શ્રીમદ્વાલ્મીકીય રામાયણે અરણ્યકાંડમ્ ।
અથ ચત્વારિંશસ્સર્ગઃ ।
મારીચેન તુ તદ્વાક્યં ક્ષમં યુક્તં ચ નિશાચરઃ ।
ઉક્તો ન પ્રતિજગ્રાહ મર્તુકામ ઇવૌષધમ્ ॥ 1 ॥
તં પથ્યહિતવક્તારં મારીચં રાક્ષસાધિપઃ ।
અબ્રવીત્પરુષં વાક્યમયુક્તં કાલચોદિતઃ ॥ 2 ॥
યત્કિલૈતદયુક્તાર્થં મારીચ મયિ કથ્યતે ।
વાક્યં નિષ્ફલમત્યર્થમુપ્તં બીજમિવોષરે ॥ 3 ॥
ત્વદ્વાક્યૈર્ન તુ માં શક્યં ભેત્તું રામસ્ય સંયુગે ।
પાપશીલસ્ય મૂર્ખસ્ય માનુષસ્ય વિશેષતઃ ॥ 4 ॥
યસ્ત્યક્ત્વા સુહૃદો રાજ્યં માતરં પિતરં તથા ।
સ્ત્રીવાક્યં પ્રાકૃતં શ્રુત્વા વનમેકપદે ગતઃ ॥ 5 ॥
અવશ્યંતુ મયા તસ્ય સંયુગે ખરઘાતિનઃ ।
પ્રાણૈઃ પ્રિયતરા સીતા હર્તવ્યા તવ સન્નિધૌ ॥ 6 ॥
એવં મે નિશ્ચિતા બુદ્ધિર્હૃદિ મારીચ વર્તતે ।
ન વ્યાવર્તયિતું શક્યા સેંદ્રૈરપિ સુરાસુરૈઃ ॥ 7 ॥
દોષં ગુણં વા સંપૃષ્ટસ્ત્વમેવં વક્તુમર્હસિ ।
અપાયં વાપ્યુપાયં વા કાર્યસ્યાસ્ય વિનિશ્ચયે ॥ 8 ॥
સંપૃષ્ટેન તુ વક્તવ્યં સચિવેન વિપશ્ચિતા ।
ઉદ્યતાંજલિના રાજ્ઞે ય ઇચ્છેદ્ભૂતિમાત્મનઃ ॥ 9 ॥
વાક્યમપ્રિતકૂલં તુ મૃદુપૂર્વં હિતં શુભમ્ ।
ઉપચારેણ યુક્તં ચ વક્તવ્યો વસુધાધિપઃ ॥ 10 ॥
સાવમર્દં તુ યદ્વાક્યં મારીચ હિતમુચ્યતે ।
નાભિનંદતિ તદ્રાજા માનાર્હો માનવર્જિતમ્ ॥ 11 ॥
પંચ રૂપાણિ રાજાનો ધારયંત્યમિતૌજસઃ ।
અગ્નેરિંદ્રસ્ય સોમસ્ય વરુણસ્ય યમસ્ય ચ ॥ 12 ॥
ઔષ્ણ્યં તથા વિક્રમં ચ સૌમ્યં દંડં પ્રસન્નતામ્ ।
ધારયંતિ મહાત્માનો રાજાનઃ ક્ષણદાચર ॥ 13 ॥
તસ્માત્સર્વાસ્વવસ્થાસુ માન્યાઃ પૂજ્યાશ્ચ પાર્થિવાઃ ।
ત્વં તુ ધર્મમવિજ્ઞાય કેવલં મોહમાસ્થિતઃ ।
અભ્યાગતં માં દૌરાત્મ્યાત્પરુષં વક્તુમિચ્છસિ ॥ 14 ॥
ગુણદોષૌ ન પૃચ્છામિ ક્ષમં ચાત્મનિ રાક્ષસ ।
મયોક્તં તવ ચૈતાવત્સંપ્રત્યમિતવિક્રમઃ ॥ 15 ॥
અસ્મિંસ્તુ ત્વં મહાકૃત્યે સાહાય્યં કર્તુમર્હસિ ।
શૃણુ તત્કર્મ સાહાય્યે યત્કાર્યં વચનાન્મમ ॥ 16 ॥
સૌવર્ણસ્ત્વં મૃગો ભૂત્વા ચિત્રો રજતબિંદુભિઃ ।
આશ્રમે તસ્ય રામસ્ય સીતાયાઃ પ્રમુખે ચર ॥ 17 ॥
સૌવર્ણસ્ત્વં મૃગો ભૂત્વા ચિત્રો રજતબિંદુભિઃ ।
આશ્રમે તસ્ય રામસ્ય સીતાયાઃ પ્રમુખે ચર ।
પ્રલોભયિત્વા વૈદેહીં યથેષ્ટં ગંતુમર્હસિ ॥ 18 ॥
ત્વાં તુ માયામૃગં દૃષ્ટ્વા કાંચનં જાતવિસ્મયા ।
આનયૈનમિતિ ક્ષિપ્રં રામં વક્ષ્યતિ મૈથિલી ॥ 19 ॥
અપક્રાંતે તુ કાકુત્સ્થે દૂરં યાત્વાપ્યુદાહર ।
હા સીતે લક્ષ્મણેત્યેવં રામવાક્યાનુરૂપકમ્ ॥ 20 ॥
તચ્છ્રુત્વા રામપદવીં સીતયા ચ પ્રચોદિતઃ ।
અનુગચ્છતિ સંભ્રાંતઃ સૌમિત્રિરપિ સૌહૃદાત્ ॥ 21 ॥
અપક્રાંતે ચ કાકુત્સ્થે લક્ષ્મણે ચ યથાસુખમ્ ।
આનયિષ્યામિ વૈદેહીં સહસ્રાક્ષશ્શચીમિવ ॥ 22 ॥
એવં કૃત્વા ત્વિદં કાર્યં યથેષ્ટં ગચ્છ રાક્ષસ ।
રાજ્યસ્યાર્ધં પ્રયચ્છામિ મારીચ તવ સુવ્રત ॥ 23 ॥
ગચ્છ સૌમ્ય શિવં માર્ગં કાર્યસ્યાસ્ય વિવૃદ્ધયે ।
અહં ત્વાનુગમિષ્યામિ સરથો દંડકાવનમ્ ॥ 24 ॥
પ્રાપ્ય સીતામયુદ્ધેન વંચયિત્વા તુ રાઘવમ્ ।
લંકાં પ્રતિગમિષ્યામિ કૃતકાર્યસ્સહ ત્વયા ॥ 25 ॥
ન ચેત્કરોષિ મારીચ હન્મિ ત્વામહમદ્ય વૈ ।
એતત્કાર્યમવશ્યં મે બલાદપિ કરિષ્યસિ ।
રાજ્ઞો હિ પ્રતિકૂલસ્થો ન જાતુ સુખમેધતે ॥ 26 ॥
આસાદ્ય તં જીવિતસંશયસ્તે મૃત્યુર્ધ્રુવો હ્યદ્ય મયા વિરુધ્ય ।
એતદ્યથાવત્પ્રતિગૃહ્ય બુદ્ધ્યા યદત્ર પથ્યં કુરુ તત્તથા ત્વમ્ ॥ 27 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે ચત્વારિંશસ્સર્ગઃ ॥
