ശ്രീമദ്വാല്മീകീയ രാമായണേ സുംദരകാംഡമ് ।
അഥ പംചഷഷ്ടിതമസ്സര്ഗഃ ।
തതഃ പ്രസ്രവണം ശൈലം തേ ഗത്വാ ചിത്രകാനനമ് ।
പ്രണമ്യ ശിരസാ രാമം ലക്ഷ്മണം ച മഹാബലമ് ॥ 1 ॥
യുവരാജം പുരസ്കൃത്യ സുഗ്രീവമഭിവാദ്യ ച ।
പ്രവൃത്തിമഥ സീതായാഃ പ്രവക്തുമുപചക്രമുഃ ॥ 2 ॥
രാവണാംതഃ പുരേ രോധം രാക്ഷസീഭിശ്ച തര്ജനമ് ।
രാമേ സമനുരാഗം ച യശ്ചായം സമയഃ കൃതഃ ॥ 3 ॥
ഏതദാഖ്യാംതി തേ സർവേ ഹരയോ രാമസന്നിധൌ ।
വൈദേഹീമക്ഷതാം ശ്രുത്വാ രാമസ്തൂത്തരമബ്രവീത് ॥ 4 ॥
ക്വ സീതാ വര്തതേ ദേവീ കഥം ച മയി വര്തതേ ।
ഏതന്മേ സർവമാഖ്യാത വൈദേഹീം പ്രതി വാനരാഃ ॥ 5 ॥
രാമസ്യ ഗദിതം ശ്രുത്വാ ഹരയോ രാമസന്നിധൌ ।
ചോദയംതി ഹനൂമംതം സീതാവൃത്താംതകോവിദമ് ॥ 6 ॥
ശ്രുത്വാ തു വചനം തേഷാം ഹനുമാന്മാരുതാത്മജഃ ।
പ്രണമ്യ ശിരസാ ദേവ്യൈ സീതായൈ താം ദിശം പ്രതി ॥ 7 ॥
ഉവാച വാക്യം വാക്യജ്ഞസ്സീതായാ ദര്ശനം യഥാ ।
സമുദ്രം ലംഘയിത്വാഹം ശതയോജനമായതമ് ॥ 8 ॥
അഗച്ഛം ജാനകീം സീതാം മാര്ഗമാണോ ദിദൃക്ഷയാ ।
തത്ര ലംകേതി നഗരീ രാവണസ്യ ദുരാത്മനഃ ॥ 9 ॥
ദക്ഷിണസ്യ സമുദ്രസ്യ തീരേ വസതി ദക്ഷിണേ ।
തത്ര ദൃഷ്ടാ മയാ സീതാ രാവണാംതഃ പുരേ സതീ ॥ 10 ॥
സന്ന്യസ്യ ത്വയി ജീവംതീ രാമാ രാമ മനോരഥമ് ।
ദൃഷ്ടാ മേ രാക്ഷസീമധ്യേ തര്ജ്യമാനാ മുഹുര്മുഹുഃ ॥ 11 ॥
രാക്ഷസീഭിർവിരൂപാഭീ രക്ഷിതാ പ്രമദാവനേ ।
ദുഃഖ മാസാദ്യതേ ദേവീ തഥാഽദുഃഖോചിതാ സതീ ॥ 12 ॥
രാവണാംതഃ പുരേ രുദ്ധാ രാക്ഷസീഭി സ്സുരക്ഷിതാ ।
ഏകവേണീധരാ ദീനാ ത്വയി ചിംതാപരായണാ ॥ 13 ॥
അധഃശയ്യാ വിവര്ണാംഗീ പദ്മിനീവ ഹിമാഗമേ ।
രാവണാദ്വിനിവൃത്താര്ഥാ മര്തവ്യകൃതനിശ്ചയാ ॥ 14 ॥
ദേവീ കഥംചിത്കാകുത്സ്ഥ ത്വന്മനാ മാര്ഗിതാ മയാ ।
ഇക്ഷ്വാകുവംശവിഖ്യാതിം ശനൈഃ കീര്തയതാനഘ ॥ 15 ॥
സാ മയാ നരശാര്ദൂല വിശ്വാസമുപപാദിതാ ।
തത സ്സംഭാഷിതാ ദേവീ സർവമര്ഥം ച ദര്ശിതാ ॥ 16 ॥
രാമസുഗ്രീവസഖ്യം ച ശ്രുത്വാ പ്രീതിമുപാഗതാ ।
നിയത സ്സമുദാചാരോ ഭക്തിശ്ചാസ്യാസ്തഥാ ത്വയി ॥ 17 ॥
ഏവം മയാ മഹാഭാഗാ ദൃഷ്ടാ ജനകനംദിനീ ।
ഉഗ്രേണ തപസാ യുക്താ ത്വദ്ഭക്ത്യാ പുരുഷര്ഷഭ ॥ 18 ॥
അഭിജ്ഞാനം ച മേ ദത്തം യഥാ വൃത്തം തവാംതികേ ।
ചിത്രകൂടേ മഹാപ്രാജ്ഞ വായസം പ്രതി രാഘവ ॥ 19 ॥
വിജ്ഞാപ്യശ്ച നരവ്യാഘ്രോ രാമോ വായുസുത ത്വയാ ।
അഖിലേനേഹ യദ്ധൃഷ്ടമിതി മാമാഹ ജാനകീ ॥ 20 ॥
അയം ചാസ്മൈ പ്രദാതവ്യോ യത്നാത്സുപരിരക്ഷിതഃ ।
ബ്രുവതാ വചനാന്യേവം സുഗ്രീവസ്യോപശൃണ്വതഃ ॥ 21 ॥
ഏഷ ചൂഡാമണിശ്ശ്രീമാന് മയാ സുപരിരക്ഷിതഃ ।
മനശ്ശിലായാസ്തിലകോ ഗംഡപാര്ശ്വേ നിവേശിതഃ ॥ 22 ॥
ത്വയാ പ്രണഷ്ഠേ തിലകേ തം കില സ്മര്തുമര്ഹസി ।
ഏഷ നിര്യാതിതശ്ശ്രീമാന്മയാ തേ വാരി സംഭവഃ ।
ഏതം ദൃഷ്ട്വാ പ്രഹൃഷ്യാമി വ്യസനേ ത്വാമിവാനഘ ॥ 23 ॥
ജീവിതം ധാരയിഷ്യാമി മാസം ദശരഥാത്മജ ॥ 24 ॥
ഊര്ധ്വം മാസാന്ന ജീവേയം രക്ഷസാം വശമാഗതാ ।
ഇതി മാമബ്രവീത്സീതാ കൃശാംഗീ ധര്മചാരിണീ ॥ 25 ॥
രാവണാംതഃ പുരേ രുദ്ധാ മൃഗീവോത്ഫുല്ലലോചനാ ।
ഏതദേവ മയാഖ്യാതം സർവം രാഘവ യദ്യഥാ ॥ 26 ॥
സർവഥാ സാഗരജലേ സംതാരഃ പ്രവിധീയതാമ് ।
തൌ ജാതാശ്വാസൌ രാജപുത്രൌ വിദിത്വാ തച്ചാഭിജ്ഞാനം രാഘവായ പ്രദായ ।
ദേവ്യാ ചാഖ്യാതം സർവമേവാനുപൂർവ്യാദ്വാചാ സംപൂര്ണം വായുപുത്ത്ര ശ്ശശംസ ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ പംചഷഷ്ടിതമസ്സര്ഗഃ ॥
