ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଚତ୍ଵାରିଂଶସ୍ସର୍ଗଃ ।
ମାରୀଚେନ ତୁ ତଦ୍ଵାକ୍ୟଂ କ୍ଷମଂ ୟୁକ୍ତଂ ଚ ନିଶାଚରଃ ।
ଉକ୍ତୋ ନ ପ୍ରତିଜଗ୍ରାହ ମର୍ତୁକାମ ଇଵୌଷଧମ୍ ॥ 1 ॥
ତଂ ପଥ୍ୟହିତଵକ୍ତାରଂ ମାରୀଚଂ ରାକ୍ଷସାଧିପଃ ।
ଅବ୍ରଵୀତ୍ପରୁଷଂ ଵାକ୍ୟମୟୁକ୍ତଂ କାଲଚୋଦିତଃ ॥ 2 ॥
ୟତ୍କିଲୈତଦୟୁକ୍ତାର୍ଥଂ ମାରୀଚ ମୟି କଥ୍ୟତେ ।
ଵାକ୍ୟଂ ନିଷ୍ଫଲମତ୍ୟର୍ଥମୁପ୍ତଂ ବୀଜମିଵୋଷରେ ॥ 3 ॥
ତ୍ଵଦ୍ଵାକ୍ୟୈର୍ନ ତୁ ମାଂ ଶକ୍ୟଂ ଭେତ୍ତୁଂ ରାମସ୍ୟ ସଂୟୁଗେ ।
ପାପଶୀଲସ୍ୟ ମୂର୍ଖସ୍ୟ ମାନୁଷସ୍ୟ ଵିଶେଷତଃ ॥ 4 ॥
ୟସ୍ତ୍ୟକ୍ତ୍ଵା ସୁହୃଦୋ ରାଜ୍ୟଂ ମାତରଂ ପିତରଂ ତଥା ।
ସ୍ତ୍ରୀଵାକ୍ୟଂ ପ୍ରାକୃତଂ ଶ୍ରୁତ୍ଵା ଵନମେକପଦେ ଗତଃ ॥ 5 ॥
ଅଵଶ୍ୟଂତୁ ମୟା ତସ୍ୟ ସଂୟୁଗେ ଖରଘାତିନଃ ।
ପ୍ରାଣୈଃ ପ୍ରିୟତରା ସୀତା ହର୍ତଵ୍ୟା ତଵ ସନ୍ନିଧୌ ॥ 6 ॥
ଏଵଂ ମେ ନିଶ୍ଚିତା ବୁଦ୍ଧିର୍ହୃଦି ମାରୀଚ ଵର୍ତତେ ।
ନ ଵ୍ୟାଵର୍ତୟିତୁଂ ଶକ୍ୟା ସେଂଦ୍ରୈରପି ସୁରାସୁରୈଃ ॥ 7 ॥
ଦୋଷଂ ଗୁଣଂ ଵା ସଂପୃଷ୍ଟସ୍ତ୍ଵମେଵଂ ଵକ୍ତୁମର୍ହସି ।
ଅପାୟଂ ଵାପ୍ୟୁପାୟଂ ଵା କାର୍ୟସ୍ୟାସ୍ୟ ଵିନିଶ୍ଚୟେ ॥ 8 ॥
ସଂପୃଷ୍ଟେନ ତୁ ଵକ୍ତଵ୍ୟଂ ସଚିଵେନ ଵିପଶ୍ଚିତା ।
ଉଦ୍ୟତାଂଜଲିନା ରାଜ୍ଞେ ୟ ଇଚ୍ଛେଦ୍ଭୂତିମାତ୍ମନଃ ॥ 9 ॥
ଵାକ୍ୟମପ୍ରିତକୂଲଂ ତୁ ମୃଦୁପୂର୍ଵଂ ହିତଂ ଶୁଭମ୍ ।
ଉପଚାରେଣ ୟୁକ୍ତଂ ଚ ଵକ୍ତଵ୍ୟୋ ଵସୁଧାଧିପଃ ॥ 10 ॥
ସାଵମର୍ଦଂ ତୁ ୟଦ୍ଵାକ୍ୟଂ ମାରୀଚ ହିତମୁଚ୍ୟତେ ।
ନାଭିନଂଦତି ତଦ୍ରାଜା ମାନାର୍ହୋ ମାନଵର୍ଜିତମ୍ ॥ 11 ॥
ପଂଚ ରୂପାଣି ରାଜାନୋ ଧାରୟଂତ୍ୟମିତୌଜସଃ ।
ଅଗ୍ନେରିଂଦ୍ରସ୍ୟ ସୋମସ୍ୟ ଵରୁଣସ୍ୟ ୟମସ୍ୟ ଚ ॥ 12 ॥
ଔଷ୍ଣ୍ୟଂ ତଥା ଵିକ୍ରମଂ ଚ ସୌମ୍ୟଂ ଦଂଡଂ ପ୍ରସନ୍ନତାମ୍ ।
ଧାରୟଂତି ମହାତ୍ମାନୋ ରାଜାନଃ କ୍ଷଣଦାଚର ॥ 13 ॥
ତସ୍ମାତ୍ସର୍ଵାସ୍ଵଵସ୍ଥାସୁ ମାନ୍ୟାଃ ପୂଜ୍ୟାଶ୍ଚ ପାର୍ଥିଵାଃ ।
ତ୍ଵଂ ତୁ ଧର୍ମମଵିଜ୍ଞାୟ କେଵଲଂ ମୋହମାସ୍ଥିତଃ ।
ଅଭ୍ୟାଗତଂ ମାଂ ଦୌରାତ୍ମ୍ୟାତ୍ପରୁଷଂ ଵକ୍ତୁମିଚ୍ଛସି ॥ 14 ॥
ଗୁଣଦୋଷୌ ନ ପୃଚ୍ଛାମି କ୍ଷମଂ ଚାତ୍ମନି ରାକ୍ଷସ ।
ମୟୋକ୍ତଂ ତଵ ଚୈତାଵତ୍ସଂପ୍ରତ୍ୟମିତଵିକ୍ରମଃ ॥ 15 ॥
ଅସ୍ମିଂସ୍ତୁ ତ୍ଵଂ ମହାକୃତ୍ୟେ ସାହାୟ୍ୟଂ କର୍ତୁମର୍ହସି ।
ଶୃଣୁ ତତ୍କର୍ମ ସାହାୟ୍ୟେ ୟତ୍କାର୍ୟଂ ଵଚନାନ୍ମମ ॥ 16 ॥
ସୌଵର୍ଣସ୍ତ୍ଵଂ ମୃଗୋ ଭୂତ୍ଵା ଚିତ୍ରୋ ରଜତବିଂଦୁଭିଃ ।
ଆଶ୍ରମେ ତସ୍ୟ ରାମସ୍ୟ ସୀତାୟାଃ ପ୍ରମୁଖେ ଚର ॥ 17 ॥
ସୌଵର୍ଣସ୍ତ୍ଵଂ ମୃଗୋ ଭୂତ୍ଵା ଚିତ୍ରୋ ରଜତବିଂଦୁଭିଃ ।
ଆଶ୍ରମେ ତସ୍ୟ ରାମସ୍ୟ ସୀତାୟାଃ ପ୍ରମୁଖେ ଚର ।
ପ୍ରଲୋଭୟିତ୍ଵା ଵୈଦେହୀଂ ୟଥେଷ୍ଟଂ ଗଂତୁମର୍ହସି ॥ 18 ॥
ତ୍ଵାଂ ତୁ ମାୟାମୃଗଂ ଦୃଷ୍ଟ୍ଵା କାଂଚନଂ ଜାତଵିସ୍ମୟା ।
ଆନୟୈନମିତି କ୍ଷିପ୍ରଂ ରାମଂ ଵକ୍ଷ୍ୟତି ମୈଥିଲୀ ॥ 19 ॥
ଅପକ୍ରାଂତେ ତୁ କାକୁତ୍ସ୍ଥେ ଦୂରଂ ୟାତ୍ଵାପ୍ୟୁଦାହର ।
ହା ସୀତେ ଲକ୍ଷ୍ମଣେତ୍ୟେଵଂ ରାମଵାକ୍ୟାନୁରୂପକମ୍ ॥ 20 ॥
ତଚ୍ଛ୍ରୁତ୍ଵା ରାମପଦଵୀଂ ସୀତୟା ଚ ପ୍ରଚୋଦିତଃ ।
ଅନୁଗଚ୍ଛତି ସଂଭ୍ରାଂତଃ ସୌମିତ୍ରିରପି ସୌହୃଦାତ୍ ॥ 21 ॥
ଅପକ୍ରାଂତେ ଚ କାକୁତ୍ସ୍ଥେ ଲକ୍ଷ୍ମଣେ ଚ ୟଥାସୁଖମ୍ ।
ଆନୟିଷ୍ୟାମି ଵୈଦେହୀଂ ସହସ୍ରାକ୍ଷଶ୍ଶଚୀମିଵ ॥ 22 ॥
ଏଵଂ କୃତ୍ଵା ତ୍ଵିଦଂ କାର୍ୟଂ ୟଥେଷ୍ଟଂ ଗଚ୍ଛ ରାକ୍ଷସ ।
ରାଜ୍ୟସ୍ୟାର୍ଧଂ ପ୍ରୟଚ୍ଛାମି ମାରୀଚ ତଵ ସୁଵ୍ରତ ॥ 23 ॥
ଗଚ୍ଛ ସୌମ୍ୟ ଶିଵଂ ମାର୍ଗଂ କାର୍ୟସ୍ୟାସ୍ୟ ଵିଵୃଦ୍ଧୟେ ।
ଅହଂ ତ୍ଵାନୁଗମିଷ୍ୟାମି ସରଥୋ ଦଂଡକାଵନମ୍ ॥ 24 ॥
ପ୍ରାପ୍ୟ ସୀତାମୟୁଦ୍ଧେନ ଵଂଚୟିତ୍ଵା ତୁ ରାଘଵମ୍ ।
ଲଂକାଂ ପ୍ରତିଗମିଷ୍ୟାମି କୃତକାର୍ୟସ୍ସହ ତ୍ଵୟା ॥ 25 ॥
ନ ଚେତ୍କରୋଷି ମାରୀଚ ହନ୍ମି ତ୍ଵାମହମଦ୍ୟ ଵୈ ।
ଏତତ୍କାର୍ୟମଵଶ୍ୟଂ ମେ ବଲାଦପି କରିଷ୍ୟସି ।
ରାଜ୍ଞୋ ହି ପ୍ରତିକୂଲସ୍ଥୋ ନ ଜାତୁ ସୁଖମେଧତେ ॥ 26 ॥
ଆସାଦ୍ୟ ତଂ ଜୀଵିତସଂଶୟସ୍ତେ ମୃତ୍ୟୁର୍ଧ୍ରୁଵୋ ହ୍ୟଦ୍ୟ ମୟା ଵିରୁଧ୍ୟ ।
ଏତଦ୍ୟଥାଵତ୍ପ୍ରତିଗୃହ୍ୟ ବୁଦ୍ଧ୍ୟା ୟଦତ୍ର ପଥ୍ୟଂ କୁରୁ ତତ୍ତଥା ତ୍ଵମ୍ ॥ 27 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଚତ୍ଵାରିଂଶସ୍ସର୍ଗଃ ॥
