śrīmadvālmīkīya rāmāyaṇē sundarakāṇḍam ।
atha viṃśassargaḥ ।
sa tāṃ parivṛtāṃ dīnāṃ nirānandāṃ tapasvinīm ।
sākārairmadhurairvākyairnyadarśayata rāvaṇaḥ ॥ 1 ॥
māṃ dṛṣṭvā nāganāsōru gūhamānā stanōdaram ।
adarśanamivātmānaṃ bhayānnētuṃ tvamichChasi ॥ 2 ॥
kāmayē tvāṃ viśālākṣi bahumanyasva māṃ priyē ।
sarvāṅgaguṇasampannē sarvalōkamanōharē ॥ 3 ॥
nēha kēchinmanuṣyā vā rākṣasāḥ kāmarūpiṇaḥ ।
vyapasarpatu tē sītē bhayaṃ mattaḥ samutthitam ॥ 4 ॥
svadharmō rakṣasāṃ bhīru sarvathaiva na saṃśayaḥ ।
gamanaṃ vā parastrīṇāṃ haraṇaṃ sampramathya vā ॥ 5 ॥
ēvaṃ chaitadakāmāṃ tu na tvāṃ sprakṣyāmi maithili ।
kāmaṃ kāmaḥ śarīrē mē yathākāmaṃ pravartatām ॥ 6 ॥
dēvi nēha bhayaṃ kāryaṃ mayi viśvasi hi priyē ।
praṇayasva cha tattvēna maivaṃ bhūḥ śōkalālasā ॥ 7 ॥
ēkavēṇī dharāśayyā dhyānaṃ malinamambaram ।
asthānē'pyupavāsaścha naitānyaupayikāni tē ॥ 8 ॥
vichitrāṇi cha mālyāni chandanānyagarūṇi cha ।
vividhāni cha vāsāṃsi divyānyābharaṇāni cha ॥ 9 ॥
mahārhāṇi cha pānāni śayanānyāsanāni cha ।
gītaṃ nṛttaṃ cha vādyaṃ cha labha māṃ prāpya maithili ॥ 10 ॥
strīratnamasi maivaṃ bhūḥ kuru gātrēṣu bhūṣaṇam ।
māṃ prāpya hi kathaṃ nu svāstvamanarhā suvigrahē ॥ 11 ॥
idaṃ tē chāru sañjātaṃ yauvanaṃ vyativartatē ।
yadatītaṃ punarnaiti srōtaḥ śīghramapāmiva ॥ 12 ॥
tvāṃ kṛtvōparatō manyē rūpakartā sa viśvasṛk ।
na hi rūpōpamā tvanyā tavāsti śubhadarśanē ॥ 13 ॥
tvāṃ samāsādya vaidēhi rūpayauvanaśālinīm ।
kaḥ pumānativartēta sākṣādapi pitāmahaḥ ॥ 14 ॥
yadyatpaśyāmi tē gātraṃ śītāṃśusadṛśānanē ।
tasmiṃstasmin pṛthuśrōṇi chakṣurmama nibadhyatē ॥ 15 ॥
bhava maithili bhāryā mē mōhamēnaṃ visarjaya ।
bahvīnāmuttamastrīṇāmāhṛtānāmitastataḥ ॥ 16 ॥
sarvāsāmēva bhadraṃ tē mamāgramahiṣī bhava ।
lōkēbhyō yāni ratnāni sampramathyāhṛtāni vai ॥ 17 ॥
tāni mē bhīru sarvāṇi rājyaṃ chaitadahaṃ cha tē ।
vijitya pṛthivīṃ sarvāṃ nānānagaramālinīm ॥ 18 ॥
janakāya pradāsyāmi tava hētōrvilāsini ।
nēha paśyāmi lōkē'nyaṃ yō mē pratibalō bhavēt ।
paśya mē sumahadvīryamapratidvandvamāhavē ॥ 19 ॥
asakṛtsaṃyugē bhagnā mayā vimṛditadhvajāḥ ॥ 20 ॥
aśaktāḥ pratyanīkēṣu sthātuṃ mama surāsurāḥ ।
ichCha māṃ kriyatāmadya pratikarma tavōttamam ॥ 21 ॥
saprabhāṇyavasajyantāṃ tavāṅgē bhūṣaṇāni cha ।
sādhu paśyāmi tē rūpaṃ saṃyuktaṃ pratikarmaṇā ॥ 22 ॥
pratikarmābhisaṃyuktā dākṣiṇyēna varānanē ।
bhuṅkṣva bhōgānyathākāmaṃ piba bhīru ramasva cha ॥ 23 ॥
yathēṣṭaṃ cha prayachCha tvaṃ pṛthivīṃ vā dhanāni cha ।
lalasva mayi visrabdhā dhṛṣṭamājñāpayasva cha ॥ 24 ॥
matprasādāllalantyāścha lalantāṃ bāndhavāstava ।
ṛddhiṃ mamānupaśya tvaṃ śriyaṃ bhadrē yaśaścha mē ॥ 25 ॥
kiṃ kariṣyasi rāmēṇa subhagē chīravāsasā ।
nikṣiptavijayō rāmō gataśrīrvanagōcharaḥ ॥ 26 ॥
vratī sthaṇḍilaśāyī cha śaṅkē jīvati vā na vā ।
na hi vaidēhi rāmastvāṃ draṣṭuṃ vā pyupalapsyatē ।
purōbalākairasitairmēghairjyōtsnāmivāvṛtām ॥ 27 ॥
na chāpi mama hastāttvāṃ prāptumarhati rāghavaḥ ॥ 28 ॥
hiraṇyakaśipuḥ kīrtimindrahastagatāmiva ।
chārusmitē chārudati chārunētrē vilāsini ॥ 29 ॥
manō harasi mē bhīru suparṇaḥ pannagaṃ yathā ।
kliṣṭakauśēyavasanāṃ tanvīmapyanalaṅkṛtām ॥ 30 ॥
tvāṃ dṛṣṭvā svēṣu dārēṣu ratiṃ nōpalabhāmyaham ।
antaḥpuranivāsinyaḥ striyaḥ sarvaguṇānvitāḥ ॥ 31 ॥
yāvantyō mama sarvāsāmaiśvaryaṃ kuru jānaki ।
mama hyasitakēśāntē trailōkyapravarāḥ striyaḥ ॥ 32 ॥
tāstvāṃ parichariṣyanti śriyamapsarasō yathā ।
yāni vaiśravaṇē subhru ratnāni cha dhanāni cha ॥ 33 ॥
tāni lōkāṃścha suśrōṇi māṃ cha bhuṅkṣva yathāsukham ।
na rāmastapasā dēvi na balēna na vikramaiḥ ॥ 34 ॥
na dhanēna mayā tulyastējasā yaśasāpi vā ।
piba vihara ramasva bhuṅkṣva bhōgān dhananichayaṃ pradiśāmi mēdinīṃ cha ।
mayi lala lalanē yathāsukhaṃ tvaṃ tvayi cha samētya lalantu bāndhavāstē ॥ 35 ॥
kusumitatarujālasantatāni bhramarayutāni samudratīrajāni ।
kanakavimalahārabhūṣitāṅgī vihara mayā saha bhīru kānanāni ॥ 36 ॥
ityārṣē śrīmadrāmāyaṇē vālmīkīya ādikāvyē sundarakāṇḍē viṃśassargaḥ ॥
