ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଷଟ୍ଷଷ୍ଟିତମସ୍ସର୍ଗଃ ।
ଏଵମୁକ୍ତୋ ହନୁମତା ରାମୋ ଦଶରଥାତ୍ମଜଃ ।
ତଂ ମଣିଂ ହୃଦୟେ କୃତ୍ଵା ପ୍ରରୁରୋଦ ସଲକ୍ଷ୍ମଣଃ ॥ 1 ॥
ତଂ ତୁ ଦୃଷ୍ଟ୍ଵା ମଣିଶ୍ରେଷ୍ଠଂ ରାଘଵ ଶ୍ଶୋକକର୍ଶିତଃ ।
ନେତ୍ରାଭ୍ୟାମଶ୍ରୁପୂର୍ଣାଭ୍ୟାଂ ସୁଗ୍ରୀଵମିଦମବ୍ରଵୀତ୍ ॥ 2 ॥
ୟଥୈଵ ଧେନୁ ସ୍ସ୍ରଵତି ସ୍ନେହାଦ୍ଵତ୍ସସ୍ୟ ଵତ୍ସଲା ।
ତଥା ମମାପି ହୃଦୟଂ ମଣିରତ୍ନସ୍ୟ ଦର୍ଶନାତ୍ ॥ 3 ॥
ମଣିରତ୍ନମିଦଂ ଦତ୍ତଂ ଵୈଦେହ୍ୟାଶ୍ଶ୍ଵଶୁରେଣ ମେ ।
ଵଧୂକାଲେ ୟଥାବଦ୍ଧମଧିକଂ ମୂର୍ଧ୍ନି ଶୋଭତେ ॥ 4 ॥
ଅୟଂ ହି ଜଲସଂଭୂତୋ ମଣିସ୍ସଜ୍ଜନପୂଜିତଃ ।
ୟଜ୍ଞେ ପରମତୁଷ୍ଟେନ ଦତ୍ତଶ୍ଶକ୍ରେଣ ଧୀମତା ॥ 5 ॥
ଇମଂ ଦୃଷ୍ଟ୍ଵା ମଣିଶ୍ରେଷ୍ଠଂ ୟଥା ତାତସ୍ୟ ଦର୍ଶନମ୍ ।
ଅଦ୍ୟାସ୍ମ୍ୟଵଗତସ୍ସୌମ୍ୟ ଵୈଦେହସ୍ୟ ତଥା ଵିଭୋଃ ॥ 6 ॥
ଅୟଂ ହି ଶୋଭତେ ତସ୍ୟାଃ ପ୍ରିୟାୟା ମୂର୍ଧ୍ନି ମେ ମଣିଃ ।
ଅସ୍ୟାଦ୍ୟ ଦର୍ଶନେ ନାହଂ ପ୍ରାପ୍ତାଂ ତାମିଵ ଚିଂତୟେ ॥ 7 ॥
କିମାହ ସୀତା ଵୈଦେହୀ ବ୍ରୂହି ସୌମ୍ୟ ପୁନଃ ପୁନଃ ।
ପିପାସୁମିଵ ତୋୟେନ ସିଂଚଂତୀ ଵାକ୍ୟଵାରିଣା ॥ 8 ॥
ଇତସ୍ତୁ କିଂ ଦୁଃଖତରଂ ୟଦିମଂ ଵାରିସଂଭଵମ୍ ।
ମଣିଂ ପଶ୍ୟାମି ସୌମିତ୍ରେ ଵୈଦେହୀମାଗତାଂ ଵିନା ॥ 9 ॥
ଚିରଂ ଜୀଵତି ଵୈଦେହୀ ୟଦି ମାସଂ ଧରିଷ୍ୟତି ।
କ୍ଷଣଂ ସୌମ୍ୟ ନ ଜୀଵେୟଂ ଵିନା ତାମସିତେକ୍ଷଣାମ୍ ॥ 10 ॥
ନୟ ମାମପି ତଂ ଦେଶଂ ୟତ୍ର ଦୃଷ୍ଟା ମମ ପ୍ରିୟା ।
ନ ତିଷ୍ଠେୟଂ କ୍ଷଣମପି ପ୍ରଵୃତ୍ତିମୁପଲଭ୍ୟ ଚ ॥ 11 ॥
କଥଂ ସା ମମ ସୁଶ୍ରୋଣୀ ଭୀରୁଭୀରୁ ସ୍ସତୀ ସଦା ।
ଭୟାଵହାନାଂ ଘୋରାଣାଂ ମଧ୍ୟେ ତିଷ୍ଠତି ରକ୍ଷସାମ୍ ॥ 12 ॥
ଶାରଦ ସ୍ତିମିରୋନ୍ମୁକ୍ତୋ ନୂନଂ ଚଂଦ୍ରଂ ଇଵାଂବୁଧୈଃ ।
ଆଵୃତଂ ଵଦନଂ ତସ୍ୟା ନ ଵିରାଜତି ରାକ୍ଷସୈଃ ॥ 13 ॥
କିମାହ ସୀତା ହନୁମଂସ୍ତତ୍ତ୍ଵତଃ କଥୟାଦ୍ୟ ମେ ।
ଏତେନ ଖଲୁ ଜୀଵିଷ୍ୟେ ଭେଷଜେନାତୁରୋ ୟଥା ॥ 14 ॥
ମଧୁରା ମଧୁରାଲାପା କିମାହ ମମ ଭାମିନୀ ।
ମଦ୍ଵିହୀନା ଵରାରୋହା ହନୁମନ୍ କଥୟସ୍ଵ ମେ ॥ 15 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଷଟ୍ଷଷ୍ଟିତମସ୍ସର୍ଗଃ ॥
