ശ്രീമദ്വാല്മീകീയ രാമായണേ അരണ്യകാംഡമ് ।
അഥ ചത്വാരിംശസ്സര്ഗഃ ।
മാരീചേന തു തദ്വാക്യം ക്ഷമം യുക്തം ച നിശാചരഃ ।
ഉക്തോ ന പ്രതിജഗ്രാഹ മര്തുകാമ ഇവൌഷധമ് ॥ 1 ॥
തം പഥ്യഹിതവക്താരം മാരീചം രാക്ഷസാധിപഃ ।
അബ്രവീത്പരുഷം വാക്യമയുക്തം കാലചോദിതഃ ॥ 2 ॥
യത്കിലൈതദയുക്താര്ഥം മാരീച മയി കഥ്യതേ ।
വാക്യം നിഷ്ഫലമത്യര്ഥമുപ്തം ബീജമിവോഷരേ ॥ 3 ॥
ത്വദ്വാക്യൈര്ന തു മാം ശക്യം ഭേത്തും രാമസ്യ സംയുഗേ ।
പാപശീലസ്യ മൂര്ഖസ്യ മാനുഷസ്യ വിശേഷതഃ ॥ 4 ॥
യസ്ത്യക്ത്വാ സുഹൃദോ രാജ്യം മാതരം പിതരം തഥാ ।
സ്ത്രീവാക്യം പ്രാകൃതം ശ്രുത്വാ വനമേകപദേ ഗതഃ ॥ 5 ॥
അവശ്യംതു മയാ തസ്യ സംയുഗേ ഖരഘാതിനഃ ।
പ്രാണൈഃ പ്രിയതരാ സീതാ ഹര്തവ്യാ തവ സന്നിധൌ ॥ 6 ॥
ഏവം മേ നിശ്ചിതാ ബുദ്ധിര്ഹൃദി മാരീച വര്തതേ ।
ന വ്യാവര്തയിതും ശക്യാ സേംദ്രൈരപി സുരാസുരൈഃ ॥ 7 ॥
ദോഷം ഗുണം വാ സംപൃഷ്ടസ്ത്വമേവം വക്തുമര്ഹസി ।
അപായം വാപ്യുപായം വാ കാര്യസ്യാസ്യ വിനിശ്ചയേ ॥ 8 ॥
സംപൃഷ്ടേന തു വക്തവ്യം സചിവേന വിപശ്ചിതാ ।
ഉദ്യതാംജലിനാ രാജ്ഞേ യ ഇച്ഛേദ്ഭൂതിമാത്മനഃ ॥ 9 ॥
വാക്യമപ്രിതകൂലം തു മൃദുപൂർവം ഹിതം ശുഭമ് ।
ഉപചാരേണ യുക്തം ച വക്തവ്യോ വസുധാധിപഃ ॥ 10 ॥
സാവമര്ദം തു യദ്വാക്യം മാരീച ഹിതമുച്യതേ ।
നാഭിനംദതി തദ്രാജാ മാനാര്ഹോ മാനവര്ജിതമ് ॥ 11 ॥
പംച രൂപാണി രാജാനോ ധാരയംത്യമിതൌജസഃ ।
അഗ്നേരിംദ്രസ്യ സോമസ്യ വരുണസ്യ യമസ്യ ച ॥ 12 ॥
ഔഷ്ണ്യം തഥാ വിക്രമം ച സൌമ്യം ദംഡം പ്രസന്നതാമ് ।
ധാരയംതി മഹാത്മാനോ രാജാനഃ ക്ഷണദാചര ॥ 13 ॥
തസ്മാത്സർവാസ്വവസ്ഥാസു മാന്യാഃ പൂജ്യാശ്ച പാര്ഥിവാഃ ।
ത്വം തു ധര്മമവിജ്ഞായ കേവലം മോഹമാസ്ഥിതഃ ।
അഭ്യാഗതം മാം ദൌരാത്മ്യാത്പരുഷം വക്തുമിച്ഛസി ॥ 14 ॥
ഗുണദോഷൌ ന പൃച്ഛാമി ക്ഷമം ചാത്മനി രാക്ഷസ ।
മയോക്തം തവ ചൈതാവത്സംപ്രത്യമിതവിക്രമഃ ॥ 15 ॥
അസ്മിംസ്തു ത്വം മഹാകൃത്യേ സാഹായ്യം കര്തുമര്ഹസി ।
ശൃണു തത്കര്മ സാഹായ്യേ യത്കാര്യം വചനാന്മമ ॥ 16 ॥
സൌവര്ണസ്ത്വം മൃഗോ ഭൂത്വാ ചിത്രോ രജതബിംദുഭിഃ ।
ആശ്രമേ തസ്യ രാമസ്യ സീതായാഃ പ്രമുഖേ ചര ॥ 17 ॥
സൌവര്ണസ്ത്വം മൃഗോ ഭൂത്വാ ചിത്രോ രജതബിംദുഭിഃ ।
ആശ്രമേ തസ്യ രാമസ്യ സീതായാഃ പ്രമുഖേ ചര ।
പ്രലോഭയിത്വാ വൈദേഹീം യഥേഷ്ടം ഗംതുമര്ഹസി ॥ 18 ॥
ത്വാം തു മായാമൃഗം ദൃഷ്ട്വാ കാംചനം ജാതവിസ്മയാ ।
ആനയൈനമിതി ക്ഷിപ്രം രാമം വക്ഷ്യതി മൈഥിലീ ॥ 19 ॥
അപക്രാംതേ തു കാകുത്സ്ഥേ ദൂരം യാത്വാപ്യുദാഹര ।
ഹാ സീതേ ലക്ഷ്മണേത്യേവം രാമവാക്യാനുരൂപകമ് ॥ 20 ॥
തച്ഛ്രുത്വാ രാമപദവീം സീതയാ ച പ്രചോദിതഃ ।
അനുഗച്ഛതി സംഭ്രാംതഃ സൌമിത്രിരപി സൌഹൃദാത് ॥ 21 ॥
അപക്രാംതേ ച കാകുത്സ്ഥേ ലക്ഷ്മണേ ച യഥാസുഖമ് ।
ആനയിഷ്യാമി വൈദേഹീം സഹസ്രാക്ഷശ്ശചീമിവ ॥ 22 ॥
ഏവം കൃത്വാ ത്വിദം കാര്യം യഥേഷ്ടം ഗച്ഛ രാക്ഷസ ।
രാജ്യസ്യാര്ധം പ്രയച്ഛാമി മാരീച തവ സുവ്രത ॥ 23 ॥
ഗച്ഛ സൌമ്യ ശിവം മാര്ഗം കാര്യസ്യാസ്യ വിവൃദ്ധയേ ।
അഹം ത്വാനുഗമിഷ്യാമി സരഥോ ദംഡകാവനമ് ॥ 24 ॥
പ്രാപ്യ സീതാമയുദ്ധേന വംചയിത്വാ തു രാഘവമ് ।
ലംകാം പ്രതിഗമിഷ്യാമി കൃതകാര്യസ്സഹ ത്വയാ ॥ 25 ॥
ന ചേത്കരോഷി മാരീച ഹന്മി ത്വാമഹമദ്യ വൈ ।
ഏതത്കാര്യമവശ്യം മേ ബലാദപി കരിഷ്യസി ।
രാജ്ഞോ ഹി പ്രതികൂലസ്ഥോ ന ജാതു സുഖമേധതേ ॥ 26 ॥
ആസാദ്യ തം ജീവിതസംശയസ്തേ മൃത്യുര്ധ്രുവോ ഹ്യദ്യ മയാ വിരുധ്യ ।
ഏതദ്യഥാവത്പ്രതിഗൃഹ്യ ബുദ്ധ്യാ യദത്ര പഥ്യം കുരു തത്തഥാ ത്വമ് ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ചത്വാരിംശസ്സര്ഗഃ ॥
