ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଏକୋନଷଷ୍ଟିତମସ୍ସର୍ଗଃ ।
ଅଥାଶ୍ରମାଦୁପାଵୃତ୍ତମଂତରା ରଘୁନଂଦନଃ ।
ପରିପପ୍ରଚ୍ଛ ସୌମିତ୍ରିଂ ରାମୋ ଦୁଃଖାର୍ଦିତଂ ପୁନଃ ॥ 1 ॥
ତମୁଵାଚ କିମର୍ଥଂ ତ୍ଵମାଗତୋଽପାସ୍ୟ ମୈଥିଲୀମ୍ ।
ୟଦା ସା ତଵ ଵିଶ୍ଵାସାଦ୍ଵନେ ଵିରହିତା ମୟା ॥ 2 ॥
ଦୃଷ୍ଟ୍ଵୈଵାଭ୍ୟାଗତଂ ତ୍ଵାଂ ମେ ମୈଥିଲୀଂ ତ୍ୟଜ୍ୟ ଲକ୍ଷ୍ମଣ ।
ଶଂକମାନଂ ମହତ୍ପାପଂ ୟତ୍ସତ୍ୟଂ ଵ୍ୟଥିତଂ ମନଃ ॥ 3 ॥
ସ୍ଫୁରତେ ନୟନଂ ସଵ୍ୟଂ ବାହୁଶ୍ଚ ହୃଦୟଂ ଚ ମେ ।
ଦୃଷ୍ଟ୍ଵା ଲକ୍ଷ୍ମଣ ଦୂରେ ତ୍ଵାଂ ସୀତାଵିରହିତଂ ପଥି ॥ 4 ॥
ଏଵମୁକ୍ତଂତୁ ସୌମିତ୍ରିର୍ଲକ୍ଷ୍ମଣଶ୍ଶୁଭଲକ୍ଷଣଃ ।
ଭୂୟୋ ଦୁଃଖସମାଵିଷ୍ଟୋ ଦୁଃଖିତଂ ରାମମବ୍ରଵୀତ୍ ॥ 5 ॥
ନ ସ୍ଵୟଂ କାମକାରେଣ ତାଂ ତ୍ୟକ୍ତ୍ଵାହମିହାଗତଃ ।
ପ୍ରଚୋଦିତ ସ୍ତୟୈଵୋଗ୍ରୈସ୍ତ୍ଵତ୍ସକାଶମିହାଗତଃ ॥ 6 ॥
ଆର୍ୟେଣେଵ ପରାକ୍ରୁଷ୍ଟଂ ହାସୀତେ ଲକ୍ଷ୍ମଣେତି ଚ ।
ପରିତ୍ରାହୀତି ୟଦ୍ଵାକ୍ୟଂ ମୈଥିଲ୍ୟାସ୍ତଚ୍ଛ୍ରୁତିଂ ଗତମ୍ ॥ 7 ॥
ସା ତମାର୍ତସ୍ଵରଂ ଶ୍ରୁତ୍ଵା ତଵ ସ୍ନେହେନ ମୈଥିଲୀ ।
ଗଚ୍ଛ ଗଚ୍ଛେତି ମାମାହ ରୁଦଂତୀ ଭୟଵିହ୍ଵଲା ॥ 8 ॥
ପ୍ରଚୋଦ୍ୟମାନେନ ମୟା ଗଚ୍ଛେତି ବହୁଶସ୍ତୟା ।
ପ୍ରତ୍ୟୁକ୍ତା ମୈଥିଲୀ ଵାକ୍ୟମିଦଂ ତ୍ଵତ୍ପ୍ରତ୍ୟୟାନ୍ଵିତମ୍ ॥ 9 ॥
ନ ତତ୍ପଶ୍ୟାମ୍ୟହଂ ରକ୍ଷୋ ୟଦସ୍ୟ ଭୟମାଵହେତ୍ ।
ନିର୍ଵୃତା ଭଵ ନାସ୍ତ୍ୟେତତ୍କେନାପ୍ୟେଵମୁଦାହୃତମ୍ ॥ 10 ॥
ଵିଗର୍ହିତଂ ଚ ନୀଚଂ ଚ କଥମାର୍ୟୋଽଭିଧାସ୍ୟତି ।
ତ୍ରାହୀତି ଵଚନଂ ସୀତେ ୟସ୍ତ୍ରାୟେତ୍ରିଦଶାନପି ॥ 11 ॥
କିଂ ନିମିତ୍ତଂ ତୁ କେନାପି ଭ୍ରାତୁରାଲଂବ୍ୟ ମେ ସ୍ଵରମ୍ ।
ରାକ୍ଷସେନେରିତଂ ଵାକ୍ୟଂ ତ୍ରାହି ତ୍ରାହୀତି ଶୋଭନେ ॥ 12 ॥
ଵିସ୍ଵରଂ ଵ୍ୟାହୃତଂ ଵାକ୍ୟଂ ଲକ୍ଷ୍ମଣ ତ୍ରାହି ମାମିତି ।
ନ ଭଵତ୍ୟା ଵ୍ୟଥା କାର୍ୟା କୁନାରୀଜନସେଵିତା ॥ 13 ॥
ଅଲଂ ଵୈକ୍ଲବ୍ୟମାଲଂବ୍ୟ ସ୍ଵସ୍ଥା ଭଵ ନିରୁତ୍ସୁକା ।
ନ ସୋଽସ୍ତି ତ୍ରିଷୁ ଲୋକେଷୁ ପୁମାନ୍ଵୈ ରାଘଵଂ ରଣେ ॥ 14 ॥
ଜାତୋ ଵା ଜାୟମାନୋ ଵା ସଂୟୁଗେ ୟଃ ପରାଜୟେତ୍ ।
ନ ଜୟ୍ୟୋ ରାଘଵୋ ୟୁଦ୍ଧେ ଦେଵୈଶ୍ଶକ୍ରପୁରୋଗମୈଃ ॥ 15 ॥
ଏଵମୁକ୍ତା ତୁ ଵୈଦେହୀ ପରିମୋହିତଚେତନା ।
ଉଵାଚାଶ୍ରୂଣି ମୁଂଚଂତୀ ଦାରୁଣଂ ମାମିଦଂ ଵଚଃ ॥ 16 ॥
ଭାଵୋ ମୟି ତଵାତ୍ୟର୍ଥଂ ପାପ ଏଵ ନିଵେଶିତଃ ।
ଵିନଷ୍ଟେ ଭ୍ରାତରି ପ୍ରାପ୍ତୁଂ ନ ଚ ତ୍ଵଂ ମାମଵାପ୍ସ୍ୟସି ॥ 17 ॥
ସଂକେତାଦ୍ଭରତେନ ତ୍ଵଂ ରାମଂ ସମନୁଗଚ୍ଛସି ।
କ୍ରୋଶଂତଂ ହି ୟଥାତ୍ୟର୍ଥଂ ନୈଵମଭ୍ୟଵପଦ୍ୟସେ ॥ 18 ॥
ରିପୁଃ ପ୍ରଚ୍ଛନ୍ନଚାରୀ ତ୍ଵଂ ମଦର୍ଥମନୁଗଚ୍ଛସି ।
ରାଘଵସ୍ୟାଂତରପ୍ରେପ୍ସୁସ୍ତଥୈନଂ ନାଭିପଦ୍ୟସେ ॥ 19 ॥
ଏଵମୁକ୍ତୋ ହି ଵୈଦେହ୍ୟା ସଂରବ୍ଧୋ ରକ୍ତଲୋଚନଃ ।
କ୍ରୋଧାତ୍ପ୍ରସ୍ଫୁରମାଣୋଷ୍ଠ ଆଶ୍ରମାଦଭିନିର୍ଗତଃ ॥ 20 ॥
ଏଵଂ ବ୍ରୁଵାଣଂ ସୌମିତ୍ରିଂ ରାମସ୍ସଂତାପମୋହିତଃ ।
ଅବ୍ରଵୀଦ୍ଦୁଷ୍କୃତଂ ସୌମ୍ୟ ତାଂ ଵିନା ୟତ୍ତ୍ଵମାଗତଃ ॥ 21 ॥
ଜାନନ୍ନପି ସମର୍ଥଂ ମାଂ ରକ୍ଷସାଂ ଵିନିଵାରଣେ ।
ଅନେନ କ୍ରୋଧଵାକ୍ୟେନ ମୈଥିଲ୍ୟା ନିସ୍ସୃତୋ ଭଵାନ୍ ॥ 22 ॥
ନ ହି ତେ ପରିତୁଷ୍ୟାମି ତ୍ୟକ୍ତ୍ଵା ୟଦ୍ୟାସି ମୈଥିଲୀମ୍ ।
କ୍ରୁଦ୍ଧାୟାଃ ପରୁଷଂ ଶ୍ରୁତ୍ଵା ତାଂ ଵିହାୟ ତ୍ଵମାଗତଃ ॥ 23 ॥
ସର୍ଵଥା ତ୍ଵଵିନୀତଂ ତେ ସୀତୟା ୟତ୍ପ୍ରଚୋଦିତଃ ।
କ୍ରୋଧସ୍ୟ ଵଶମାପନ୍ନୋ ନାକରୋଶ୍ଶାସନଂ ମମ ॥ 24 ॥
ଅସୌ ହି ରାକ୍ଷସଶ୍ଶେତେ ଶରେଣାଭିହତୋ ମୟା ।
ମୃଗରୂପେଣ ୟେନାହମାଶ୍ରମାଦପଵାହିତଃ ॥ 25 ॥
ଵିକୃଷ୍ୟ ଚାପଂ ପରିଧାୟ ସାୟକଂ ସଲୀଲବାଣେନ ଚ ତାଡିତୋ ମୟା ।
ମାର୍ଗୀଂ ତନୁଂ ତ୍ୟଜ୍ୟ ସ ଵିକ୍ଲବସ୍ଵରୋ ବଭୂଵ କେୟୂରଧରସ୍ସରାକ୍ଷସଃ ॥ 26 ॥
ଶରାହତେନୈଵ ତଦାର୍ତୟା ଗିରା ସ୍ଵରଂ ସମାଲଂବ୍ୟ ସୁଦୂରସୁଶ୍ରଵମ୍ ।
ଉଦାହୃତଂ ତଦ୍ଵଚନଂ ସୁଦାରୁଣଂ ତ୍ଵମାଗତୋ ୟେନ ଵିହାୟ ମୈଥିଲୀମ୍ ॥ 27 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଏକୋନଷଷ୍ଟିତମସ୍ସର୍ଗଃ ॥
