śrīmadvālmīkīya rāmāyaṇē sundarakāṇḍam ।
atha pañchaṣaṣṭitamassargaḥ ।
tataḥ prasravaṇaṃ śailaṃ tē gatvā chitrakānanam ।
praṇamya śirasā rāmaṃ lakṣmaṇaṃ cha mahābalam ॥ 1 ॥
yuvarājaṃ puraskṛtya sugrīvamabhivādya cha ।
pravṛttimatha sītāyāḥ pravaktumupachakramuḥ ॥ 2 ॥
rāvaṇāntaḥ purē rōdhaṃ rākṣasībhiścha tarjanam ।
rāmē samanurāgaṃ cha yaśchāyaṃ samayaḥ kṛtaḥ ॥ 3 ॥
ētadākhyānti tē sarvē harayō rāmasannidhau ।
vaidēhīmakṣatāṃ śrutvā rāmastūttaramabravīt ॥ 4 ॥
kva sītā vartatē dēvī kathaṃ cha mayi vartatē ।
ētanmē sarvamākhyāta vaidēhīṃ prati vānarāḥ ॥ 5 ॥
rāmasya gaditaṃ śrutvā harayō rāmasannidhau ।
chōdayanti hanūmantaṃ sītāvṛttāntakōvidam ॥ 6 ॥
śrutvā tu vachanaṃ tēṣāṃ hanumānmārutātmajaḥ ।
praṇamya śirasā dēvyai sītāyai tāṃ diśaṃ prati ॥ 7 ॥
uvācha vākyaṃ vākyajñassītāyā darśanaṃ yathā ।
samudraṃ laṅghayitvāhaṃ śatayōjanamāyatam ॥ 8 ॥
agachChaṃ jānakīṃ sītāṃ mārgamāṇō didṛkṣayā ।
tatra laṅkēti nagarī rāvaṇasya durātmanaḥ ॥ 9 ॥
dakṣiṇasya samudrasya tīrē vasati dakṣiṇē ।
tatra dṛṣṭā mayā sītā rāvaṇāntaḥ purē satī ॥ 10 ॥
sannyasya tvayi jīvantī rāmā rāma manōratham ।
dṛṣṭā mē rākṣasīmadhyē tarjyamānā muhurmuhuḥ ॥ 11 ॥
rākṣasībhirvirūpābhī rakṣitā pramadāvanē ।
duḥkha māsādyatē dēvī tathā'duḥkhōchitā satī ॥ 12 ॥
rāvaṇāntaḥ purē ruddhā rākṣasībhi ssurakṣitā ।
ēkavēṇīdharā dīnā tvayi chintāparāyaṇā ॥ 13 ॥
adhaḥśayyā vivarṇāṅgī padminīva himāgamē ।
rāvaṇādvinivṛttārthā martavyakṛtaniśchayā ॥ 14 ॥
dēvī kathañchitkākutstha tvanmanā mārgitā mayā ।
ikṣvākuvaṃśavikhyātiṃ śanaiḥ kīrtayatānagha ॥ 15 ॥
sā mayā naraśārdūla viśvāsamupapāditā ।
tata ssambhāṣitā dēvī sarvamarthaṃ cha darśitā ॥ 16 ॥
rāmasugrīvasakhyaṃ cha śrutvā prītimupāgatā ।
niyata ssamudāchārō bhaktiśchāsyāstathā tvayi ॥ 17 ॥
ēvaṃ mayā mahābhāgā dṛṣṭā janakanandinī ।
ugrēṇa tapasā yuktā tvadbhaktyā puruṣarṣabha ॥ 18 ॥
abhijñānaṃ cha mē dattaṃ yathā vṛttaṃ tavāntikē ।
chitrakūṭē mahāprājña vāyasaṃ prati rāghava ॥ 19 ॥
vijñāpyaścha naravyāghrō rāmō vāyusuta tvayā ।
akhilēnēha yaddhṛṣṭamiti māmāha jānakī ॥ 20 ॥
ayaṃ chāsmai pradātavyō yatnātsuparirakṣitaḥ ।
bruvatā vachanānyēvaṃ sugrīvasyōpaśṛṇvataḥ ॥ 21 ॥
ēṣa chūḍāmaṇiśśrīmān mayā suparirakṣitaḥ ।
manaśśilāyāstilakō gaṇḍapārśvē nivēśitaḥ ॥ 22 ॥
tvayā praṇaṣṭhē tilakē taṃ kila smartumarhasi ।
ēṣa niryātitaśśrīmānmayā tē vāri sambhavaḥ ।
ētaṃ dṛṣṭvā prahṛṣyāmi vyasanē tvāmivānagha ॥ 23 ॥
jīvitaṃ dhārayiṣyāmi māsaṃ daśarathātmaja ॥ 24 ॥
ūrdhvaṃ māsānna jīvēyaṃ rakṣasāṃ vaśamāgatā ।
iti māmabravītsītā kṛśāṅgī dharmachāriṇī ॥ 25 ॥
rāvaṇāntaḥ purē ruddhā mṛgīvōtphullalōchanā ।
ētadēva mayākhyātaṃ sarvaṃ rāghava yadyathā ॥ 26 ॥
sarvathā sāgarajalē santāraḥ pravidhīyatām ।
tau jātāśvāsau rājaputrau viditvā tachchābhijñānaṃ rāghavāya pradāya ।
dēvyā chākhyātaṃ sarvamēvānupūrvyādvāchā sampūrṇaṃ vāyuputtra śśaśaṃsa ॥ 27 ॥
ityārṣē śrīmadrāmāyaṇē vālmīkīya ādikāvyē sundarakāṇḍē pañchaṣaṣṭitamassargaḥ ॥
