ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ପଂଚଷଷ୍ଟିତମସ୍ସର୍ଗଃ ।
ତତଃ ପ୍ରସ୍ରଵଣଂ ଶୈଲଂ ତେ ଗତ୍ଵା ଚିତ୍ରକାନନମ୍ ।
ପ୍ରଣମ୍ୟ ଶିରସା ରାମଂ ଲକ୍ଷ୍ମଣଂ ଚ ମହାବଲମ୍ ॥ 1 ॥
ୟୁଵରାଜଂ ପୁରସ୍କୃତ୍ୟ ସୁଗ୍ରୀଵମଭିଵାଦ୍ୟ ଚ ।
ପ୍ରଵୃତ୍ତିମଥ ସୀତାୟାଃ ପ୍ରଵକ୍ତୁମୁପଚକ୍ରମୁଃ ॥ 2 ॥
ରାଵଣାଂତଃ ପୁରେ ରୋଧଂ ରାକ୍ଷସୀଭିଶ୍ଚ ତର୍ଜନମ୍ ।
ରାମେ ସମନୁରାଗଂ ଚ ୟଶ୍ଚାୟଂ ସମୟଃ କୃତଃ ॥ 3 ॥
ଏତଦାଖ୍ୟାଂତି ତେ ସର୍ଵେ ହରୟୋ ରାମସନ୍ନିଧୌ ।
ଵୈଦେହୀମକ୍ଷତାଂ ଶ୍ରୁତ୍ଵା ରାମସ୍ତୂତ୍ତରମବ୍ରଵୀତ୍ ॥ 4 ॥
କ୍ଵ ସୀତା ଵର୍ତତେ ଦେଵୀ କଥଂ ଚ ମୟି ଵର୍ତତେ ।
ଏତନ୍ମେ ସର୍ଵମାଖ୍ୟାତ ଵୈଦେହୀଂ ପ୍ରତି ଵାନରାଃ ॥ 5 ॥
ରାମସ୍ୟ ଗଦିତଂ ଶ୍ରୁତ୍ଵା ହରୟୋ ରାମସନ୍ନିଧୌ ।
ଚୋଦୟଂତି ହନୂମଂତଂ ସୀତାଵୃତ୍ତାଂତକୋଵିଦମ୍ ॥ 6 ॥
ଶ୍ରୁତ୍ଵା ତୁ ଵଚନଂ ତେଷାଂ ହନୁମାନ୍ମାରୁତାତ୍ମଜଃ ।
ପ୍ରଣମ୍ୟ ଶିରସା ଦେଵ୍ୟୈ ସୀତାୟୈ ତାଂ ଦିଶଂ ପ୍ରତି ॥ 7 ॥
ଉଵାଚ ଵାକ୍ୟଂ ଵାକ୍ୟଜ୍ଞସ୍ସୀତାୟା ଦର୍ଶନଂ ୟଥା ।
ସମୁଦ୍ରଂ ଲଂଘୟିତ୍ଵାହଂ ଶତୟୋଜନମାୟତମ୍ ॥ 8 ॥
ଅଗଚ୍ଛଂ ଜାନକୀଂ ସୀତାଂ ମାର୍ଗମାଣୋ ଦିଦୃକ୍ଷୟା ।
ତତ୍ର ଲଂକେତି ନଗରୀ ରାଵଣସ୍ୟ ଦୁରାତ୍ମନଃ ॥ 9 ॥
ଦକ୍ଷିଣସ୍ୟ ସମୁଦ୍ରସ୍ୟ ତୀରେ ଵସତି ଦକ୍ଷିଣେ ।
ତତ୍ର ଦୃଷ୍ଟା ମୟା ସୀତା ରାଵଣାଂତଃ ପୁରେ ସତୀ ॥ 10 ॥
ସନ୍ନ୍ୟସ୍ୟ ତ୍ଵୟି ଜୀଵଂତୀ ରାମା ରାମ ମନୋରଥମ୍ ।
ଦୃଷ୍ଟା ମେ ରାକ୍ଷସୀମଧ୍ୟେ ତର୍ଜ୍ୟମାନା ମୁହୁର୍ମୁହୁଃ ॥ 11 ॥
ରାକ୍ଷସୀଭିର୍ଵିରୂପାଭୀ ରକ୍ଷିତା ପ୍ରମଦାଵନେ ।
ଦୁଃଖ ମାସାଦ୍ୟତେ ଦେଵୀ ତଥାଽଦୁଃଖୋଚିତା ସତୀ ॥ 12 ॥
ରାଵଣାଂତଃ ପୁରେ ରୁଦ୍ଧା ରାକ୍ଷସୀଭି ସ୍ସୁରକ୍ଷିତା ।
ଏକଵେଣୀଧରା ଦୀନା ତ୍ଵୟି ଚିଂତାପରାୟଣା ॥ 13 ॥
ଅଧଃଶୟ୍ୟା ଵିଵର୍ଣାଂଗୀ ପଦ୍ମିନୀଵ ହିମାଗମେ ।
ରାଵଣାଦ୍ଵିନିଵୃତ୍ତାର୍ଥା ମର୍ତଵ୍ୟକୃତନିଶ୍ଚୟା ॥ 14 ॥
ଦେଵୀ କଥଂଚିତ୍କାକୁତ୍ସ୍ଥ ତ୍ଵନ୍ମନା ମାର୍ଗିତା ମୟା ।
ଇକ୍ଷ୍ଵାକୁଵଂଶଵିଖ୍ୟାତିଂ ଶନୈଃ କୀର୍ତୟତାନଘ ॥ 15 ॥
ସା ମୟା ନରଶାର୍ଦୂଲ ଵିଶ୍ଵାସମୁପପାଦିତା ।
ତତ ସ୍ସଂଭାଷିତା ଦେଵୀ ସର୍ଵମର୍ଥଂ ଚ ଦର୍ଶିତା ॥ 16 ॥
ରାମସୁଗ୍ରୀଵସଖ୍ୟଂ ଚ ଶ୍ରୁତ୍ଵା ପ୍ରୀତିମୁପାଗତା ।
ନିୟତ ସ୍ସମୁଦାଚାରୋ ଭକ୍ତିଶ୍ଚାସ୍ୟାସ୍ତଥା ତ୍ଵୟି ॥ 17 ॥
ଏଵଂ ମୟା ମହାଭାଗା ଦୃଷ୍ଟା ଜନକନଂଦିନୀ ।
ଉଗ୍ରେଣ ତପସା ୟୁକ୍ତା ତ୍ଵଦ୍ଭକ୍ତ୍ୟା ପୁରୁଷର୍ଷଭ ॥ 18 ॥
ଅଭିଜ୍ଞାନଂ ଚ ମେ ଦତ୍ତଂ ୟଥା ଵୃତ୍ତଂ ତଵାଂତିକେ ।
ଚିତ୍ରକୂଟେ ମହାପ୍ରାଜ୍ଞ ଵାୟସଂ ପ୍ରତି ରାଘଵ ॥ 19 ॥
ଵିଜ୍ଞାପ୍ୟଶ୍ଚ ନରଵ୍ୟାଘ୍ରୋ ରାମୋ ଵାୟୁସୁତ ତ୍ଵୟା ।
ଅଖିଲେନେହ ୟଦ୍ଧୃଷ୍ଟମିତି ମାମାହ ଜାନକୀ ॥ 20 ॥
ଅୟଂ ଚାସ୍ମୈ ପ୍ରଦାତଵ୍ୟୋ ୟତ୍ନାତ୍ସୁପରିରକ୍ଷିତଃ ।
ବ୍ରୁଵତା ଵଚନାନ୍ୟେଵଂ ସୁଗ୍ରୀଵସ୍ୟୋପଶୃଣ୍ଵତଃ ॥ 21 ॥
ଏଷ ଚୂଡାମଣିଶ୍ଶ୍ରୀମାନ୍ ମୟା ସୁପରିରକ୍ଷିତଃ ।
ମନଶ୍ଶିଲାୟାସ୍ତିଲକୋ ଗଂଡପାର୍ଶ୍ଵେ ନିଵେଶିତଃ ॥ 22 ॥
ତ୍ଵୟା ପ୍ରଣଷ୍ଠେ ତିଲକେ ତଂ କିଲ ସ୍ମର୍ତୁମର୍ହସି ।
ଏଷ ନିର୍ୟାତିତଶ୍ଶ୍ରୀମାନ୍ମୟା ତେ ଵାରି ସଂଭଵଃ ।
ଏତଂ ଦୃଷ୍ଟ୍ଵା ପ୍ରହୃଷ୍ୟାମି ଵ୍ୟସନେ ତ୍ଵାମିଵାନଘ ॥ 23 ॥
ଜୀଵିତଂ ଧାରୟିଷ୍ୟାମି ମାସଂ ଦଶରଥାତ୍ମଜ ॥ 24 ॥
ଊର୍ଧ୍ଵଂ ମାସାନ୍ନ ଜୀଵେୟଂ ରକ୍ଷସାଂ ଵଶମାଗତା ।
ଇତି ମାମବ୍ରଵୀତ୍ସୀତା କୃଶାଂଗୀ ଧର୍ମଚାରିଣୀ ॥ 25 ॥
ରାଵଣାଂତଃ ପୁରେ ରୁଦ୍ଧା ମୃଗୀଵୋତ୍ଫୁଲ୍ଲଲୋଚନା ।
ଏତଦେଵ ମୟାଖ୍ୟାତଂ ସର୍ଵଂ ରାଘଵ ୟଦ୍ୟଥା ॥ 26 ॥
ସର୍ଵଥା ସାଗରଜଲେ ସଂତାରଃ ପ୍ରଵିଧୀୟତାମ୍ ।
ତୌ ଜାତାଶ୍ଵାସୌ ରାଜପୁତ୍ରୌ ଵିଦିତ୍ଵା ତଚ୍ଚାଭିଜ୍ଞାନଂ ରାଘଵାୟ ପ୍ରଦାୟ ।
ଦେଵ୍ୟା ଚାଖ୍ୟାତଂ ସର୍ଵମେଵାନୁପୂର୍ଵ୍ୟାଦ୍ଵାଚା ସଂପୂର୍ଣଂ ଵାୟୁପୁତ୍ତ୍ର ଶ୍ଶଶଂସ ॥ 27 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ପଂଚଷଷ୍ଟିତମସ୍ସର୍ଗଃ ॥
