ശ്രീമദ്വാല്മീകീയ രാമായണേ സുംദരകാംഡമ് ।
അഥ ഷഷ്ഠസ്സര്ഗഃ ।
സ നികാമം വിമാനേഷു നിഷണ്ണഃ കാമരൂപധൃത് ।
വിചചാര പുനര്ലംകാം ലാഘവേന സമന്വിതഃ ॥ 1 ॥
ആസസാദാഥ ലക്ഷ്മീവാന്രാക്ഷസേംദ്രനിവേശനമ് ।
പ്രാകാരേണാര്കവര്ണേന ഭാസ്വരേണാഭിസമ്വൃതമ് ॥ 2 ॥
രക്ഷിതം രാക്ഷസൈര്ഘോരൈഃ സിംഹൈരിവ മഹദ്വനമ് ।
സമീക്ഷമാണോ ഭവനം ചകാശേ കപികുംജരഃ ॥ 3 ॥
രൂപ്യകോപഹിതൈ ശ്ചിത്രൈസ്തോരണൈര്ഹേമഭൂഷിതൈഃ ।
വിചിത്രാഭിശ്ച കക്ഷ്യാഭിര്ദ്വാരൈശ്ച രുചിരൈർവൃതമ് ॥ 4 ॥
ഗജാസ്ഥിതൈര്മഹാമാത്രൈഃ ശൂരൈശ്ച വിഗതശ്രമൈഃ ।
ഉപസ്ഥിതമസംഹാര്യൈഃ ര്ഹയൈഃ സ്യംദനയായിഭിഃ ॥ 5 ॥
സിംഹവ്യാഘ്രതനുത്രാണൈര്ദാംതകാംചനരാജതൈഃ ।
ഘോഷവദ്ഭിർവിചിത്രൈശ്ച സദാ വിചരിതം രഥൈഃ ॥ 6 ॥
ബഹുരത്നസമാകീര്ണം പരാര്ഥ്യസനഭാജനമ് ।
മഹാരഥസമാവാസം മഹാരഥമഹാസ്വനമ് ॥ 7 ॥
ദൃശ്യൈശ്ച പരമോദാരൈസ്തൈസ്തൈശ്ച മൃഗപക്ഷിഭിഃ ।
വിവിധൈ ര്ബഹുസാഹസ്രൈഃ പരിപൂര്ണം സമംതതഃ ॥ 8 ॥
വിനീതൈരംതപാലൈശ്ച രക്ഷോഭിശ്ച സുരക്ഷിതമ് ।
മുഖ്യാഭിശ്ച വരസ്ത്രീഭിഃ പരിപൂര്ണം സമംതതഃ ॥ 9 ॥
മുദിതപ്രമദാരത്നം രാക്ഷസേംദ്രനിവേശനമ് ।
വരാഭരണസംഹ്രാദൈഃ സമുദ്രസ്വനന്നിസ്വനമ് ॥ 10 ॥
തദ്രാജഗുണസംപന്നം മുഖ്യൈശ്ചാഗുരുചംദനൈഃ ।
മഹാജനൈഃ സമാകീര്ണാം സിംഹൈരിവ മഹദ്വനമ് ॥ 11 ॥
ഭേരീമൃദംഗാഭിരുതം ശംഖഘോഷനിനാദിതമ് ।
നിത്യാര്ചിതം പർവഹുതം പൂജിതം രാക്ഷസൈഃ സദാ ॥ 12 ॥
സമുദ്രമിവ ഗംഭീരം സമുദ്രമിവ നിസ്സ്വനമ് ।
മഹാത്മനോ മഹാദ്വേശ്മ മഹാരത്നപരിച്ഛദമ് ॥ 13 ॥
മഹാരത്നസമാകീര്ണം ദദര്ശ സ മഹാകപിഃ ।
വിരാജമാനം വപുഷാ ഗജാശ്വരഥസംകുലമ് ॥ 14 ॥
ലംകാഭരണമിത്യേവ സോഽമന്യത മഹാകപിഃ ।
ചചാര ഹനുമാംസ്തത്ര രാവണസ്യ സമീപതഃ ॥ 15 ॥
ഗൃഹാദ്ഗൃഹം രാക്ഷസാനാമുദ്യാനാനി ച വാനരഃ ।
വീക്ഷമാണോഽഹ്യസംത്രസ്തഃ പ്രാസാദാംശ്ച ചചാര സഃ ॥ 16 ॥
അവപ്ലുത്യ മഹാവേഗഃ പ്രഹസ്തസ്യ നിവേശനമ് ।
തതോഽന്യത്പുപ്ലുവേ വേശ്മ മഹാപാര്ശ്വസ്യ വീര്യവാന് ॥ 17 ॥
അഥ മേഘപ്രതീകാശം കുംഭകര്ണനിവേശനമ് ।
വിഭീഷണസ്യ ച തദാ പുപ്ലുവേ സ മഹാകപിഃ ॥ 18 ॥
മഹോദരസ്യ ച ഗൃഹം വിരൂപാക്ഷസ്യ ചൈവ ഹി ।
വിദ്യുജ്ജിഹ്വസ്യ ഭവനം വിദ്യുന്മാലേസ്തഥൈവ ച ॥ 19 ॥
വജ്രദംഷ്ട്രസ്യ ച തഥാ പുപ്ലുവേ സ മഹാകപിഃ ।
ശുകസ്യ ച മഹാതേജാഃ സാരണസ്യ ച ധീമതഃ ॥ 20 ॥
തഥാ ചേംദ്രജിതോ വേശ്മ ജഗാമ ഹരിയൂഥപഃ ।
ജംബുമാലേഃ സുമാലേശ്ച ജഗാമ ഹരിസത്തമഃ ॥ 21 ॥
രശ്മികേതോശ്ച ഭവനം സൂര്യകേതോസ്തഥൈവ ച ।
വജ്രകായസ്യ ച തഥാ പുപ്ലുവേ സ മഹാകപിഃ ॥ 22 ॥
ധൂമ്രാക്ഷസ്യ ച സംപാതേര്ഭവനം മാരുതാത്മജഃ ।
വിദ്യുദ്രൂപസ്യ ഭീമസ്യ ഘനസ്യ വിഘനസ്യ ച ॥ 23 ॥
ശുകനാസസ്യ വക്രസ്യ ശഠസ്യ വികടസ്യ ച ।
ബ്രഹ്മകര്ണസ്യ ദംഷ്ട്രസ്യ രോമശസ്യ ച രക്ഷസഃ ॥ 24 ॥
യുദ്ധോന്മത്തസ്യ മത്തസ്യ ധ്വജഗ്രീവസ്യ നാദിനഃ ।
വിദ്യുജ്ജിഹ്വേംദ്രജിഹ്വാനാം തഥാ ഹസ്തിമുഖസ്യ ച ॥ 25 ॥
കരാലസ്യ പിശാചസ്യ ശോണിത അക്ഷസ്യ ചൈവ ഹി ।
ക്രമമാണഃ ക്രമേണ ഏവ ഹനൂമാന് മാരുത ആത്മജഃ ॥ 26 ॥
തേഷു തേഷു മഹാര്ഹേഷു ഭവനേഷു മഹായശാഃ ।
തേഷാമൃദ്ധിമതാമൃദ്ധിം ദദര്ശ സ മഹാകപിഃ ॥ 27 ॥
സർവേഷാം സമതിക്രമ്യ ഭവനാനി സമംതതഃ ।
ആസസാദാഥ ലക്ഷ്മീവാന് രാക്ഷസേദ്രനിവേശനമ് ॥ 28 ॥
രാവണസ്യോപശായിന്യോ ദദര്ശ ഹരിസത്തമഃ ।
വിചരന്ഹരിശാര്ദൂലോ രാക്ഷസീർവികൃതേക്ഷണാഃ ॥ 29 ॥
ശൂലമുദ്ഗരഹസ്താശ്ച ശക്തിതോമരധാരിണീഃ ।
ദദര്ശ വിവിധാന് ഗുല്മാന് തസ്യ രക്ഷഃപതേര്ഗൃഹേ ॥ 30 ॥
രാക്ഷസാംശ്ച മഹാകായാന്നാനാപ്രഹരണോദ്യതാന് ।
രക്താന് ശ്വേതാന് സിതാംശ്ചൈവ ഹരീംശ്ചാപി മഹാജവാന് ॥ 31 ॥
കുലീനാന് രൂപസംപന്നാന് ഗജാന്പരഗജാരുജാന് ।
നിഷ്ഠിതാന് ഗജശിക്ഷയാമൈരാവതസമാന്യുധി ॥ 32 ॥
നിഹംത്രൂന് പരസൈന്യാനാം ഗൃഹേ തസ്മിന് ദദര്ശ സഃ ।
ക്ഷരതശ്ച യഥാ മേഘാന് സ്രവതശ്ച യഥാ ഗിരീന് ॥ 33 ॥
മേഘസംതതിനിര്ഘോഷാന് ദുര്ധര്ഷാന് സമരേ പരൈഃ ।
സഹസ്രം വാഹിനീസ്തത്ര ജാംബൂനദപരിഷ്കൃതാഃ ॥ 34 ॥
ഹേമജാലപരിച്ഛന്നാസ്തരുണാദിത്യസന്നിഭാഃ ।
ദദര്ശ രാക്ഷസേംദ്രസ്യ രാവണസ്യ നിവേശനേ ॥ 35 ॥
ശിബികാ വിവിധാകാരാഃ സ കപിര്മാരുതാത്മജഃ ।
ലതാഗൃഹാണി ചിത്രാണി ചിത്രശാലാഗൃഹാണി ച ॥ 36 ॥
ക്രീഡാഗൃഹാണി ചാന്യാനി ദാരുപർവതകാനപി ।
കാമസ്യ ഗൃഹകം രമ്യം ദിവാഗൃഹകമേവ ച ॥ 37 ॥
ദദര്ശ രാക്ഷസേംദ്രസ്യ രാവണസ്യ നിവേശനേ ।
സ മംദരഗിരിപ്രഖ്യം മയൂരസ്ഥാനസംകുലമ് ॥ 38 ॥
ധ്വജയഷ്ടിഭിരാകീര്ണം ദദര്ശ ഭവനോത്തമമ് ।
അനേകരത്നസംകീര്ണം നിധിജാലം സമംതതഃ ॥ 39 ॥
ധീരനിഷ്ഠിതകര്മാംതം ഗൃഹം ഭൂതപതേരിവ ।
അര്ചിര്ഭിശ്ചാപി രത്നാനാം തേജസാ രാവണസ്യ ച ॥ 40 ॥
വിരരാജാഥ തദ്വേശ്മ രശ്മിമാനിവ രശ്മിഭിഃ ।
ജാംബൂനദമയാന്യേന ശയനാന്യാസനാനി ച ॥ 41 ॥
ഭാജനാനി ച മുഖ്യാനി ദദര്ശ ഹരിയൂഥപഃ ।
മധ്വാസവകൃതക്ലേദം മണിഭാജനസംകുലമ് ॥ 42 ॥
മനോരമമസംബാധം കുബേരഭവനം യഥാ ।
നൂപുരാണാം ച ഘോഷേണ കാംചീനാം നിനദേന ച ॥ 43 ॥
മൃദങ്തലഘോഷൈശ്ച ഘോഷവദ്ഭിർവിനാദിതമ് ।
പ്രാസാദസംഘാതയുതം സ്ത്രീരത്നശതസംകുലമ് ॥ 44 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ഷഷ്ഠസ്സര്ഗഃ ॥
