥ saumitrirapi sauhṛdāt ॥ 21 ॥
apakrāntē cha kākutsthē lakṣmaṇē cha yathāsukham ।
ānayiṣyāmi vaidēhīṃ sahasrākṣaśśachīmiva ॥ 22 ॥
ēvaṃ kṛtvā tvidaṃ kāryaṃ yathēṣṭaṃ gachCha rākṣasa ।
rājyasyārdhaṃ prayachChāmi mārīcha tava suvrata ॥ 23 ॥
gachCha saumya śivaṃ mārgaṃ kāryasyāsya vivṛddhayē ।
ahaṃ tvānugamiṣyāmi sarathō daṇḍakāvanam ॥ 24 ॥
prāpya sītāmayuddhēna vañchayitvā tu rāghavam ।
laṅkāṃ pratigamiṣyāmi kṛtakāryassaha tvayā ॥ 25 ॥
na chētkarōṣi mārīcha hanmi tvāmahamadya vai ।
ētatkāryamavaśyaṃ mē balādapi kariṣyasi ।
rājñō hi pratikūlasthō na jātu sukhamēdhatē ॥ 26 ॥
āsādya taṃ jīvitasaṃśayastē mṛtyurdhruvō hyadya mayā virudhya ।
ētadyathāvatpratigṛhya buddhyā yadatra pathyaṃ kuru tattathā tvam ॥ 27 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē chatvāriṃśassargaḥ ॥
