શ્રીમદ્વાલ્મીકીય રામાયણે સુંદરકાંડમ્ ।
અથ પંચષષ્ટિતમસ્સર્ગઃ ।
તતઃ પ્રસ્રવણં શૈલં તે ગત્વા ચિત્રકાનનમ્ ।
પ્રણમ્ય શિરસા રામં લક્ષ્મણં ચ મહાબલમ્ ॥ 1 ॥
યુવરાજં પુરસ્કૃત્ય સુગ્રીવમભિવાદ્ય ચ ।
પ્રવૃત્તિમથ સીતાયાઃ પ્રવક્તુમુપચક્રમુઃ ॥ 2 ॥
રાવણાંતઃ પુરે રોધં રાક્ષસીભિશ્ચ તર્જનમ્ ।
રામે સમનુરાગં ચ યશ્ચાયં સમયઃ કૃતઃ ॥ 3 ॥
એતદાખ્યાંતિ તે સર્વે હરયો રામસન્નિધૌ ।
વૈદેહીમક્ષતાં શ્રુત્વા રામસ્તૂત્તરમબ્રવીત્ ॥ 4 ॥
ક્વ સીતા વર્તતે દેવી કથં ચ મયિ વર્તતે ।
એતન્મે સર્વમાખ્યાત વૈદેહીં પ્રતિ વાનરાઃ ॥ 5 ॥
રામસ્ય ગદિતં શ્રુત્વા હરયો રામસન્નિધૌ ।
ચોદયંતિ હનૂમંતં સીતાવૃત્તાંતકોવિદમ્ ॥ 6 ॥
શ્રુત્વા તુ વચનં તેષાં હનુમાન્મારુતાત્મજઃ ।
પ્રણમ્ય શિરસા દેવ્યૈ સીતાયૈ તાં દિશં પ્રતિ ॥ 7 ॥
ઉવાચ વાક્યં વાક્યજ્ઞસ્સીતાયા દર્શનં યથા ।
સમુદ્રં લંઘયિત્વાહં શતયોજનમાયતમ્ ॥ 8 ॥
અગચ્છં જાનકીં સીતાં માર્ગમાણો દિદૃક્ષયા ।
તત્ર લંકેતિ નગરી રાવણસ્ય દુરાત્મનઃ ॥ 9 ॥
દક્ષિણસ્ય સમુદ્રસ્ય તીરે વસતિ દક્ષિણે ।
તત્ર દૃષ્ટા મયા સીતા રાવણાંતઃ પુરે સતી ॥ 10 ॥
સન્ન્યસ્ય ત્વયિ જીવંતી રામા રામ મનોરથમ્ ।
દૃષ્ટા મે રાક્ષસીમધ્યે તર્જ્યમાના મુહુર્મુહુઃ ॥ 11 ॥
રાક્ષસીભિર્વિરૂપાભી રક્ષિતા પ્રમદાવને ।
દુઃખ માસાદ્યતે દેવી તથાઽદુઃખોચિતા સતી ॥ 12 ॥
રાવણાંતઃ પુરે રુદ્ધા રાક્ષસીભિ સ્સુરક્ષિતા ।
એકવેણીધરા દીના ત્વયિ ચિંતાપરાયણા ॥ 13 ॥
અધઃશય્યા વિવર્ણાંગી પદ્મિનીવ હિમાગમે ।
રાવણાદ્વિનિવૃત્તાર્થા મર્તવ્યકૃતનિશ્ચયા ॥ 14 ॥
દેવી કથંચિત્કાકુત્સ્થ ત્વન્મના માર્ગિતા મયા ।
ઇક્ષ્વાકુવંશવિખ્યાતિં શનૈઃ કીર્તયતાનઘ ॥ 15 ॥
સા મયા નરશાર્દૂલ વિશ્વાસમુપપાદિતા ।
તત સ્સંભાષિતા દેવી સર્વમર્થં ચ દર્શિતા ॥ 16 ॥
રામસુગ્રીવસખ્યં ચ શ્રુત્વા પ્રીતિમુપાગતા ।
નિયત સ્સમુદાચારો ભક્તિશ્ચાસ્યાસ્તથા ત્વયિ ॥ 17 ॥
એવં મયા મહાભાગા દૃષ્ટા જનકનંદિની ।
ઉગ્રેણ તપસા યુક્તા ત્વદ્ભક્ત્યા પુરુષર્ષભ ॥ 18 ॥
અભિજ્ઞાનં ચ મે દત્તં યથા વૃત્તં તવાંતિકે ।
ચિત્રકૂટે મહાપ્રાજ્ઞ વાયસં પ્રતિ રાઘવ ॥ 19 ॥
વિજ્ઞાપ્યશ્ચ નરવ્યાઘ્રો રામો વાયુસુત ત્વયા ।
અખિલેનેહ યદ્ધૃષ્ટમિતિ મામાહ જાનકી ॥ 20 ॥
અયં ચાસ્મૈ પ્રદાતવ્યો યત્નાત્સુપરિરક્ષિતઃ ।
બ્રુવતા વચનાન્યેવં સુગ્રીવસ્યોપશૃણ્વતઃ ॥ 21 ॥
એષ ચૂડામણિશ્શ્રીમાન્ મયા સુપરિરક્ષિતઃ ।
મનશ્શિલાયાસ્તિલકો ગંડપાર્શ્વે નિવેશિતઃ ॥ 22 ॥
ત્વયા પ્રણષ્ઠે તિલકે તં કિલ સ્મર્તુમર્હસિ ।
એષ નિર્યાતિતશ્શ્રીમાન્મયા તે વારિ સંભવઃ ।
એતં દૃષ્ટ્વા પ્રહૃષ્યામિ વ્યસને ત્વામિવાનઘ ॥ 23 ॥
જીવિતં ધારયિષ્યામિ માસં દશરથાત્મજ ॥ 24 ॥
ઊર્ધ્વં માસાન્ન જીવેયં રક્ષસાં વશમાગતા ।
ઇતિ મામબ્રવીત્સીતા કૃશાંગી ધર્મચારિણી ॥ 25 ॥
રાવણાંતઃ પુરે રુદ્ધા મૃગીવોત્ફુલ્લલોચના ।
એતદેવ મયાખ્યાતં સર્વં રાઘવ યદ્યથા ॥ 26 ॥
સર્વથા સાગરજલે સંતારઃ પ્રવિધીયતામ્ ।
તૌ જાતાશ્વાસૌ રાજપુત્રૌ વિદિત્વા તચ્ચાભિજ્ઞાનં રાઘવાય પ્રદાય ।
દેવ્યા ચાખ્યાતં સર્વમેવાનુપૂર્વ્યાદ્વાચા સંપૂર્ણં વાયુપુત્ત્ર શ્શશંસ ॥ 27 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે પંચષષ્ટિતમસ્સર્ગઃ ॥
