ശ്രീമദ്വാല്മീകീയ രാമായണേ സുംദരകാംഡമ് ।
അഥ വിംശസ്സര്ഗഃ ।
സ താം പരിവൃതാം ദീനാം നിരാനംദാം തപസ്വിനീമ് ।
സാകാരൈര്മധുരൈർവാക്യൈര്ന്യദര്ശയത രാവണഃ ॥ 1 ॥
മാം ദൃഷ്ട്വാ നാഗനാസോരു ഗൂഹമാനാ സ്തനോദരമ് ।
അദര്ശനമിവാത്മാനം ഭയാന്നേതും ത്വമിച്ഛസി ॥ 2 ॥
കാമയേ ത്വാം വിശാലാക്ഷി ബഹുമന്യസ്വ മാം പ്രിയേ ।
സർവാംഗഗുണസംപന്നേ സർവലോകമനോഹരേ ॥ 3 ॥
നേഹ കേചിന്മനുഷ്യാ വാ രാക്ഷസാഃ കാമരൂപിണഃ ।
വ്യപസര്പതു തേ സീതേ ഭയം മത്തഃ സമുത്ഥിതമ് ॥ 4 ॥
സ്വധര്മോ രക്ഷസാം ഭീരു സർവഥൈവ ന സംശയഃ ।
ഗമനം വാ പരസ്ത്രീണാം ഹരണം സംപ്രമഥ്യ വാ ॥ 5 ॥
ഏവം ചൈതദകാമാം തു ന ത്വാം സ്പ്രക്ഷ്യാമി മൈഥിലി ।
കാമം കാമഃ ശരീരേ മേ യഥാകാമം പ്രവര്തതാമ് ॥ 6 ॥
ദേവി നേഹ ഭയം കാര്യം മയി വിശ്വസി ഹി പ്രിയേ ।
പ്രണയസ്വ ച തത്ത്വേന മൈവം ഭൂഃ ശോകലാലസാ ॥ 7 ॥
ഏകവേണീ ധരാശയ്യാ ധ്യാനം മലിനമംബരമ് ।
അസ്ഥാനേഽപ്യുപവാസശ്ച നൈതാന്യൌപയികാനി തേ ॥ 8 ॥
വിചിത്രാണി ച മാല്യാനി ചംദനാന്യഗരൂണി ച ।
വിവിധാനി ച വാസാംസി ദിവ്യാന്യാഭരണാനി ച ॥ 9 ॥
മഹാര്ഹാണി ച പാനാനി ശയനാന്യാസനാനി ച ।
ഗീതം നൃത്തം ച വാദ്യം ച ലഭ മാം പ്രാപ്യ മൈഥിലി ॥ 10 ॥
സ്ത്രീരത്നമസി മൈവം ഭൂഃ കുരു ഗാത്രേഷു ഭൂഷണമ് ।
മാം പ്രാപ്യ ഹി കഥം നു സ്വാസ്ത്വമനര്ഹാ സുവിഗ്രഹേ ॥ 11 ॥
ഇദം തേ ചാരു സംജാതം യൌവനം വ്യതിവര്തതേ ।
യദതീതം പുനര്നൈതി സ്രോതഃ ശീഘ്രമപാമിവ ॥ 12 ॥
ത്വാം കൃത്വോപരതോ മന്യേ രൂപകര്താ സ വിശ്വസൃക് ।
ന ഹി രൂപോപമാ ത്വന്യാ തവാസ്തി ശുഭദര്ശനേ ॥ 13 ॥
ത്വാം സമാസാദ്യ വൈദേഹി രൂപയൌവനശാലിനീമ് ।
കഃ പുമാനതിവര്തേത സാക്ഷാദപി പിതാമഹഃ ॥ 14 ॥
യദ്യത്പശ്യാമി തേ ഗാത്രം ശീതാംശുസദൃശാനനേ ।
തസ്മിംസ്തസ്മിന് പൃഥുശ്രോണി ചക്ഷുര്മമ നിബധ്യതേ ॥ 15 ॥
ഭവ മൈഥിലി ഭാര്യാ മേ മോഹമേനം വിസര്ജയ ।
ബഹ്വീനാമുത്തമസ്ത്രീണാമാഹൃതാനാമിതസ്തതഃ ॥ 16 ॥
സർവാസാമേവ ഭദ്രം തേ മമാഗ്രമഹിഷീ ഭവ ।
ലോകേഭ്യോ യാനി രത്നാനി സംപ്രമഥ്യാഹൃതാനി വൈ ॥ 17 ॥
താനി മേ ഭീരു സർവാണി രാജ്യം ചൈതദഹം ച തേ ।
വിജിത്യ പൃഥിവീം സർവാം നാനാനഗരമാലിനീമ് ॥ 18 ॥
ജനകായ പ്രദാസ്യാമി തവ ഹേതോർവിലാസിനി ।
നേഹ പശ്യാമി ലോകേഽന്യം യോ മേ പ്രതിബലോ ഭവേത് ।
പശ്യ മേ സുമഹദ്വീര്യമപ്രതിദ്വംദ്വമാഹവേ ॥ 19 ॥
അസകൃത്സംയുഗേ ഭഗ്നാ മയാ വിമൃദിതധ്വജാഃ ॥ 20 ॥
അശക്താഃ പ്രത്യനീകേഷു സ്ഥാതും മമ സുരാസുരാഃ ।
ഇച്ഛ മാം ക്രിയതാമദ്യ പ്രതികര്മ തവോത്തമമ് ॥ 21 ॥
സപ്രഭാണ്യവസജ്യംതാം തവാംഗേ ഭൂഷണാനി ച ।
സാധു പശ്യാമി തേ രൂപം സംയുക്തം പ്രതികര്മണാ ॥ 22 ॥
പ്രതികര്മാഭിസംയുക്താ ദാക്ഷിണ്യേന വരാനനേ ।
ഭുംക്ഷ്വ ഭോഗാന്യഥാകാമം പിബ ഭീരു രമസ്വ ച ॥ 23 ॥
യഥേഷ്ടം ച പ്രയച്ഛ ത്വം പൃഥിവീം വാ ധനാനി ച ।
ലലസ്വ മയി വിസ്രബ്ധാ ധൃഷ്ടമാജ്ഞാപയസ്വ ച ॥ 24 ॥
മത്പ്രസാദാല്ലലംത്യാശ്ച ലലംതാം ബാംധവാസ്തവ ।
ഋദ്ധിം മമാനുപശ്യ ത്വം ശ്രിയം ഭദ്രേ യശശ്ച മേ ॥ 25 ॥
കിം കരിഷ്യസി രാമേണ സുഭഗേ ചീരവാസസാ ।
നിക്ഷിപ്തവിജയോ രാമോ ഗതശ്രീർവനഗോചരഃ ॥ 26 ॥
വ്രതീ സ്ഥംഡിലശായീ ച ശംകേ ജീവതി വാ ന വാ ।
ന ഹി വൈദേഹി രാമസ്ത്വാം ദ്രഷ്ടും വാ പ്യുപലപ്സ്യതേ ।
പുരോബലാകൈരസിതൈര്മേഘൈര്ജ്യോത്സ്നാമിവാവൃതാമ് ॥ 27 ॥
ന ചാപി മമ ഹസ്താത്ത്വാം പ്രാപ്തുമര്ഹതി രാഘവഃ ॥ 28 ॥
ഹിരണ്യകശിപുഃ കീര്തിമിംദ്രഹസ്തഗതാമിവ ।
ചാരുസ്മിതേ ചാരുദതി ചാരുനേത്രേ വിലാസിനി ॥ 29 ॥
മനോ ഹരസി മേ ഭീരു സുപര്ണഃ പന്നഗം യഥാ ।
ക്ലിഷ്ടകൌശേയവസനാം തന്വീമപ്യനലംകൃതാമ് ॥ 30 ॥
ത്വാം ദൃഷ്ട്വാ സ്വേഷു ദാരേഷു രതിം നോപലഭാമ്യഹമ് ।
അംതഃപുരനിവാസിന്യഃ സ്ത്രിയഃ സർവഗുണാന്വിതാഃ ॥ 31 ॥
യാവംത്യോ മമ സർവാസാമൈശ്വര്യം കുരു ജാനകി ।
മമ ഹ്യസിതകേശാംതേ ത്രൈലോക്യപ്രവരാഃ സ്ത്രിയഃ ॥ 32 ॥
താസ്ത്വാം പരിചരിഷ്യംതി ശ്രിയമപ്സരസോ യഥാ ।
യാനി വൈശ്രവണേ സുഭ്രു രത്നാനി ച ധനാനി ച ॥ 33 ॥
താനി ലോകാംശ്ച സുശ്രോണി മാം ച ഭുംക്ഷ്വ യഥാസുഖമ് ।
ന രാമസ്തപസാ ദേവി ന ബലേന ന വിക്രമൈഃ ॥ 34 ॥
ന ധനേന മയാ തുല്യസ്തേജസാ യശസാപി വാ ।
പിബ വിഹര രമസ്വ ഭുംക്ഷ്വ ഭോഗാന് ധനനിചയം പ്രദിശാമി മേദിനീം ച ।
മയി ലല ലലനേ യഥാസുഖം ത്വം ത്വയി ച സമേത്യ ലലംതു ബാംധവാസ്തേ ॥ 35 ॥
കുസുമിതതരുജാലസംതതാനി ഭ്രമരയുതാനി സമുദ്രതീരജാനി ।
കനകവിമലഹാരഭൂഷിതാംഗീ വിഹര മയാ സഹ ഭീരു കാനനാനി ॥ 36 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ വിംശസ്സര്ഗഃ ॥
