śrīmadvālmīkīya rāmāyaṇē sundarakāṇḍam ।
atha saptaviṃśassargaḥ ।
ityuktāssītayā ghōraṃ rākṣasyaḥ krōdhamūrChitāḥ ।
kāśchijjagmustadākhyātuṃ rāvaṇasya tarasvinaḥ ॥ 1 ॥
tataḥ sītāmupāgamya rākṣasyō ghōradarśanāḥ ।
punaḥ paruṣamēkārthamanarthārthamathābruvan ॥ 2 ॥
adyēdānīṃ tavānāryē sītē pāpaviniśchayē ।
rākṣasyō bhakṣayiṣyanti māṃsamētadyathāsukham ॥ 3 ॥
sītāṃ tābhiranāryābhirdṛṣṭavā santarjitāṃ tadā ।
rākṣasī trijaṭā vṛddhā śayānā vākyamabravīt ॥ 4 ॥
ātmānaṃ khādatānāryā na sītāṃ bhakṣayiṣyatha ।
janakasya sutāmiṣṭāṃ snuṣāṃ daśarathasya cha ॥ 5 ॥
svapnō hyadya mayā dṛṣṭō dāruṇō rōmaharṣaṇaḥ ।
rākṣasānāmabhāvāya bharturasyā bhavāya cha ॥ 6 ॥
ēvamuktāstrijaṭayā rākṣasyaḥ krōdhamūrChitāḥ ।
sarvā ēvābruvanbhītāstrijaṭāṃ tāmidaṃ vachaḥ ॥ 7 ॥
kathayasva tvayā dṛṣṭaḥ svapnō'yaṃ kīdṛśō niśi ।
tāsāṃ śrutvā tu vachanaṃ rākṣasīnāṃ mukhāchyutam ॥ 8 ॥
uvacha vachanaṃ kālē trijaṭā svapnasaṃśritam ।
gajadantamayīṃ divyāṃ śibikāmantarikṣagām ॥ 9 ॥
yuktāṃ haṃsasahasrēṇa svayamāsthāya rāghavaḥ ।
śuklamālyāmbaradharō lakṣmaṇēna sahāgataḥ ॥ 10 ॥
svapnē chādya mayā dṛṣṭā sītā śuklāmbarāvṛtā ।
sāgarēṇa parikṣiptaṃ śvētaṃ parvatamāsthitā ॥ 11 ॥
rāmēṇa saṅgatā sītā bhāskarēṇa prabhā yathā ।
rāghavaścha mayā dṛṣṭaśchaturdaṣṭraṃ mahāgajam ॥ 12 ॥
ārūḍha śśailasaṅkāśaṃ chachāra sahalakṣmaṇaḥ ।
tatastau naraśārdūlau dīpyamānau svatējasā ॥ 13 ॥
śuklamālyāmbaradharau jānakīṃ paryupasthitau ।
tatastasya nagasyāgrē hyākāśasthasya dantinaḥ ॥ 14 ॥
bhartrā parigṛhītasya jānakī skandhamāśritā ।
bharturaṅkātsamutpatya tataḥ kamalalōchanā ॥ 15 ॥
chandrasūryau mayā dṛṣṭā pāṇinā parimārjatī ।
tatastābhyāṃ kumārābhyāmāsthitaḥ sa gajōttamaḥ ॥ 16 ॥
sītayā cha viśālākṣyā laṅkāyā uparisthitaḥ ।
pāṇḍurarṣabhayuktēna rathēnāṣṭayujā svayam ॥ 17 ॥
ihōpayātaḥ kākutstha ssītayā saha bhāryayā ।
lakṣmaṇēna saha bhrātrā sītayā saha vīryavān ॥ 18 ॥
āruhya puṣpakaṃ divyaṃ vimānaṃ sūryasannibham ।
uttarāṃ diśamālōkya jagāma puruṣōttamaḥ ॥ 19 ॥
ēvaṃ svapnē mayā dṛṣṭō rāmō viṣṇuparākramaḥ ।
lakṣmaṇēna saha bhrātrā sītayā saha rāghavaḥ ॥ 20 ॥
na hi rāmō mahātējāśśakyō jētuṃ surāsuraiḥ ।
rākṣasairvāpi chānyairvā svargaḥ pāpajanairiva ॥ 21 ॥
rāvaṇaścha mayā dṛṣṭaḥ kṣitau tailasamukṣitaḥ ।
raktavāsāḥ pibanmattaḥ karavīrakṛtasrajaḥ ॥ 22 ॥
vimānātpuṣpakādadya rāvaṇaḥ patitō bhuvi ।
kṛṣyamāṇaḥ striyā dṛṣṭō muṇḍaḥ kṛṣṇāmbaraḥ punaḥ ॥ 23 ॥
rathēna kharayuktēna raktamālyānulēpanaḥ ।
pipaṃstailaṃ hasannṛtyan bhrāntachittākulēndriyaḥ ॥ 24 ॥
gardabhēna yayau śīghraṃ dakṣiṇāṃ diśamāsthitaḥ ।
punarēva mayā dṛṣṭō rāvaṇō rākṣasēśvaraḥ ॥ 25 ॥
patitō' vākchirā rā bhūmau gardabhādbhayamōhitaḥ ।
sahasōtthāya sambhrāntō bhayārtō madavihvalaḥ ॥ 26 ॥
unmatta iva digvāsā durvākyaṃ pralapanbahu ।
durgandhaṃ dussahaṃ ghōraṃ timiraṃ narakōpamam ॥ 27 ॥
malapaṅkaṃ praviśyāśu magnastatra sa rāvaṇaḥ ।
kaṇṭhē baddhvā daśagrīvaṃ pramadā raktavāsinī ॥ 28 ॥
kālī kardamaliptāṅgī diśaṃ yāmyāṃ prakarṣati ।
ēvaṃ tatra mayā dṛṣṭaḥ kumbhakarṇō niśācharaḥ ॥ 29 ॥
rāvaṇasya sutāssarvē dṛṣṭāstailasamukṣitāḥ ।
varāhēṇa daśagrīvaśśiṃśumārēṇa chēndrajit ॥ 30 ॥
uṣṭrēṇa kumbhakarṇaścha prayātā dakṣiṇāṃ diśam ।
ēkastatra mayā dṛṣṭaḥ śvētachChatrō vibhīṣaṇaḥ ॥ 31 ॥
śuklamālyāmbaradharaḥ śuklagandhānulēpanaḥ ।
śaṅkhadundhubhinirghōṣairnṛttagītairalaṅkṛtaḥ ॥ 32 ॥
āruhya śailasaṅkāśaṃ mēghastanitanissvanam ।
chaturdantaṃ gajaṃ divyamāstē tatra vibhīṣaṇaḥ ॥ 33 ॥
chaturbhissachivaiḥ sārthaṃ vaihāyasamupasthitaḥ ।
samājaścha mayā dṛṣṭō gītavāditraniḥsvanaḥ ॥ 34 ॥
pibatāṃ raktamālyānāṃ rakṣasāṃ raktavāsasām ।
laṅkā chēyaṃ purī ramyā savājirathakuñjarāḥ ॥ 35 ॥
sāgarē patitā dṛṣṭā bhagnagōpuratōraṇā ।
laṅkā dṛṣṭā mayā svapnē rāvaṇēnābhirakṣitā ॥ 36 ॥
dagdhā rāmasya dūtēna vānarēṇa tarasvinā ।
pītvā tailaṃ pranṛttāścha prahasantyō mahāsvanāḥ ॥ 37 ॥
laṅkāyāṃ bhasmarūkṣāyāṃ sarvā rākṣasastriyaḥ ।
kumbhakarṇādayaśchēmē sarvē rākṣasapuṅgavāḥ ॥ 38 ॥
raktaṃ nivasanaṃ gṛhya praviṣṭā gōmayahradē ।
apagachChata naśyadhvaṃ sītāmāpnōti rāghavaḥ ॥ 39 ॥
ghātayētparamāmarṣī yuṣmānsārthaṃ hi rākṣasaiḥ ।
priyāṃ bahumatāṃ bhāryāṃ vanavāsamanuvratām ॥ 40 ॥
bhartsitāṃ tarjitāṃ vāpi nānumaṃsyati rāghavaḥ ।
tadalaṃ krūravākyaiścha sāntvamēvābhidhīyatām ॥ 41 ॥
abhiyāchāma vaidēhīmētaddhi mama rōchatē ।
yasyāmēvaṃvidhaḥ svapnō duḥkhitāyāṃ pradṛśyatē ॥ 42 ॥
sā duḥkhairvividhairmuktā priyaṃ prāpnōtyanuttamam ।
bhartsitāmapi yāchadhvaṃ rākṣasyaḥ kiṃ vivakṣayā ॥ 43 ॥
rāghavāddhi bhayaṃ ghōraṃ rākṣasānāmupasthitam ।
praṇipātaprasannā hi maithilī janakātmajā ॥ 44 ॥
alamēṣā paritrātuṃ rākṣasyō mahatō bhayāt ।
api chāsyā viśālākṣyā na kiñchidupalakṣayē ॥ 45 ॥
virūpamapi chāṅgēṣu susūkṣmamapi lakṣaṇam ।
Chāyāvaiguṇyamātraṃ tu śaṅkē duḥkhamupasthitam ॥ 46 ॥
aduḥkhārhāmimāṃ dēvīṃ vaihāyasamupasthitām ।
arthasiddhiṃ tu vaidēhyāḥ paśyāmyahamupasthitām ॥ 47 ॥
rākṣasēndravināśaṃ cha vijayaṃ rāghavasya cha ।
nimittabhūtamētattu śrōtumasyā mahatpriyam ॥ 48 ॥
dṛśyatē cha sphurachchakṣuḥ padmapatramivāyatam ।
īṣachCha hṛṣitō vāsyā dakṣiṇāyā hyadakṣiṇaḥ ॥ 49 ॥
akasmādēva vaidēhyā bāhurēkaḥ prakampatē ।
karēṇuhastapratima ssavyaśchōruranuttamaḥ ॥ 50 ॥
vēpamānaḥ sūchayati rāghavaṃ purataḥ sthitam ।
pakṣī cha śākhānilayaṃ praviṣṭaḥ punaḥ punaśchōttamasāntvavādī ।
susvāgatāṃ vāchamudīrayānaḥ punaḥ punaśchōdayatīva hṛṣṭaḥ ॥ 51 ॥
ityārṣē śrīmadrāmāyaṇē vālmīkīya ādikāvyē sundarakāṇḍē saptaviṃśassargaḥ ॥
